VOV4.K’ho- Là dùl tàm uă tiah bơh càr Dak Lak dê geh bơta pràn bè phan bơna tiêu, kơnhoàl Cư Kuin neh lơh ngan dan cih mat mờ geh dờp mat kă bro mpồl bal Tiêu Cư Kuin tàm nam 2016. Mơya, tơnơ̆ mờr 5 nam geh dờp mat kă bro do kung mìng gơ ơm tàm sră lơm gời, ờ hềt geh tŭ ngui nàng ngui geh cồng nha tơnguh uă priă lơh geh bơh tiêu dê bè jơnau kơ̆p kờñ..

Gùt kơnhoàl Cư Kuin geh rlau 4 rơbô 500 lồ tiêu, tàm hơ̆ geh mờr 3 rơbô 700 lồ tiêu lơh sa kă bro, tơnhào kờp bal lơh geh rlau 3 tấn 2 tạ dùl lồ, phan lơh geh kờp bal pah nam lơh geh rlau 11 rơbô tấn. Bơta pal đơs ngan là, phan bơna tiêu tàm do bơta niam, bơkah niam rlau pơndrờm mờ ală tiah ndai, khà gar tiêu jù khà 1 mờ khà kuơ màng uă ngan, geh drà kă bro kờñ ngan, den tàng bè hơ̆ tiêu tàm do sùm geh cau kă bro ai tai 10 % tàm giá blơi tiêu. Mờ jơnau kơ̆p kờñ lơh tơnguh tai ală priă lơh geh bơh tờm tiêu dê, nam 2016, kơnhoàl Cư Kuin neh dan cih mat geh cồng nha mat kă bro dờp tiêu Cư Kuin geh Cục sền gàr gơnoar geh ngui ƀồ tơngoh jak, Bộ Khoa học, Công nghệ dờp. Do là broă lơh dờng ngan tàm broă bơt bơtàu mat kă bro, mat kă bro phan bơna nàng tơnguh uă priă lơh geh bơh phan bơna lơh geh bơh gah lơh sa suơn sre tàm tiah do dê. Mơya tơnơ̆ 5 nam dan cih mat geh cồng nha den broă bơtàu tơnguh mat kă bro do kung gam ờ hềt mut ngui ai khat dùl bơnah phan bơna lơi in sơl. Mblàng bè jơnau gơbàn do, ồng Lê Văn, Kuang bàng Phòng Kinh tế Hạ tầng kơnhoàl Cư Kuin pà gĭt: Tiêu Cư Kuin mìng dan cih mat tàm lơgar den ală jơnau sồr bè bơta niam, bơkah mìng ngui tàm lơgar lơm, ai tăc tàm lơgar ndai sồr geh bơta niam, bơkah uă rlau den ờ hềt gơtùi ngui ờ. Ồng Lê Văn đơs:

Măt kă bro do mìng dan cih mat là mat kă bro tàm lơgar lơm, ờ gŏ di là mat kă bro dunia ờ. Mat kă bro tàm lơgar den he geh tơl mơya nàng tăc tàm lơgar ndai den  jơnau kờñ uă mờ kal ke ngan tàm pơr lòng mờ ală mat kă bro tiêu geh tiơng pơnrơ, bè: Tiêu Phú Quốc, Tiêu Vĩnh Linh…Ai broă wèt tus tàm lơgar ndai den gơkòl bơta gam jơng kah sơnơm sền gàr phan tam. Nàng ngui geh mat kă bro den bơta niam, bơkah tiêu dê pal niam mờ Phòng kinh tế Hạ tầng mìng atbồ bè gah kă bro lơm, ai jơnau sồr lơh gơlik den là bơh Phòng lơh sa suơn sre dê atbồ.

Cau lơh broă sa kơnhoàl Cư Kuin, càr Dak Lak pĭc tiêu nam 2021

Ai jat ồng Y Tong Bkrông, Phó Kuang atbồ Phòng Nông nghiệp mờ Phát triển Nông thôn kơnhoàl Cư Kuin đơs, tơnơ̆ tŭ dan cih mat kă bro geh cồng nha, Phòng bal mờ ală mpồl lơh broă ờs mờng bơyai pờ uă ơdŭ bơto pơlam bơta chài sơng ka sền gàr, lơh gơlik tiêu jat gùng dà lơh sa niam ai cau lơh broă sa in; hời rơ hời crơng gơs ală mpồl, câu lạc bộ bè tam tiêu kơ̆ kơljap nàng lơh tus broă crơng gơs ală Hợp tác xã bè tiêu sàng kloh…. Bulah kơnhoàl neh geh uă broă lơh ngan nàng bơtàu tơnguh mơya jơh ală cau lơh broă sa tam tiêu rah rài, ờ hềt geh bơta lơh bal, ờ hềt lơh gơlik geh ală  bơta kuơ dê kung gam ết ngan mpồl lơh sa kă bro khin cha ñă ntào lơh “cau dong kờl” tàm broă bơtàu tơnguh jat anih lơh gơlik bal phan bơna dê. Ồng Y Tong Bkrông đơs:

Digơlan mat kă bro tiêu là pal tơrgùm ală mpồl lơh broă bal, hợp tác xã tàm dùl anih nàng tơrgùm blơi phan bơna lơh tơl khà jat broă lơh geh priă lơh geh, mơya ală hìu bơnhă cau lơh broă sa lơi geh tơl bơta den hìu bơnhă hơ̆ sồng geh lam lơh, ai hìu bơnhă lơi ờ tơl bơta kung kal ke ngan mut lơh bal. Tài bơh tŭ lam lơh den sồr pal geh dùl ròt bơta kuơ bơh phan bơna dê mờ broă lơh bơcri priă là uă ngan.

Cau lơh broă sa kơnhoàl Cư Kuin, càr Dak Lak pĭc tiêu nam 2021

Gơ wèt mờ cau lơh broă sa tàm kơnhoàl Cư Kuin, bơh jŏ tờm tiêu neh ngan ngồn gơ gơs là tờm tam jŏ nam phan bơna cèng wơl cồng nha lơh sa uă dong cau lơh broă sa kơ̆ kơljap rài kis. Den tàng, làng bol gam lơh ngan wèt tus tam tiêu niam, bơkah kơ̆ kơl jap; rcang lài lơh bal nàng lơh gơlik geh ală phan bơna geh bơta niam, bơkah, gàr niam jơnau sồr bơh drà kă bro dê. Bơta mờ cau lơh broă sa kơ̆p kờñ là bơdìh mờ bơta lơh ngan bơt bơtàu mat kă bro tiêu Cư Kuin den gơnoar atbồ gam là rbàng tàm tơr bŏ bal nàng cau lơh broă sa mờ mpồl lơh sa kă bro lơh bal tam tiêu mờ tăc tiêu ngui mat kă bro nàng tơnguh priă lơh geh bơh tiêu dê. Ồng Nguyễn An Thạch, Chủ tịch Câu lạc bộ tiêu Cư Kuin pà gĭt:

Kơnhoàl neh lơh geh ù tiah pơlam sền gĭt tiêu den añ kung kơlôi sơnơng ngan, jơh nùs ngan nàng ai tiêu geh sră dờp nàng priă lơh geh bơh tiêu dê geh lơh jat tơl khà bơta niam, bơkah bơh tiêu mờ he lơh gơlik. Mơya, bơta geh ngan den cau lơh broă sa ờ hềt gơtùi lơh bal mờ ală mpồl lơh sa kă bro nàng bal mờ gơ̆p lơh bal. Hơ̆ là bơta kal ke mờ kơlôi sơnơng ngan rlau jơh bơh cau lơh broă sa dê den tàng añ kơ̆p kờñ là ală anih lơh broă, ală gah, sơnah lơh broă lơh ngan ai tơl bơta nàng cau lơh broă sa in gĭt geh kơrnoat boh lam nàng lơh gơlik geh phan bơna geh bơta niam, bơkah tŭ hơ̆ giá tăc tiêu geh gơguh uă.

Cau cih Hương Lý- Cau mblàng K’ Hạnh