VOV4.K’ho- Tài gơrềng bơh trồ tiah dê, tờm điều tàm càr Gia Lai nam do ờ geh tơnhàu. Kàl điều ờ geh tơnhàu gơ tus bal mờ tơngai giá điều gơmù lơyah ngan, lơh cau lơh broă sa tam điều hoàc hươr tơl ală bơta.

Klo ngai trồ tơngai duh tơr ồ ngan, hìu bơnhă bi Rchăm Thu ơm tàm ƀòn Krái, xã Ia Khai, kơnhoàl Ia Grai, càr Gia Lai dê bal mờ bàr pe nă cau lòt lơh broă apah jăt nhai kàl gam ờ ru tŭ ngan mờ broă pik plai điều. Bi Thu pà gĭt, nam lài hìu bơnhă lơh geh cồng 100 tơlak đong bơh 3 lồ điều, mơya nam do, priă cồng mìng lơh geh nggùl lơm tài bơh tu kòp lơh aniai uă ir tàm tơngai tờm điều geh plai kơnròm, lơh cồng nha lơh geh gơmù uă ngan. Bi Rchăm Thu, yal: Nam do, dilah ờ geh tu kòp lơh aniai den điều geh plai uă ngan, tài bơh bơkàu gơ geh uă ngan. Mơya, pal geh phơng ơn, sơnơm gơ sơ̆t tu wil tơl tai den hơ̆ sồng sền gàr geh plai kơnròm. Dilah geh sơnơm tu wil tơl, koh klah ntê chi gơtìp tu sa aniai mờ ntê gơtìp bŭt bơsềt den he pal koh sang tĕ ờ gŏ di lời lơh bơtờp den cồng nha geh niam ngan. Tŭ do, làng bol kal ke ngan, kơ̆p kờñ dà lơgar dong kờl bè broă chài rơcăng sơndră tu kòp lơh aniai.

Làng bol xã Ia Khai, kơnhoàl Ia Grai, càr Gia Lai pik plai điều

Kung ơm tàm xã Ia Khai sơl, hìu bơnhă ồng Ksor Huôn kung gam ờ ru ngan mờ broă pik plai điều tàm 3 lồ. Ồng Huôn pà gĭt, tài bơh tu kòp lơh aniai uă ir, gar điều dềt, ờ niam den tàng giá tăc kung lơyah rlau uă ngan. Bơh bồ kàl tus tŭ do, hìu bơnhă ồng mìng tăc geh bơh 22 tus 25 rbô đong tàm dùl kĭ, tàm tŭ tàm nam lài, giá tăc kờp bal là 30 rbô đong dùl kĭ.

Ồng Ksor Huôn yal: Nam do, plai điều lơh ờ huan geh mờ giá lơyah ngan tai pơndrờm mờ nam lài, bol añ kung kơ̆p kờñ dà lơgar pơn jăt tai sền gròi rlau tai tus lơh broă sa sươn sre nàng tam gơl rài kis ai làng bol in.

Điều lơh ờ geh, làng bol ờ lơh geh priă jền, cau kă phan kung ờ geh phan nàng tăc sơl. Mò Phạm Thị Thúy là dùl nă cau kă phan sùm lòt blơi gar điều tàm ù tiah kơnhoàl Ia Grai dê pà gĭt: Nam do, bơta niam điều ờ huan geh tài bơh mìu ờ di kàl mờ gơtìp tai mhual bơtiết, bơta niam điều ờ huan geh, blơi lơyah rlau mờ ală nam, giá kung gơmù uă ngan sơl tài bơh ờ lơh geh di bơta niam gar den tàng ờ geh cồng nha, pah nam kàl pik tờm geh tus jơ̆t nđờ tấn dùl ngai, nam do den pik mìng geh dùl êt lơm, pơgăp 1/3 pơndrờm mờ ală nam.

Kàl pik điều nam do yal lài gơmù bè cồng nha mờ plai lơh geh pơndrờm mờ nam 2020

Jăt mò Nguyễn Thị Mai Lương, Chủ tịch Ủy ban Nhân dân xã Ia Khai yal, xã là tiah geh bă ù tam điều dờng ngan rlau jơh kơnhoàl Ia Grai dê bal mờ rlau 1 rbô lồ. Ală nam do, tờm điều kis dờng niam ngan mờ gơ ai cồng nha lơh sa uă, pơgồp bơnah dong làng bol tơnguh geh priă lơh geh. Mơya, tềng đăp bơta tam gơl trồ tiah bè tŭ do, cau tam điều geh priă jền ờ kơ̆ kơl jăp. Bơta do gơ sồr pal geh ală broă lơh bơsong niam rlau gơwèt mờ tờm chi tam tờm ngan tơn jơh jơgloh tơrmù rƀah di tàm xã. Mò Nguyễn Thị Mai Lương, đơs: Broă lơh gơmù rƀah tàm xã bol añ dê kung kơnờm uă tàm tờm điều sơl, kung kơ̆p kờñ ngan ală kấp gơnoar ătbồ geh uă gùng dà pa, sền gròi rlau tai tus tiah bơtàu tơnguh tờm điều, kơ̆p kờñ geh phan bơna OCOP nàng đơs nền phan bơna điều bơh xã Ia Khai dê.

Cau cih Hoàng Qui- Cau mblàng Lơ Mu K’Yến