VOV4.K’ho– Ală nam rềp ndo, prìt sơ kò geh sền là chi tam tờm ngan cèng wơl cồng nha lơh sa ai làng bol ală xã tiah ngài Cư Pui, Cư Drăm mờ Yang Mao, kơnhoàl Krông Bông, càr Dak Lak in. Priă lơh geh bơh prìt sơ kò neh dong uă hìu bơnhă lik klàs rƀah, brồ guh lơh pas. Bulah bè hơ̆, kàl tơnhàu nam do, cau tam prìt sơ kò tàm Krông Bông gam kal ke jòi anih tac tàm drà kă bro ai bơta plai do in.

Kàl tam prìt sơ kò nam do, hìu bơnhă ồng Trần Dương Sỹ ơm tàm xã Cư Drăm, kơnhoàl Krông Bông, càr Dak Lak tam 4 lồ. Jơh khà prìt sơ kò neh tus tơngai tơnhàu mơya hìu bơnhă ồng ờ suk ngan, tài khà priă tac gam gơmù lơyah ngan, cau tac bro tus blơi kung dùl êt sơl. Ồng Trần Dương Sỹ pà git, tă priă mờr 160 tơlak đông nàng blơi phơng sih, ală bơta chế phẩm sinh học, sơnơm sền gàr phan tam, priă ơpah cau sơngka sền gàr.. nàng suơn chi in geh cồng nha tơnhàu uă, mơya tŭ do prìt sơ kò ờ gơtùi tac, jơnau pơhìn gơtìp hoàc huơr neh mpờl gŏ ngan tềng đap mat: “Tơngai lài mờ pơgap mờ do nggùl nhai den tac geh khà priă 20 rbô đông 1 nơm, tŭ do den mìng gam bơh 12 tus 13 rbô 1 nơm. Cau tac bro tus blơi khi đơs là digơlan gam gơmù tai tŭ làng bol tơnhàu uă. Làng bol mìng kơp gơn tàm tiah do geh hìu măi lơh gơlik halà crơng gơs hợp tác xã tơrbŏ bal mờ ală tiah dong blơi prìt sơ kò dùl bă kơ̆ kơljap”.

Tài gơ kờñ mờ ù tiah, trồ tiah, tờm prìt sơ kò tàm tàm ală xã Cư Drăm, Cư Pui mờ Yang Mao, kơnhoàl Krông Bông sùm tơnhàu geh bơh 35 tus 40 tấn tàm 1 lồ 1 kàl

Ờ mìng is hìu bơnhă ồng Sỹ lơm, mờ git nđờ rhiang hìu bơnhă tam prìt sơ kò tàm ală xã Cư Pui, Cư Drăm mờ Yang Mao, kơnhoàl Krông Bông kung gam gơtìp kal ke tŭ prìt sơ kò neh tus tơngai tơnhàu uă. Ală kàl lài, mờ khà priă tac bơh 16 tus 20 rbô 1 nơm plai kơn jơ̆ bơh 2 kĭ rlau jơđang, den tŭ do gơmù mìng gam bơh 10 tus 12 rbô đông. Tŭ prìt sơ kò tơnhàu geh uă, tac yòm, den tơl lồ digơlan geh cồng tus 50 tơlak đông, kơnờm bơh hơ̆ mờ uă hìu bơnhă lơh broă sa neh lơh geh hìu đam dờng niam. Kàl tam prìt sơ kò nam do, khà priă gơmù lơyah, priă cồng ờ uă, geh tŭ uă hìu bơnhă pal kong mờ hoàc huơr.

Mò Niê Thanh Trang, Phó Bí thư Đảng ủy xã Cư Drăm, kơnhoàl Krông Bông pà git, gùt dà geh rlau 300 hìu bơnhă tam prìt sơ kò, mờ bă ù mờr 450 lồ. Tềng đap broă tờm prìt sơ kò sùm pal kong mờ bơta tơnhàu geh uă mơya tac ờ yòm, tac yòm den tơnhàu ờ geh, gơnoar atbồ xã neh lam lơh uă broă lơh dong kờl cau tam prìt sơ kò, mơya ờ hềt geh cồng nha: “Tơngai do den làng bol gam tơnhàu prìt sơ kò, mơya ờ hềt geh anih tơlik tac den tàng khà prìt sơ kò mờ làng bol gơtùi tac geh khà priă lơyah ngan. Đảng ủy geh jơnau đơs mờ kấp hơđang dan gùng dà hòi jà bơcri priă lơh hìu măi lơh gơlik nàng kờñ blơi prìt sơ kò làng bol in. Mơya tus tŭ do kung ờ hềt gơtùi lơh sơl”.

Anih tac prìt sơ kò in sùm lơh cau tam tàm ală xã bơh kơnhoàl Krông Bông dê kơlôi rơcang ngan

Jơh gùt kơnhoàl Krông Bông tŭ do geh rlau 500 lồ prìt sơ kò, tơrgùm uă ngan tàm ală xã Cư Pui, Cư Drăm mờ Yang Mao. Mò Trần Thị Len, Kuang atbồ Hợp tác xã lơh sa suơn sre Cư Drăm đơs, tờm prìt sơ kò gơ kờñ ngan mờ ù tiah, trồ tiah tàm tiah do. Khà tơnhàu sùm geh bơh 35 tus 40 tấn plai tàm dùl lồ dùl kàl. Plai lơngồt, ƀô thồm; lò ring, dà rơmit bơñà sền niam mat ngan. Cồng nha tơnhàu, bơta niam plai prìt sơ kò tàm Krông Bông neh geh sền sơ wì bơh uă nam lài; mơya bơta kơlôi rơcang ngan rlau jơh mờ sùm gơlik geh bơh cau tam dê hơ̆ là anih tac prìt sơ kò dê: “Bă ù tam prìt sơ kò bơh xã Cư Drăm dê tŭ do gơguh tus 450 lồ, mơya tus tŭ do ờ hềt geh anih blơi phan lơh gơs làng bol in. Tus tŭ do ờ hềt geh dùl kong ti halà mpồl lơh sa kă bro lơi tus kĭ hơ pơrgon blơi prìt sơ kò. Bơta kơp kờñ bơh cau tàm hợp tác xã dê là jòi geh anih tac prìt sơ kò in. Đơs bal cau lơh broă sa tam geh plai prìt sơ kò den bòl glar ngan”.

Cau mblàng K’Duẩn