VOV4.K’ho- Tàm càr Dăk Nông, tơnơ̆ mờ dùl tơngai ơm ing, kòp jê ndul gơjroh sur châu Phi neh gơtìp wơl tàm ờ uă tiah. Kờñ kơrian kòp gơtờp tàm uă tiah, gơnoar atbồ bal mờ ală anih lơh broa geh gơnoar gam lơh ngan lơh jăt ală broă wàng se, tơ̆p pơrgŭc ală sur neh gơtìp kòp.

                                                                       Tơ̆p pơrgŭc sur gơtìp kòp

Tŭ do càr Dăk Nông neh geh 4 kơnhoàl tàm hơ̆ geh: Tuy Đức, Dăk Rlấp, Dăk Glong, Dăk Song gơtìp wơl kòp jê ndul gơjroh sur châu Phi. Tàm hơ̆, tàm kơnhoàl Dăk Song neh gŏ 5 ƀòn gơwèt 3 xã Dăk Ndrung, Dăk Hoà mờ Thuận Hạnh. Tiah gơtìp kòp uă ngan geh gŏ tàm hìu ồng Nguyễn Xuân Thủy tàm xã Quảng Khê, kơnhoàl Dăk Glong mờ rơlao 80 nơm sur neh geh 52 nơm sur gơtìp chơ̆t. Gah lơh sơnơm phan ròng neh ai mẫu nàng pơyoa đah lơh sơnơm phan ròng tiah 4 in xét nghiệm mờ cồng nha geh gŏ mờ kòp jê ndul gơjroh sur châu Phi. Tus tŭ do, tàm càr Dăk Nông, mpồl lơh broă geh gơnoar neh bơyai lơh tơ̆p pơrgŭc rơlao 160 nơm sur gơtìp kòp mờ bơta ñjơ̆ mờr 5 tấn 8 tạ.

Cau mblàng Ndong Brawl