VOV4.K’ho- Mờ bơta pràn, bơta ƀươn bè ală phan bơna lơh geh bơh sươn sre bal mờ ală gùng dà broă lơh, kơrnoăt dong kờl bơh càr dê, tơnơ̆ 3 nam lam lơh jăt, Broă lơh tơl xã dùl phan bơna OCOP tàm càr Dăk Lăk neh lơh geh uă cồng nha niam ngan, lơh gơlik bơta pràn lơh gơrề, đơs nền măt kă bro phan lơh geh bơh sươn sre càr dê.

Bal mờ kơphê, ka kau là dùl tàm ală phan bơna geh sền là phan tờm, bơta pràn bơh càr Dăk Lăk dê. Mơya ală nam lài do, ka kau càr Dăk Lăk dê ờ huan geh gĭt mờ mìng tăc tŭ phan ờ hềt geh lơh gơs niam. Priă lơh geh bơh phan bơna dê dùl êt ngan, ờ hềt ngui jơh bơta ƀươn tàm tiah ƀòn lơgar dê. Gŏ geh bơta ờ hềt niam hơ̆, ồng Trương Ngọc Quang- Kwang ătbồ Kông ty Trách nhiệm hữu hạn ka kau Nam Trường Sơn tàm xã Ea Na, kơnhoàl Krông Ana, càr Dăk Lăk neh sền gròi jòi jơnau kờñ tàm drà kă bro dê, bơcri priă blơi măy mok, phan ngui pa ngan nàng lơh gơlik geh ală bơna niam ngan bơh ka kau, bè: ƀòk ka kau ờs gơ lơm, ƀơ ka kau, kèu socola...Nàng đơs nền bơta niam, kông ty neh tus bal sền swì phan bơna OCOP kấp càr. Tus tŭ do, 3 phan bơna, geh: Ƀòk ka kau ờs gơ lơm, Kèu Socola jù, Kèu Socola dà toh bơh Kông ty dê lơh geh 4 nơm sơrmañ tàm kờp jơh khà 8 phan bơna pơnrơ ngan 4 nơm sơrmañ kấp càr. Ồng Trương Ngọc Quang- Kwang ătbồ Kông ty pà gĭt: Tơnơ̆ tŭ phan bơna bơh kông ty dê lơh geh sră cơng tàng OCOP 4 nơm sơrmañ kấp càr, hơ̆ kung là gùng dà nàng kông ty mŭt bal tàm ală hìu ràng tăc phan OCOP dê. Bơh ală hìu ràng tăc phan OCOP dùl bơnah tơngŏ bơta pràn jak kung bè bơta niam bơh phan bơna dê, bơh hơ̆ năc pin dờn mờ jờng rơ ngan. Bơh ală hìu ràng tăc phan OCOP do den phan bơna tus geh mờ tê cau ngui sa dê dùl bă uă rlau mờ mhar rlau.

Kông ty Ka kao Nam Trường Sơn tàm dơ̆ Pơrjum sền swì, săp sèng phan bơna OCOP kấp càr

 Jăt ồng Võ Văn Sơn là Kwang ătbồ Hợp tak xã lơh broă sa sươn sre drơng broă Thăng Bình, xã Cư Kty, kơnhoàl Krông Bông, càr Dăk Lăk dê yal: sră cơng tàng OCOP ai phan bơna in ngai sơlơ geh sền gròi, gơ gơs là bơta gơn kơnờm ngan ngồn ai ală cau tờm lơh sa, kă bro in. Ală phan bơna geh sră cơng tàng OCOP là dùl broă sền swì kuơmàng, dong phan bơna geh sền gàr bè bơta niam, rùp să, kơldung ơn prăp, jòi gĭt anih lơh gơlik mờ tơnguh bơta pràn tàm pơrlòng tàm drà kă bro. Cơng tàng tơngŏ loh làng ngan rlau jơh là phan bơna phe sàng goh HTB bơh hợp tak xã dê tŭ geh Ủy ƀan Ñân dân càr Dăk Lăk dờp là phan bơna OCOP 3 nơm sơrmañ, giă tăc gơguh tus 2 dơ̆ pơndrờm mờ lài, phan tăc bro kung gơguh bơh 200 tấn tus 400 tấn pah nam, cèng wơl bơta kuơ bè uă bơta ai hợp tak xã in kung bè ală cau lơh bal in. Ồng Võ Văn Sơn, yal: Lài do, phan bơna bè ờs ờ gŏ geh cau lơi gĭt ờ, kă bro kung kal ke ngan sơl, mơya bơh tŭ phan bơna geh sră cơng tàng OCOP tơnguh bơngă phan bơna dê tus dùl cơnđoà pa bè bơta niam, broă lơh phan bơna tŭ hơ̆ cau ngui sa ƀươn ƀoài đơs, gĭt gŏ, blơi mờ ngui sa phan bơna he dê. Do kung là bơta tam gơl să bơh phan bơna bè ờs bơh cau lơh broă sa dê tus phan bơna geh sră cơng tàng OCOP ală sơrmañ mơkung là tŭ niam nàng phan bơna bơh cau lơh broă sa dê bơh “drà ƀòn” lòt tăc “tàm drà dờng rlau”.

Phan bơna OCOP geh yal tơngĭt tàm Anih ràng tơlik, yal tơngĭt mờ tăc phan bơna OCOP Dăk Lăk

Ồng Nguyễn Hoài Dương là Kwang ătbồ Sở Nông nghiệp mờ Phát triển Nông thôn càr Dăk Lăk pà gĭt: Dăk Lăk tŭ do geh 46 phan bơna OCOP, tàm hơ̆, geh 8 phan bơna lơh geh khà 4 nơm sơrmañ, mờ 38 phan bơna lơh geh khà 3 nơm sơrmañ. Broă săc rwah, săp sèng, crăp sơrmañ ală phan bơna OCOp in là cơng tàng tơngŏ bè bơta niam, muh măt phan bơna dê. Bơta do pơgồp bơnah tơnguh uă bơta gĭt wă, kơnòl bơh làng bol dê, mpồl lơh sa kă bro dê tàm broă lơh gơlik, sền gàr măt kă bro bơh phan bơna OCOP dê kung bè gơnoar kuơ bơh cau ngui sa dê. Tơngai tus, gah lơh broă sa sươn sre geh pơgồp bal mờ gah lơh sa mờ măy mok mờ kă bro pơn jăt tai yal tơngĭt ală phan bơna OCOP neh geh tàm tiah do tus mờ cau ngui sa in tàm lơgar mờ tàm dunia. Ồng Nguyễn Hoài Dương, đơs: Broă tàm tơrbŏ kă bro phan bơna là broă lơh kuơmàng ngan rlau jơh tàm broă lơh bơ̆t bơtàu ală anih lơh gơlik phan bè phan bơna OCOP. Gĭt nền geh broă do, Sở Kông thương gam jun yal mờ Ủy ƀan Ñân dân càr in kĭ rơndăp broă lơh dong kờl tăc bro phan bơna OCOP. Rơndăp broă lơh do tŭ geh kĭ geh dong kờl jơh nùs nàng uă anih tăc phan bơna OCOp geh lơh gơs. Bơh hơ̆, tàm tơrbŏ mờ ală tiah, ală kơnhoàl ù tiah ƀòn lơgar tàm gùt lơgar nàng tăc bro phan bơna, dong phan bơna OCOP bơtàu tơnguh pràn kơldang tàm tơngai tus.   

Lơh ngai ai phan bơna càr dê geh dờp là phan bơna OCOP gam gơ gơs là bơta gơn kơnờm nàng lơh gơkờñ bơtàu tơnguh lơh sa ƀòn lơgar tàm càr Dăk Lăk. Bơta do kung lơh gơlik geh bơta tam gơl uă ngan ai bơ̆t bơtàu ƀòn lơgar pa in jăt gùng dà kơ̆ kơl jăp jŏ jòng bơh broă đơs nền bơngă ai phan bơna lơh geh bơh sươn sre càr dê in.

                              Cau cih Vũ Hương Lý- Cau mblàng Lơ Mu K’Yến