VOV4.K’ho- Ngai 12/8, Ủy ban Nhân dân càr Dăk Lăk geh broă rơndăp lơh tăc 2 bơta plai chi tờm ngan bơh càr dê là sầu riêng mờ ƀơ bal mờ kờp jơh kơn jơh pơgăp150 rbô tấn. Broă rơndăp lơh kờp dŭ ai jơnau digơlan kòp Covid-19 gơbàn ngai sơlơ kal ke, tăc phan mờ lơgar ndai tìp kal ke. Jăt broă rơndăp lơh pa geh ai ngui, Ủy ban Nhân dân càr Dăk Lăk kờp dŭ: dilah kòp Covid-19 ơm tàm bơta gròi sền bè tŭ do, den càr gàr jơnau kờñ tăc mờ lơgar ndai 70% khà plai sầu riêng, ndrờm mờ 72 rbô tấn; 30% gam wơl geh tăc tàm lơgar tàm khà plai ris mờ plồ mờ ơn mrềt.

Tàm gùl nhai 8, tŭ uă sươn sầu riêng Dona geh tơnhàu, sầu riêng Dăk Lăk mŭt tàm kàl tơnhàu tờm

Gơwèt mờ plai ƀơ, jơnau kờñ pơgăp 80%, ndrờm mờ 32 rbô tấn tăc tàm lơgar; khà gam wơl tăc mờ lơgar ndai. Broă rơndăp lơh dơ̆ 2 là kòp Covid-19 gơrềng ờ niam, càr geh tơrgùm jơh ală priă jền dong kờl làng bol tăc plai ƀơ, sầu riêng. Jơnau kờñ tăc sầu riêng mờ lơgar ndai gơmù gam 50% mờ ƀơ mìng gam 10%. Tus tơngai do, sầu riêng Dona, sơntìl tờm ngan giă phan bơna jơnhoa ngan rlau jơh, gam mŭt tàm kàl tờm, geh giă tăc tàm sươn ơm tàm khà hơđơm 45 rbô đong dùl kĭ, gơmù rlau 20% pơndrờm bal dùl tŭ mờ nam lài.

          Cau mblàng Lơ Mu K’Yến