VOV4.K’ho- Tàm kơnhoàl Cư̆ Mgar, càr Dăk lăk, kòp as sồt tềng kơl tai lơh pơnờp mờ kòp jê ndul gơjroh sur châu Phi gam gơtờp uă lơh uă hìu ròng phan gơtìp hoàc huơr uă.

Mpồl kơnrồ gơtìp kòp as sồt tềng kơl tai lơh pơnời chơ̆t mờr jơh, mò Hoàng Thị Chấn, kis tàm mpồl ƀòn 8, thị trấn Quảng Phú, kơnhoàl Cư̆ Mgar, càr Dăk Lăk gơlơh pơlai ngan tŭ ală priă tàm hìu nhă bơcri tŭ do roh gời jơh.

                                    Kuang bàng lơh sơnơm phan ròng cit sơnơm kơnrồ in

Mò Chấn pà git, mpồl kơnrồ 4 nơm tŭ do neh chơ̆t 3 nơm, hoàc huơr mờr 100 tơlăk đong. “Kung hòi cau tus nàng cit rơcang sơndră mờ kòp sơl, hơ̆ sồng he kung rơcang sơndră mờ kòp gơtờp tai, ƀồm sơnơm ndrờm bal jơh. Mơya mìng là kòp gơtờp mhar ir, lài ngan kơnrồ me chơ̆t, 3 ngai tơnơ̆ kơnrồ kòn chơ̆t sơl. Tŭ do tus kơnrồ kòn do tai, neh mờr 2 nhai kung gơtìp kòp den tàng kung chơ̆t sơl”.

Bal mờ kòp as sồt lơh pơnời tềng kơl tao rơpu, kơnrồ, tŭ do tàm kơnhoàl Cư̆ Mgar kòp jê ndul gơjroh sur châu Phi kung gam gơtờp mhar. Ồng Nguyễn Ngọc Đương, kis tàm ƀòn Hiệp Hoà, xã Quảng Hiệp, kơnhoàl Cư̆ Mgar pà git, 3 nơm sur me mờ mpồl sur dờng tàm wàng rơcang tăc neh gơtìp chơ̆t tài kòp gơtờp den tàng neh tơ̆p pơrgŭc jơh. “Añ kung geh cit sơnơm vaccine rơcang sơndră mờ kòp 3 tàm 1, kòp jê ndul gơjroh sur châu Phi, kòp tồr tơlir, kòp sồt mbùng gơtă nias. Bol añ ròng tam cah is ờ do ờ dă mơya ờ git tiah gơtờp kòp bơh tàm tiah lơi. Ngai sơnrờp gŏ 1 nơm pơrhê tềng să, tus ngai dơ̆ 2 jơh gùt mpồl sur gơtìp chơ̆t jơh, bơh sur me tus sur kòn. Añ neh yal mờ anih lơh broă gah lơh sơnơm phan ròng xã, gơnoar atbồ xã tus nàng ai phan lòt xét nghiệm sơl, den cồng nha geh gŏ mờ kòp jê ndul gơjroh sur châu Phi”.

                                                      Tơ̆p pơrgŭc phan ròng gơtìp chơ̆t tài kòp

Jăt jơnau kờp bơh Phòng Nông nghiệp mờ Phát triển Nông thôn kơnhoàl Cư̆ Mgar, tus tŭ do kòp as sồt tềng kơl tao lơh pơnời tàm phan ròng gơtìp tàm 42 ƀòn gơwèt 14 xã, thị trấn. Mpồl lơh broă geh gơnoar neh bơyai lơh tơ̆p pơrgŭc 88 nơm rơpuh, kơnrồ mờ kờp jơh mờr 8 rơbô 500 kĭ. Gơwèt mờ kòp jê ndul gơjroh sur châu Phi neh gơtờp tàm 9 xã, thị trấn, mờ kờp jơh bơta ñjơ̆ tơ̆p pơrgŭc mờr 26 rơbô kĭ.

Ồng Nguyễn Quang Đức, Kuang atbồ anih ròng phan mờ lơh sơnơm phan ròng kơnhoàl Cư̆ Mgar pà git, tŭ do gah lơh sơnơm phan ròng neh bơyai cit sơnơm vaccine ai mpồl phan ròng in, mờ pơgồp bal mờ gơnoar atbồ xã tơnguh ală anih gròi sền kòp, chồl pràn broă atbồ, gròi sền broă gơsơ̆t, pơn diang, kă bro phan ròng tàm kơnhoàl. “Tŭ kòp gơtờp gơbàn, anih lơh sơnơm phan ròng mờ Phòng Nông nghiệp mờ Phát triển Nông thôn neh ngui ală broă lơh mhar bè ƀồm sơnơm lơh kloh kòp, cit sơnơm vaccim gơwèt mờ kòp as sồt tềng kơl tai rơpu, kơnrồ lơh pơnời. Tus tŭ do kòp gơtờp geh geh sền gròi. Tŭ kơno jơnau yal gơtìp kòp den anih lơh broă do neh tus sền gròi, lơh kloh tiah gơtìp kòp tàm tiah hơ̆ tơn, ai mẫu ală bơta kòp pơyoa tus anih lơh broă geh gơnoar in xét nghiệm. Tàm tŭ kơ̆p cồng nha di lah phan ròng gơtìp chơ̆t den pal tơ̆p pơrgŭc. Di lah cồng nha geh gŏ mờ kòp den bơyai lơh mơ broă tam dră mờ kòp tàm tiah hơ̆ tơn mờ yal mơ gơnoar atbồ in git”.

Cau cih Tuấn Anh- Cau mblàng Ndong Brawl