VOV4.K’ho- Tơngai lài, uă tiah tàm Dak Nông, Dak Lak tam blơn ồs Nhờk cèng wơl cồng nha lơh sa uă. Bulah bè hơ̆, anih lơh broă geh gơnoar sồr làng bol mìng tam tŭ geh bơta lơh bal kơ̆ kơljap mờ mpồl lơh sa kă bro blơi phan lơh gơs, ờ tơnguh bă ù tam dùl bă ur ar lơh gơbàn bơta jơngkah, ờ gơtùi yac, hoàc huơr priă jền bơcri tam.

Bơh nggùl nam 2020, hìu bơnhă ồng Đỗ Hoàng Hà ơm tàm thôn 3A, xã Quảng Sơn, kơnhoàl Dak Glong, càr Dak Nông neh lơh bal mờ Kong ti bơtàu tơnguh lơh sa Duyên Hải tàm ƀòn dờng Hồ Chí Minh nàng tam 1 lồ blơn ồs Nhờk. Tŭ lơh bal, hìu bơnhă ồng Hà geh kong ti tac sơntìl, pơlam bơta chài tam, sơngka sền gàr tờm blơn ồs Nhờk mờ kĭ sră pơrgon blơi phan lơh gơs mờ khà priă 7 rbô đông dùl kĭ.

Tơnơ̆ mờr 2 nhai sơngka sền gàr, suơn blơn ồs neh gơtùi tơnhàu. Pah dơ̆  tam blơn ồs Nhờk jŏ jòng bơh 8 tus 12 nhai gơwèt tàm bơta sơngka sền gàr bơh cau tam dê. Khà tơnhàu blơn ồs geh kàr lơi den geh kong ti blơi jơh kàr hơ̆ nàng tac tus lơgar Nhờk. Den tàng hìu bơnhă ồng Hà iang nùs tam sơngka sền gàr, ờ kơlôi rơcang bè anih tac bơh phan lơh gơs dê. Ồng Hà pà git, dilah tờm blơn ồs gơs niam den geh ai cồng nha tơnhàu kờp bal geh bơh 70 tus 100 tấn tàm 1 lồ gơ jat kàl. Tơnơ̆ tŭ kờp jơh priă tă lơh, broă lơh do digơlan cèng wơl priă cồng bơh 200 tus 300 tơlak đông tàm dùl lồ. Bulah bè hơ̆, broă tam pal lơh jat di kỹ thuật, ngan là sền gròi tus broă sền gròi kòp tu sa aniai, gàr phan lơh gơs geh bơta niam mờ lơh jat ală jơnau sồr tac hờ lơgar ndai.

Ngui măi ƀồm béc tàm broă sơngka sền gàr blơn ồs

Ndrờm bè hơ̆ sơl, hìu bơnhă ồng Lại Văn Xuân ơm tàm ƀòn Rbút, xã Quảng Sơn, kơnhoàl Dak Glong kung lơh bal mờ Kong ti bơtàu tơnguh lơh sa Duyên Hải tàm ƀòn dờng Hồ Chí Minh tam 5 sàu blơn ồs Nhờk. Jat ồng Xuân yal, pơndrờm mờ tam blơn sut den tam blơn ồs Nhờk ƀuơn sơngka sền gàr, ờ huan gơtìp kòp tu sa aniai, gơtùi tềm pềr priă jền tă lơh. Priă jền blơi phơng, sơnơm, ƀàk jơm, lơh rơngđa... nàng tam blơn ồs Nhờk mờr 15 tơlak đông tàm dùl sàu. Kàl pa do, hìu bơnhă ồng dê tam 5 sàu blơn ồs Nhờk. Kờp bal 1 sàu tơnhàu bơh 7 tus 8 tấn plai. Mờ priă blơi 7 rbô đông dùl kĭ, tơnơ̆ tŭ kờp jơh priă jền tă sơngka sền gàr, priă cồng hìu bơnhă ồng lơh geh mờr 150 tơlak đông.

Ồng Xuân pà git tai, tus kàl tơnhàu den ngai lơi kung geh rơndeh bơh kong ti dê tus tàm hìu nàng blơi làng bol in. Tơnơ̆ tŭ jơh tơnhàu den kong ti pơyua tơn priă tơmut tàm tài khoản den tàng bol hi iang nùs ngan tàm broă lơh sa.

Jat Mpồl cau lơh broă sa xã Quảng Sơn, kơnhoàl Dak Glong, càr Dak Nông pà git, blơn ồs Nhờk là dùl bơta chi tam pa tàm xã. Jơh gùt xã tŭ do geh 24 hìu bơnhă tam bal mờ bă ù rlau 15 lồ. Tơnơ̆ ală kàl tam pa do, gơtùi đơs nền, bơta chi tam do gơ kờñ ngan mờ ù tiah, trồ tiah tàm do. Tŭ do, ờ uă mpồl lơh sa kă bro dong sơntìl, pơlam bơta chài tam mờ blơi phan lơh gơs mờ khà priă jat sră pơrgon geh kĭ mờ mpồl lơh sa kă bro. Ală hìu bơnhă tam chờ hờp ngan tài git phan lơh gơs gơtùi tac mờ geh priă cồng jơnhua. Broă lơh bal tàm broă lơh sa đah mpồl lơh sa kă bro mờ cau lơh broă sa lơh gơlik gùng lòt geh cồng nha tàm tŭ tơngai uă bơta chi tam tờm lơh geh priă jền ờ uă.

Cau lơh broă sa lơh ngan sơngka sền gàr blơn ồs Nhờk jat di bơta chài

Lài hơ̆, ờ uă hìu bơnhă làng bol tàm xã Quảng Trực, kơnhoàl Tuy Đức, càr Dak Nông kung neh khin cha tam gơl bă ù tam phan ờ huan geh cồng nha nàng tam blơn ồs Nhờk. Tơnơ̆ 45 ngai sơngka sền gàr, blơn ồs neh gơtùi tơnhàu. Tơl sàu ai cồng nha tơnhàu bơh 40 tus 50 kĭ, tac mờ khà priă bơh 7 tus 8 rbô đông dùl kĭ. Ală hìu bơnhă làng bol do neh lơh bal mờ Kong ti bơtàu tơnguh lơh sa Duyên Hải ƀòn dờng Hồ Chí Minh hơ pơrgon blơi jơh phan lơh gơs, blơi tàm suơn tơn. Bulah bè hơ̆, tơnơ̆ hơ̆ tài gơ rềng bơh kòp Covid-19, đah mpồl lơh broă bak ơm ờ blơi blơn ồs den tàng blơn ồs gơtìp jơngkah. Den tàng nàng pleh bơta tam blơn ồs Nhờk is, tam ur ar, xã gam pơgồp bal mờ ală mpồl, gah broă lơh ờs mờng bơh kơnhoàl dê nàng sền gròi, kờp sền; mờ kung cribơyai, yal tơnggit, lơh bal mờ mpồl blơi jat gùng dà kơ̆ kơljap, jŏ jòng nàng làng bol in iang nùs tam mờ bơtàu tơnguh bơta chi tam do.

Cau mblàng K’Duẩn