VOV4.K’ho – Càr Dak Lak tŭ do geh 208 rbô lồ kơphe gam tàm tơngai ƀồm dà. Jơnau kờñ dà uă ngan tàm tŭ khà dà ờ huan uă là bơta kal ke ngan cau tam kơphe in tàm uă nam do. Bulah bè hơ̆, tàm kàl prang do, ală broă lơh ƀồm dà tềm pềr geh ngui uă làm bă tiah neh dong tơrmù ƀà kal ke bè dà, tờm kơphe gơs niam jơh bal tàm tơngai prang duh dờng ngan.

Ồng Triệu Văn Khang ơm tàm xã Ea M’Droh, kơnhoàl Cư Mgar geh 2 lồ kơphe gam tàm tơngai tơnhàu pà git, tus tŭ do, ală dà dờng, dà croh, tơnau dà halà bơtơt dơng dà, rbòng dà neh soat jơh.

  Ƀồm dà bè mìu gam geh hòi là hòr ntờc, broă lơh geh cồng nha nàng sơndră trồ prang soat dà suơn kơphe in tàm Dak Lak

Mơya tài lơh jat nền nòn jơnau đơs tềm pềr, mờ khà dà ờ huan uă bơh tơrlung khoàng, hìu bơnhă kung gam geh tơl dà ƀồm nàng suơn chi in gơs tơlir bè ờs: Dà ƀồm dơ̆ 2 do den hìu añ pal ngui dà bơh tơrlung khoàng. Tàm tŭ ƀồm den he ngui dà tềm pềr mờ broă ơm sền tàm suơn. Pah tŭ ƀồm tơl den he ntrờn ding hờ tiah ndai, pleh jơngkah dà lơh gơbàn hoàc huơr”.Kung lơh jat broă ƀồm dà tềm pềr, ồng Phùng Văn Nhiên ơm tàm xã Quảng Hiệp, kơnhoàl Cư Mgar neh tam gơl bơh broă ƀồm lìu gơs ƀồm hòr ntờc ai 3 lồ kơphe in.

 Ủy ban Nhân dân càr Dak Lak dong kờl làng bol 50% priă crap măi ƀồm dà hòr ntờc ai suơn kơphe in

Ồng Nhiên pà git, bơcri priă nàng ƀồm hòr ntờc bulah hoàc uă, mơya geh dà lơgar pơn jờng, dong kờl, mờ gam dong tờm kơphe gơs niam jơh bal tàm tơngai prang dờng tai: “Tiah hìu añ dê pah tŭ tus bồ kàl prang duh là tơnau dà, dà dờng soat jơh dà. Den tàng hìu añ ngui dà tơrlung khoàng nàng ƀồm. Jơh suơn chi kung neh tam gơl ƀồm dà hòr ntờc, broă do geh dà lơgar dong kờl nggùl khà priă tă lơh. Tŭ ƀồm kung pal sền gròi nền nòn pah jơ nàng ờ ƀồm sùh ir lơh gơbàn hoàc huơr dà, bè hơ̆ den hơ̆ sồng gơtùi gàr tơl dà ƀồm tus lồi kàl prang”.

Jat ồng Nguyễn Thanh Long, Kuang atbồ Chi cục bơtơt rbòng dà càr Dak Lak pà git, trồ tơngai duh jŏ jòng tàm kàl prang lơh gơbàn ờ tơl dà ƀồm tờm kơphe in, là bơta neh gơbàn sùm tàm uă nam tàm càr. Mơya bơta do gam hời rơhời geh tam gơl mờ broă lam lơh uă ală broă lơh tềm pềr. Ủy ban Nhân dân càr Dak Lak kung neh geh broă dong kờl ngan ngồn nàng làng bol in ƀuơn ngui kỹ thuật ƀồm dà pa: “Bơh bồ kàl prang duh bol hi neh pơlam làng bol pal ngui dà tềm pềr, lơh ngan prap dà tàm ală tơnau dà dềt drơng broă ƀồm chi tam in. Broă ƀồm dà den pơlam làng bol ƀồm dà tềm pềr, ờ hoàc huơr dà. Lam lơh ngui công nghệ broă lơh ƀồm dà tềm pềr. Broă do den Ủy ban Nhân dân càr geh dong kờl 50% priă tă lơh ai làng bol in dilah hìu bơnhă lơi tam gơl gơs broă ƀồm dà tềm pềr mờ công nghệ hòr ntờc”.

Cau mblàng K’Duẩn