VOV.K'Ho- Tam gơl nhơm trồ tiah ngai sơlơ ờ ƀươn soh gơrềng ờ dồ êt tus rài kis, lơh sa bơh làng bol dê. Lơh gơlik kơphê tàm Tây Nguyên kung gam kong gơrềng uă bơh tam gơl nhơm trồ tiah dê. Bơta tam gơl ờ bè ờs bơh trồ tiah dê bè duh mrềt, bè tam pà mìu…gơ sồr cau lơh broă sa pal ngăc rơngar, sơrbăc mhar rlau tàm ală bơta chài tam phan ngui ai sươn chi in.

VOV.K'Ho- Tềng đap hoàc huơr bơh cau tam biap dê, gah broă lơh sa suơn sre mờ gơnoar atbồ ală sàh tiah tam uă biap bơh càr Lâm Đồng dê kung neh lam lơh broă lơh dong kờl bơto pơlam broă lơh sa suơn sre, ai càn priă lơh broă sa suơn sre nàng dong làng bol pơnđơl brồ guh, bơtàu tơnguh wơl lơh sa.

VOV.K'Ho- Anih duh broă Làng bol càr Dăk Lăk đơs uă ngan tus mờ jơnau sồr pic plai kơphe tơl dum, gàr bơta bơkah, bañ tài trồ tiah ờ niam mờ pic plai gam lir.

VOV.K'Ho- Càr Quảng Ngãi tŭ do neh lơh geh ală phan bơna OCOP geh măt kă bro bè toìh Lý Sơn, kwế Trà Bồng…Tơnơ̆ tơrgùm bal dùl, ù tiah rề ơnàng, Quảng Ngãi lơh pràn bơtàu tơnguh ală phan bơna OCOP kwơ ờ huan geh bè kơnuh sơnơm Ngọc Linh, kơphe tiah mrềt, macca…rơhời tơnguh uă bơta niam, lơh bal ală broă lơh mờ bơtàu tơnguh drà tăc blơi.

VOV.K'Ho- Tàm càr Dăk Lăk, ngai sơlơ geh uă cau lơh broă sa rơcăng lài tam gơl tus broă lơh tơrlòng lài lơh sa tơlir, gơlòt pơdar halà kis wơl. Cồng nha tơnggŏ loh tàm bơta kơphê geh gơguh tai, geh tơrgùm blơi mờ giă jơnhoa rlau mờ drà tăc blơi, mơkung tơrmù priă tă bơcri kơnờm ngui niam ngan phan sơrbì bơh broă lơh sa sươn sre.

VOV.K'Ho- Tàm ală nam pa do, lơh broă sa suơn sre càr Lâm Đồng neh geh ală broă tam gơl să pràn kơl dang. Càr Lâm Đồng tŭ do gam brồ guh gơs tiah tờm broă lơh sa suơn sre măi mok pa gùt lơgar dê. Cồng nha lơh geh hơ̆ ngan là kơnờm bơta lòt bal nền nòn đah làng bol, cau atbồ, cau jăk chài mờ ală mpồl lơh sa kă bro dê.

VOV.K'Ho- Tàm bơta tam gơl nhơm trồ tiah ngai sơlơ gơrềng loh làng tus lơh broă lơh sa sươn sre, boă jòi broă lơh tơrlòng lài tam phan kơnhăp jŏ gam gơgos jơnau sồr kờñ ngan jal mhar ngan. Tàm Dăk Lăk, broă lơh tơrlòng lài “Gĭt bơta pràn chi tam tơrgùm bal” tàm tờm kơphê gam geh lam lơh làm uă, neh tơnggŏ geh cồng nha mơkung tơngguh uă cồng nha lơh geh mờ sền gàr tiah ơm kis ƀòn brê bơnơm mờ gơdờp mờ tam gơl nhơm trồ tiah.

VOV.K'Ho- Giă Ka kau bàr nam rê wơl hờ ndo ờ gơ tam gơl mờ gàr sùm tàm khà jơnhoa, uă cau gĭt uă jrô đơs nền do là tŭ niam nàng gah phan ka kau Việt Nam lơh wơl mờ bơtàu tơngguh pràn kơldang. Mờ càr Dăk Lăk, tŭ niam sơlơ loh làng tŭ càr pa gĭt geh tŭ niam drà kă bro, mơkung lơh pràn lơh bal mờ lơh jăt broă pơlam lơh sa tàm pơdar kơnhăp jŏ, dipal mờ gùng dà bơtàu tơngguh broă lơh sa sươn sre pa ngan dê.

VOV.K'Ho- Càr Dăk Lăk geh rlau 214 rbô lồ kơphê, geh tus rlau 30% bă kơphê jơh gùt lơgar dê. Tơngai do, tàm uă ƀòn lơgar, kơphê neh dum mờ làng bol sơnđờm mŭt tàm kàl pik tơnhàu. Bulah bè hơ̆, mìu jŏ jòng mờ gơrềng bơh ală dơ̆ mìu càl rbŭt dờng dê tàm ală ngai do lơh broă ìs pơr, prăp gàr tìp uă kal ke gơ kơryan.

VOV.K'Ho- Mìu càl rơbŭt dờng sồ 13 tus tàm càr Dăk Lăk lơh aniai hoàc hươr rơlao 2 rbô tơmàn đong, pe nă cau chơ̆t, gĭt nđờ rơbô nơm hìu ờdiơng, ală gùng che đèng – hìu bơsram gơtìp aniai jơh. Tàm bơta jal mhar, broă lơh gơnoar atbồ ƀòn lơgar bàr kâp dơ̆ sơnrờp tìp tơn mờ bơta lòng trồ tiah lơh aniai dờng. Bơta sồr ntrờn mhar tus lơh geh wơl đèng, hìu bơsram cơldŭ bơsram mìng tàm 72 jiơ lơm, Dăk Lăk pà gŏ bơta lơh broă ndrờm bal, lòt mờ să tờm tơn mờ rềp mờ làng bol – dùl jơnau lùp pràn jak đơng lam lơh jăt tàm bơta rơndăp mpồl lơh broă pa.