VOV4.K’ho- Dơ̆ bơtờp kòp Covid-19 dơ̆ 4 do gam jŏ jòng, gơrềng ờ dùl êt tus rài lơh sa, tàm hơ̆ geh broă tăc bro phan lơh geh bơh sươn sre gam là jơnau kơlôi rơcăng uă ngan bơh cau lơh broă sa dê. Tàm càr Dăk Lăk, cau tam sầu riêng bal mờ gơnoar ătbồ tàm càr do gam jơh nùs jòi ală broă lơh dong kờl cau lơh broă  sa tăc bro phan lơh geh bơh sươn sre tŭ kàl tơnhàu gam mờr tus. Jơnau cih bơh Hương Lý dê, cau lơh ƀăo Anih Jơnau đơs Việt Nam tàm Tây Nguyên bè bơta geh ngan sầu riêng tàm kơnhoàl Krông Pach, do là dùl tàm ală tiah geh bă ù tam sầu riêng dờng ngan rlau jơh bơh càr Dăk Lăk dê.

Là dùl tàm ală cau lơh broă sa tam sầu riêng jŏ nam, plai sầu riêng lơh geh sùm pah nam bơh 25 tus 30 tấn plai pah kàl, ồng Nguyễn Văn Thăng ơm tàm xã Ea Yông, kơnhoàl Krông Pach, càr Dăk Lăk pà gĭt, ờ hềt nam lơi ồng mờ cau lơh broă sa tàm xã gơlơh kơlôi rơcăng ngan bè drà tă bro ai plai sầu riêng in bè tŭ do. Tài bơh kòp Covid-19 lơh bơtờp kal ke ngan neh lơh gơrềng uă tus broă jun pơndiang phan bơna kă bro. Gam bàr pe poh tai là sầu riêng mŭt tàm kàl tơnhàu tờm, mơya mờ bơta do digơlan cau kă phan ờ gŏ tus blơi bè ală nam lài tai. Bơta do geh lơh gơrềng tus bơta niam sầu riêng mờ hoàc hươr lơh sa ai cau tam in. Ồng Nguyễn Văn Thăng geh jơnau đơs bè do: Cau lơh broă sa kơlôi rơcăng ngan bè kòp bơtờp, ngan là broă jun pơndiang phan. Dilah broă jun pơndiang phan ờ gơtùi den là kal ke ngan ai làng bol lơh broă sa in, tài bơh do là phan bơna kă bro plai chi, dum là pal tăc mờ ờ gŏ di là gơtùi lời jŏ ờ. Ai plai nam do den ndrờm bè geh tơnhàu uă ngan sơl.

Tơl lồ sầu riêng kàl do ai priă cồng bơh 400 tơlak tus 800 tơlak đong

Yal lài gơtùi ală kal ke tàm broă tăc bro, lài mờ tơngai tơnhàu tơn, bàr pe Hợp tác xã neh bơcri priă blơi măy mok ơn prăp tơnơ̆ tŭ tơnhàu nàng tơn jŏ tơngai ơn prăp, tơrmù ƀà phan bơna gơtìp ồm, ờ niam. Pơnrơ ngan là Hợp tác xã Chi sa plai Krông Pach, tàm kơnhoàl Krông Pach, càr Dăk Lăk neh tă priă bơcri blơi măy plok, ơn mrềt phan bơna sầu riêng bal mờ bă ù ơnàng tus 2 sàu, pràn lơh plok geh 30 tấn sơnề pah ngai nàng tơnguh tŭ jiơ ơn prăp mờ ờ lơh gơrềng uă tus bơta niam bơkah phan bơna dê. Bơh hơ̆, Hợp tác xã gơtùi tơn jŏ tŭ tơngai tăc ai drà kă bro in tàm lơgar mờ tăc mờ lơgar ndai, tơrmù ƀà ală bơta gơrềng bơh kòp Covid-19 dê tus broă tăc bro sầu riêng. Ồng Lê Viết Chiến- Phó Kuang ătbồ Hợp tác xã Chi sa plai Krông Pach, kơnhoàl Krông Pach, càr Dăk Lăk pà gĭt: Tŭ do, broă jun pơndiang phan bơna lòt kă bro kal ke ngan, tàm tŭ hơ̆, kàl tơnhàu phan tam tàm càr Dăk Lăk kung uă ngan sơl, gơlam tus broă tăc bro ƀươn ngan gơtìp gơkòl. He ơm tềng hơđang do tŭ he lơh gơlik phan dùl anih tơn bè do den geh lơh gơlik geh bơta ƀươn ai làng bol in tŭ phan bơna kă bro plai chi ờ gơtùi jun pơnding lòt tăc den kung gam geh sơl tŭ tơngai nàng tăc bro tàm do tơn.

Kơnhoàl Krông Pach là tiah tam sầu riêng dờng ngan rlau jơh càr Dăk Lăk dê, nam 2021 kờp dŭ plai sầu riêng tơnhàu geh bơh kơnhoàl dê geh bơh 40 rbô tus 45 rbô tấn, priă lơh geh kờp dŭ là 2 rbô tơmàn đong. Bal mờ jơnau kờñ ờ lời ală anih lơh gơlik mờ kă bro phan bơna sầu riêng gơtìp gơkòl tài bơh kòp Covid-19, gơnoar ătbồ ală tiah tơnguh tai ală broă lơh bơsong mờ dong kờl cau tam sầu riêng, mpồl lơh sa kă bro tơnhàu mờ tăc bro phan bơna nàng kờñ bơtàu tơnguh lơh sa mơkung rơcăng sơndră kòp Covid-19 sơl dùl bă geh cồng nha. Mò Ngô Thị Minh Trinh- Phó Chủ tịch Ủy ban Nhân dân kơnhoàl Krông Pach, càr Dăk Lăk pà gĭt: Tềng đăp bơta gơbàn kal ke bơh kòp bơtờp dê den kơnhoàl kung rơcăng lài crơng gơs ală mpồl lòt làm bă tiah tàm ù tiah kơnhoàl dê. Kuơmàng, là ai tơl bơta ƀươn niam ngan rlau jơh ai cau kă phan in tus blơi, bol añ geh mpồl lòt lơh broă làm bă tiah tus dong kờl ală anih blơi nàng lam lơh ală broă lơh rơcăng sơndră kòp. Mơkung geh sră nggal dan mờ ală sở, gah sơnah lơh broă geh gơrềng bal, bè Sở Giao thông Vận tải, Sở Nông nghiệp mờ Phát triển Nông thôn, Sở Công thương ai tơl ală bơta ƀươn pik tơnhàu, jun pơndiang phan bơna sầu riêng.

Giă dùl kĭ plai sầu riêng sơntìl Dona gơmù dùl êt bơh 40 rbô tus 42 rbô đong

Jăt ồng Nguyễn Hoài Dương- Kuang ătbồ Sở Nông nghiệp mờ Phát triển Nông thôn càr Dăk Lăk dê yal, jơh gùt càr geh mờr 10 rbô lồ ù tam sầu riêng, plai nam do kờp dŭ lơh geh 100 rbô tấn. Bơh bồ kàl tơn, Sở do neh pơgồp bal mờ ală tiah geh broă rơndăp lơh nàng tăc bro mờ crơng gơs ală mpồl dong kờl cau lơh broă sa tàm jơh ală tŭ tơngai pik tơnhàu mờ tăc bro. Kuơmàng là dan mờ ală Bộ, gah lơh broă dà lơgar geh bơta lơh bal mờ ală mpồl tăc bro nàng geh đau drà tăc bro ai phan lơh geh bơh sươn sre in. Ồng Nguyễn Hoài Dương, đơs: Bol añ neh geh sră yal mờ Ủy ban Nhân dân càr dan mờ Bộ Công thương, Bộ Nông nghiệp mờ Phát triển Nông thôn tiah ătbồ ală drà kă bro điện tử halà ală anih tờm tăc bro nàng yal tơngĭt, tàm tơrbŏ mờ ală drà tăc bro, ală mpồl lơh sa kă bro bal mờ càr Dăk Lăk in gĭt geh plai lơh geh, tơngai kàl bơh ală phan bơna dê nàng tàm tơrbŏ, tăc bro ală phan bơna do. Tàm hơ̆, kuơmàng là sầu riêng mờ ƀơ.

Bal mờ broă dong kờl cau tam sầu riêng tăc bro phan bơna tàm lơgar bơh broă dong kờl Mpồl lơh sa kă bro lơh sră dan pà logo bal mờ sồ đal gĭt QR code ai broă tus bal “gùng ai lòt” nàng ƀươn ƀoài ală tŭ jun pơndiang, jàu dờp phan bơna kă bro là phan bơna sầu riêng bơh ală anih gròi sền kòp dê tŭ jun pơndiang, càr Dăk Lăk kung neh lơh tơl ală jơnau sồr ai 47 sồ tiah tam sầu riêng in nàng tŭ gơtùi ai lòt den geh tơl jơnau sồr tăc mờ lơgar ndai dipal mờ kơrnoat boh lam tus drà kă bro ndai.

Ồng Nguyễn Hoài Dương- Kuang ătbồ Sở Nông nghiệp mờ Phát triển Nông thôn càr Dăk Lăk 

Broă tăc phan geh lơh bơh broă lơh sa suơn sre gam gơtìp kal ke tài lơh aniai bơh kòp Covid-19 mờ plai sầu riêng bơh càr Dăk Lăk kung ndrờm bal sơl. Tàm hơ̆ uă ngan là tŭ kàl tơnhào tờm bơh ală sơntìl plai sầu riêng bơkah uă gam mờr tus. Kờp dŭ gùt càr geh mờr 10 rơbô lồ ù tam tờm sầu riêng, khà tơnhào geh nam do kờp dŭ geh 100 rơbô tấn. Bè hơ̆, broă lơh lơi nàng gàr niam broă tăc plai sầu riêng tàm bơta tŭ do? Cau ai tơngĭt jơnau đơs Việt Nam lùp ồng Nguyễn Hoài Dương, Kuang atbồ Sở Nông nghiệp mờ Phát triển Nông thôn càr Dăk Lăk nàng gĭt loh làng rơlao tai bè broă do. 

Ơ ồng, tơngai pa do geh ờ uă jơnau yal lài plai sầu riêng tàm càr Dăk Lăk gam gơmù khà priă “uă ngan” bè hơ̆ mùl màl bơta do bè lơi ơ ồng?

Ồng Nguyễn Hoài Dương: “Tŭ do ală sơntìl plai sầu riêng gam geh tơnhào mìng là sơntìl tam mờ gar, sơntìl tàm càr do mờ ală sơntìl geh khà priă tăc ờ uă. Broă do ală nam làng bol kung tơnhào kung tăc kung yòm mơya tŭ do tàm bơta kòp Covid-19 den tàng khà cau blơi, bơta pràn blơi tàm drà kă bro kung bè broă sền gròi nền nòn den tàng kung kal ke tàm broă tăc, den tàng kung geh ờ uă bơta kal ke sơl”.

Ơi, bè ồng neh đơs den mìng geh ală sơntìl plai sầu riêng tam mờ gar, sơntìl lơh geh is tàm lơgar geh khà priă ờ kas là tài kal ke tàm broă tăc tài gơtìp bơh kòp Covid-19. Mơya mùl màl tŭ do den geh uă ngan làng bol ờ sŭk bè broă tăc plai sầu riêng geh gơtìp kal ke jơh bè ală sơntìl plai sầu riêng neh geh tŭ geh tăc yòm ngan. Bè hơ̆, đah Sở Nông nghiệp mờ Phát triển Nông thôn neh kơlôi sơnơng tus mờ broă do lah ờ, mờ geh broă lơh lơi tus mờ broă do?

Ồng Nguyễn Hoài Dương: “Broă do Sở Nông nghiệp bol añ neh kơlôi sơnơng mờ gŏ ờ mìng plai sầu riêng mờ gam geh uă phan geh lơh bơh broă lơh sa suơn sre ndai tai, den tàng pơgăp mờ do 1 nhai, Sở neh geh sră nggal hòi jà jơh ală kơnhoàl, thị xã, ƀòn dờng kờp jơh ală bơta phan geh lơh bơh broă lơh sa suơn sre tơnhào geh bal mờ khà geh bal mờ kàl tơnhào, kờp dŭ ală phan geh lơh di gơlan tăc gơtìp kal ke den geh tơrgùm tus hờ Sở. Pa do bol añ neh geh sră nggal dan mờ UBND càr pơyoa tus Bộ Công thương, Bộ Nông nghiệp mờ Phát triển Nông thôn, Bộ Thông tin mờ Truyền thông là anih geh ală drà kă bro điện tử ha là yal mờ ală mpồl lơh sa kă bro pơgồp tăc bal mờ càr Dăk Lăk nàng gĭt geh khà uă, kàl tơnhào bơh ală plai nàng pơgồp bal tăc ală phan do. Tàm hơ̆, uă ngan là plai sầu riêng mờ plai ƀơ. Càr Dăk Lăk geh di pơgăp 100 rơbô tấn plai sầu riêng mờ 50 rơbô tấn plai ƀơ geh tơnhào tàm tơngai tus".

Bal mờ bơta kơ̆p gơn broă dong kờl bơh ală bộ, gah lơh broă dà lơgar, den să tờm càr Dăk Lăk kung pal geh ală broă lơh mùl màl, tềng đăp măt nàng dong kờl làng bol, mpồl lơh sa kă bro? Bè hơ̆ bơta mùl màl hơ̆ là ală broă lơh lơi ơ ồng?

Ồng Nguyễn Hoài Dương: “Bè đah Sở bol añ neh dan mờ càr 2 broă. Broă lài ngan là tơrgùm đơng lam ală tiah bơdìh mờ broă rơcang sơndră mờ kòp gơtờp pal geh broă dong kờl, ai tơl bơta niam nàng làng bol mờ mpồl lơh sa kă bro gơtùi pơgồp bal tăc ală phan geh lơh, tàm hơ̆ uă ngan là plai sầu riêng tàm ală kơnhoàl in geh ƀuơn niam. Ai loh làng broă lơh nàng tơl niam broă lơh jăt broă rơcang sơndră mờ kòp Covid-19 tàm broă pơn diang, blơi, klơm, pơn diang pal lơh jăt, mơya pal ai loh làng ờ gŏ di pal kơrian cau tus.

Tàm tơngu me ngai 29 nhai 7 lài do, Phó Thủ tướng ồng Lê Văn Thành kung neh geh sră nggal bơh chính phủ đơng lam ală càr là pal tơnguh ală broă lơh nàng gàr niam broă kă bro phan tàm bơta pal rơcang sơndră mờ kòp Covid-19 den ală càr lơh mùl màl jơh tài ală càr tam dră mờ kòp Covid-19 gam jŏ ờ gŏ di là ngai 1 ngai 2 mờ he geh ală broă đơng lam ờ niam den ală tiah gơtìp kal ke bè hơ̆ tus mờ ală mpồl lơh sa kă bro, ală cau kă bro ờ tus den broă tăc phan geh lơh gơtìp uă ngan kal ke. Hơ̆ là broă lài ngan. Broă dơ̆ bàr là đơng lam ală gah lơh sơnơm, gùng lòt pal geh ală kơrnoăt mùl màl bè broă pơn diang, bơta pơn diang mờ gàr niam gơwèt mờ ală mpồl lơh sa kă bro, cau măi rơndeh bal mờ ală cau tus bal pơn diang pal geh gàr niam ală bơta lơi. Nàng ai ală anih lơh broă tàm càr in ƀuơn tàm broă sền gròi, bơto sồr lơh di nền nòn nàng geh rơcang sơndră mờ kòp gơtờp mờ gàr niam broă kă bro, pơn diang geh lơh ƀuơn niam. Dơ̆ là bàr broă tờm mờ ală sră nggal pơyoa tus ală càr ală anih tờm kă bro gùt lơgar nàng geh broă pơgồp bal tăc plai sầu riêng mờ ală phan ndai ai làng bol in”.

Ơi, dùl broă geh sền gròi tŭ do là di lah broă pơn diang phan kă bro geh niam den broă tăc plai sầu riêng mờ ală bơta phan geh lơh bơh broă lơh sa suơn sre đơs bal bơh làng bol dê geh tơmù bơta kal ke, khà priă tăc geh gàr niam. Jăt ồng, bơta kuơ màng ngan tŭ do là bơta lơi?

Ồng Nguyễn Hoài Dương: “Nàng ai tơl bơta niam ală mpồl lơh sa kă bro, cau kă bro gam gơtùi tus den pal geh kơrnoăt mùl màl bơh broă rơcang sơndră mờ kòp gơtờp bal mờ broă pơn diang, kă bro phan geh lơh bơh broă lơh sa suơn sre bè lơi. Broă do tàm ală tiah bè Krông Păc neh lơh niam, bŭ lah kơnhoàl do ờ hềt crơng gơs jăt chỉ thị sồ 16. Kơnhoàl do geh crơng gơs ală mpồl dong kờl pơgồp bal tăc. Bè mpồl hơ̆ geh ală kơrnoăt nàng tŭ cau tus blơi geh yal mờ gơnoar atbồ ƀòn lơgar loh làng mờ gĭt loh ală bơta mờ să tờm tus blơi là ală bơta lơi nàng gròi sền, yal broă lơh sơnơm lơh jăt ală broă rơcang sơndră mờ kòp gơtờp. Geh kơrnoăt lơh broă bơh broă pơn diang tơrgùm phan geh lơh bơh broă lơh sa suơn sre, klơm, pơn diang pal yal mờ ală gơnoar atbồ ƀòn lơgar nàng gròi sền gàr niam ờ do ờ dă tàm broă rơcang sơndră mờ kòp gơtờp.

Bơdìh hơ̆ tai, ală tiah kung yal mờ làng bol, ală hìu lơh sa, ală suơn tam phan in gĭt ală kơrnoăt hơ̆ nàng lơh jăt nền nòn nàng rơcang sơndră mờ kòp mờ geh pơn diang phan kă bro, ờ gŏ di ờ lơh jăt broă kơrian ờ ai cau kă bro, ờ ai mpồl lơh sa kă bro tus geh lơh aniai tus mờ broă kă bro làng bol dê. Broă do añ đơs là tơnơ̆ mờ tŭ UBND càr Dăk Lăk tơlĭk loh ală broă do den ală jơnau tơngĭt do geh yal loh làng tàm ală anih yal tơngĭt tàm càr mờ càr ndai nàng làng bol in gĭt, mpồl lơh sa kă bro in gĭt, tŭ hơ̆, cau kă bro wă mờ geh iang nùs tus nàng lơh jăt ală broă blơi, pơn diang di jăt mờ kơrnoăt geh ai”.

Ơi, dan ưn ngài ồng uă ngan!

Cau cih Hương Lý- Cau mblàng Lơ Mu K’Yến mờ Ndong Brawl