VOV4.K’ho- Bulah pa geh lam lơh, mơya broă lơh ròng il sơrmañ ai ngke klòng mờ deh kòn tàm kơnhoàl Mang Yang, càr Gia Lai neh cèng wơl ală cồng nha bơh sơnrờp niam ngan. Broă lơh do gam dong làng bol, ngan là ală hìu bơnhă làng bol jơi bơtiàn dùl êt nă cau tam gơl gùng dà lơh sa nàng bơtàu tơnguh lơh sa, tam gơl mờ bơtàu tơnguh uă rài kis.

Ồng Vũ Văn Dân, tổ dân phố 4, thị trấn Kon Dỡng là dùl tàm ală hìu bơnhă tàm sră cih mat geh kơnhoàl Mang Yang, càr Gia Lai dong kờl ròng il sơrmañ. Ồng Dân pà gĭt, ồng geh pà 2 nơm il sơrmañ dam mờ 1 nơm il dra bơh nhai 6 nam lài nàng ròng. Geh bơta dong kờl bơh kuang bàng mờng chài tàm broă lơh dê bal mờ bơta mờng chài lùp bơsram tàm ală tŭ ròng siam sền gàr, tus tŭ do il ròng neh dờng niam ngan, il sơnđờm geh bun, deh kòn mờ ai ngke klòng tơngai sơnrờp. Ồng Vũ Văn Dân pà gĭt: Ròng siam sền gàr il do kung ƀươn sơl, il do khai sa nhơ̆t rwas, nha pơnăt, nha sung il ndrờm sa jơh lơm. Pah drim den he mìng roh pơgăp nggùl jiơ lơm nàng ai il in sa. Ai tàm kàl mìu, nhơ̆t niam den mìng roh pơgăp 10 phuk lơm nàng lòt koh nhơ̆t ai il in là khai sa jơh dùl ngai tơn. Ai tŭ bŭt ngke klòng den he ai sa phan bơkah bơtơl pràn il in bè ai sa tai prìt, tơngời, bùm blàng nàng broă gơ in bŭt ngke klòng niam rlau. Añ kung kơ̆p kờñ rề ơnàng tai nàng lơh sa gơ in kơ̆ kơl jăp.

Broă ròng il sơrmañ tàm kơnhoàl Mang Yang, càr Gia Lai

Bulah pa lam lơh, mơya ală hìu bơnhă ndrờm neh geh phan bơna ngke klòng il koh nàng tăc mờ geh il deh kòn. Hìu bơnhă bi Nông Văn Đạo, ơm tàm ƀòn Đê Bơ Tưk, xã Đăk Jơ Ta, kơnhoàl Mang Yang là dùl hìu bơnhă ai lơh pơnyơu. Jăt bi Đạo yal, lài do hìu bơnhă neh geh tŭ ròng be, kơnrồ mơya phan ròng do gơtìp kòp, giá tăc tŭ geh tŭ ờ. Bi Đạo dờp ròng il sơrmañ bơh sơnrờp lơh geh cồng nha lơh sa uă, dipal mờ broă ròng phan bơh làng bol dê, ngan là tàm tiah jơi bơtiàn dùl êt nă cau mờ geh lơh gơlik geh broă lơh broă sa jŏ jòng ai làng bol in nàng kơ̆ kơl jăp rài kis. Bi Đạo pà gĭt: Hìu bơnhă kung ưn ngài sơl Dà lơgar neh sền gròi dong kờl cèng broă ròng il sơrmañ do tus ai làng bol in. Lài ngan, añ gŏ geh cồng nha ngan bè hìu añ do do, ròng ờ hềt tus dùl nam mơya neh lơh geh 2 dơ̆ ngke klòng mờ deh tai dùl nơm il kòn. Tềng đăp măt, añ gŏ broă lơh do geh kuơ ngan mờ añ gam kờñ tơnơ̆ do sơlơ ròng uă tai, bơtờp tai sơntìl nàng geh uă tai nàng lơh broă lơh do ai jơh ală làng bol tàm do in lùp bơsram mờ lơh jăt.

Ồng Trần Nam Danh, Kuang ătbồ Cơldŭ lơh broă Lơh sa, Phan bơna kơnhoàl Mang Yang, càr Gia Lai dê pà gĭt: broă lơh ròng il sơrmañ geh lơh bơh priă jền broă lơh jak chài măy mok bơh kơnhoàl dê mờ dùl bơnah priă jền ai bơh làng bol dê. Mờ 5 hìu bơnhă geh rài kis kal ke geh dong kờl, broă lơh bơh sơnrờp neh lơh geh cồng nha, dong làng bol lơh gơlik geh broă lơh broă sa mờ geh rài kis tơl ngui tơl sa bơh broă ròng il sơrmañ. Ồng Trần Nam Danh pà gĭt: Tŭ lơh rơndăp broă lơh do den bol añ kung neh lơh bal mờ ală hợp tác xã nàng tŭ geh phan bơna ngke klòng den blơi làng bol in nàng làng bol iang nùs. Mờ tàm tơngai pa do den làng bol neh lơh jăt broă lơh geh cồng nha ngan den tàng làng bol chờ hờp mờ dan lơh uă broă lơh do nàng ngai sơlơ bơtàu tơnguh tàm ù tiah kơnhoàl dê.

Bal mờ ală cồng nha bơh sơnrờp mờ broă lơh ròng il sơrmañ ai ngke klòng mờ deh kòn cèng wơl neh dong ai làng bol tàm kơnhoàl Mang Yang in tam gơl gùng dà lơh sa; ngan là tàm tiah làng bol jơi bơtiàn dùl êt nă cau. Bơh hơ̆, pơgồp bơnah lơh mhar ală broă lơh tơn jơh jơgloh tơrmù rƀah tàm dùl kơnhoàl mờ rài kis làng bol dê gam uă kal ke bè Mang Yang, càr Gia Lai.

Cau cih Hoàng Qui- Cau mblàng Lơ Mu K’Yến