VOV4.K’ho- Mŭt tàm tơngai tờm bơh kàl tơnhàu kơphê nam 2021 dê, giă rơpung kàl nisơna gơmù uă ngan gơmù tus gam hơđơm 3 rbô đong lơm tàm dùl kĭ. Bơta do lơh uă cau lơh broă sa tam rơpung kài tàm Gia Lai gơtìp hoàc hươr, roh gời priă bơcri tam mờ sơngka sền gàr.

15 nam apah ù tam rơung kài tàm xã Ia Mơr, kơnhoàl Chư Prông, càr Gia Lai dê, ồng Bùi Hữu Phước (46 sơnam ơm tàm xã Bình Nghi, kơnhoàl Tây Sơn, càr Bình Định) pà gĭt, ờ huan ngan tŭ lơi giă rơpung kài gơmù uă bè kàl do. Nam do, giă phơng sih mờ sơnơm sền gàr phan tam gơguh uă, nàng bơcri priă tam 2 lồ rơpung kài, ồng tă priă 100 tơlak đong, càn tai mờ ngân hàng 60 tơlak đong. Bồ kàl, giă rơpung kài là 7 rbô đong dùl kĭ den rơpung kài bơh ồng dê ờ hềt tus tơngai tơnhàu. Gùl kàl, giă gơmù uă nisơna ngan gơmù mìng gam hơđơm 3 rbô đong lơm tàm dùl kĭ, gĭt nền là hoàc hươr, ồng Phước gam kơlôi rơcăng ờ hềt pik. Bè hơ̆ mơya, giă ờ hềt gơguh tai, kàl mìu ờ di kàl lơh rơpung kài tàm sre gơtìp rơđàng, ồng lồi dŭt pal tăc pơrdô mờ giă mờ 2 rbô 500 đong lơm tàm dùl kĭ. Ồng Phước muăt jrùm yal: Geh 7 rbô đong dùl kĭ là bồ kàl. Tŭ do, lơgar Lo til mpồng nhàr lơgar, ờ gơtùi tăc geh là gơmù uă tơn mìng gam 2 rbô 500 đong lơm tàm dùl kĭ. 1 sào añ hoàc hươr 6 tơlak đong. Hoàc hươr den tàng ờ geh priă rơcăng lơh kàl tơnơ̆.

Cau lơh broă sa pal lơh hìu kù mờ ơm sa bĭc tơn tàm sươn tàm 03 nhai nàng sơngka sền gàr rơpung kài

Ndrờm bè ồng Phước sơl, 03 nhai do, ùr bơklau bi Văn Thị Toán (39 sơnam) kung pơyua 2 nă kòn tàm ƀòn tờm Bình Định sơl, lòt tus xã Ia Mơr, kơnhoàl Chư Prông, càr Gia Lai apah ù, tam rơpung kài. Tus kàl tơnhàu nàng wơl rê wơl sa tềp mờ hìu bơnhă, bè hơ̆ mơya ùr bơklau Bi Toán gơlơh muăt jrùm ngan wơl tài bơh giă rơpung kài gơmù uă ir. Bi Văn Thị Toán yal: Añ tă 1 lồ là 160 tơlak đong. Pah cau lơh broă tŭ do kung jơnhoa ngan sơl, cau lơh sươn tăc mờ giă 3 rbô đong dùl kĭ là hoàc hươr, hoàc hươr 40 tơlak dùl lồ. Roh gời dà kơlhề ùr bơklau dê, oh kòn lời sơrbì tàm hìu, ùr bơklau lòt tus ndo mơya ờ lơh geh priă jền.

Bi Toán tàm sươn rơpung kài he dê tàm xã Ia Mơr

Tŭ do, tàm càr Gia Lai geh rlau 1 rbô lồ rơpung kài, tơrgùm tàm ală kơnhoàl: Krông Pa, Phú Thiện, Ia Pa mờ Chư Prông...Kàl rơpung kài sùm tàm pơgăp 3 nhai lồi nam, cau lơh broă sa pal lơh hìu sơndìp ơm tàm sươn sre nàng sền gàr bòl glar ngan. Nam do, giă rơpung kài gơmù uă ngan, lơh bơta bòl glar kal ke hơ̆ neh ờ gŏ geh bơsir wơl dipal. Ồng Nguyễn Tuấn Anh là Phó Củ tịc Ủy ƀan Ñân zân xã Ia Mơr, kơnhoàl Chư Prông, pà gĭt: Giă bè nam lài bơh 6 rbô đong tus 7 rbô đong dùl kĭ den làng bol hơ̆ sồng lơh geh cồng. Tus tŭ do, giă gam pơgăp bơh 2 rbô 500 đong tus 3 rbô đong dùl kĭ den làng bol tă priă jền uă, den dùl lồ gơtìp hoàc hươr nđờ jơ̆t tơlak đong. Den tàng kal ke ngan làng bol in, kơ̆p kờñ ngan geh broă dong kờl dùl bơnah lơi ai làng bol in.

Cau cih Nguyễn Thảo- Cau mblàng Lơ Mu K’Yến