VOV4.K’ho- Tềng đăp bơta lơh bơtờp mhar ngan bơh kòp as sồt kơltau gơlik pơnời tàm rơpu, kơnrồ dê, càr Dăk Lăk gam lam lơh mhar broă cĭt vaccine nàng kơryan kòp, tơrmù hoàc hươr ai cau ròng phan tàm càr in.

Ồng Lê Văn Chín- Kuang ătbồ Anih Ròng phan mờ Lơh sơnơm phan ròng kơnhoàl Cư Kuiñ, càr Dăk Lăk dê pà gĭt, kòp as sồt kơltau gơlik pơnời lơh bơtờp kơnhoàl bơh ngai 8/6 pa do tàm xã Ea Ning mờ neh lơh bơtờp mhar ngan tus ală xã ndai tàm jơh gùt kơnhoàl. Tus tŭ do, kòp neh lơh bơtờp tàm 19 thôn, ƀòn tàm 8 xã, bal mờ mờr 50 nơm kơnrồ bơtờp kòp, tàm hơ̆ geh 42 nơm pal tơ̆p pơrgŭc. Tềng đăp bơta kal ke bơh kòp bơtờp dê, bơh gùl nhai 6 pa do tơn, Ủy ban Nhân dân kơnhoàl Cư Kuiñ neh yal kòp gơbàn tàm càr mờ tă priă rơcăng lài mờr 700 tơlak đong nàng blơi vaccine mờ dà sơnơm ƀồm gơ sơ̆t srah nting, bơyai lơh cĭt sơnơm mờ kơryan tiah gơbàn kòp. Ồng Lê Văn Chín, đơs: Anih Ròng phan mờ Lơh sơnơm phan ròng kơnhoàl dê geh bơyai lơh ƀồm sơnơm kơryan kòp tơn tàm anih geh ală tiah gơtìp kòp. Do là dùl bơta kòp pa den kờñ pal gĭt tơnguh uă broă là mblàng yal ai làng bol in, hòi jà làng bol tơ̆p pơrgŭc ală phan ròng bơtờp kòp do mờ geh bơta dong kờl bơh Dà lơgar dê, bè là Kơrnoat sồ 02 ai làng bol in. Mơkung dong kờl gơnoar ătbồ tiah do vaccine mờ dà sơnơm nàng cĭt rơcăng sơndră kòp, ƀồm sơnơm kơryan kòp ai ală tiah bơtờp kòp in.

Kuang bàng lơh sơnơm phan ròng ai mẫu xét nghiệm tàm kơnrồ pin bơtờp kòp

Kờp tus nggùl nhai 7 pa do, kòp as sồt kơltau gơlik pơnời tàm rơpu, kơnrồ neh lơh bơtờp tàm 76 hìu bơnhă làng bol dê tàm 9 kơnhoàl bơh càr Dăk Lăk dê. Kờp jơh khà phan ròng bơtờp kòp do là 135 nơm kơnrồ, tàm hơ̆ sồr pal tơ̆p pơrgŭc là 69 nơm mờ kờp jơh kơn jơ̆ rlau 12 tấn mờ nggùl. Bal mờ kơnhoàl Cư Kuiñ neh yal geh kòp, kòp do tàm kơnhoàl Krông Pach kung gam gơbàn kơn jơ̆ ngan sơl bal mờ rlau 60 nơm kơnrồ bơtờp kòp, 17 nơm neh pal tơ̆p pơrgŭc tĕ. Bulah ờ hềt yal geh kòp bơtờp tàm kơnhoàl, mơya kơnhoàl Krông Pach neh tă priă jền rơcăng lài nàng blơi mờr 7 rbô ding vaccine cĭt kơryan kòp mờ wàng se tàm ală xã geh bơta gơbàn kal ke bơh kòp dê.

Tàm 7 kơnhoàl gam wơl bơh càr Dăk Lăk dê, kòp bơtờp rah rài. Tềng đăp bơta do, uă hìu bơnhă ròng phan neh lơh broă bal, dong kờl jơh nùs kuang bàng lơh sơnơm phan ròng tus cĭt sơnơm rơcăng sơndră kòp. Ală anih ròng uă phan ròng neh rơcăng lài blơi vaccine rê cĭt ai rơpu, kơnrồ in mờ ờ gŏ ơm kơ̆p vaccine dong kờl. Ồng Nguyễn Quang Đức- Kuang ătbồ Anih Ròng phan mờ Lơh sơnơm phan ròng kơnhoàl Cư Mgar pà gĭt, tơnơ̆ tŭ tàm kơnhoàl geh tiah bơtờp kòp as sồt kơltau gơlik pơnời tàm rơpu, kơnrồ tàm 5 hìu bơnhă, anih lơh broă do neh bơyai lơh tơ̆p pơrgŭc 3 nơm kơnrồ gơtìp kòp kơn jơ̆ mơkung lam lơh ală broă lơh nàng gròi sền mờ rơcăng sơndră kòp. Ồng Nguyễn Quang Đức, đơs: Jơh gùt kơnhoàl tŭ do cĭt geh pơgăp 2 rbô ding vaccine, làng bol mìng tă is priă jền nàng blơi cĭt. Nàng cĭt rơcăng sơndră kòp vaccine do den cau ròng phan pal lơh sră cih mat mờ kuang bàng kấp xã in tus cĭt. Tềng đăp măt den Anih Ròng phan mờ Lơh sơnơm phan ròng kơnhoàl dê pơn jăt tai bal mờ ală xã, thị trấn gròi sền niam kòp bơtờp, pơlam bơsong di tŭ. Bơta dơ̆ 2, nàng rơcăng sơndră kòp do den pal sơlơ tơnguh tai broă lơh ròng siam, sền gàr rơpu kơnrồ, jăt sền mờ sền gŏ gờñ là sơm kòp mhar tơn. Mơkung pal lơh sàng goh ù tiah gùt dar, ƀồm sơnơm kơryan kòp tàm wàng ròng phan.

Lòt tơ̆p pơrgŭc kơnrồ kòn bơtờp kòp

Jăt ồng Thủy Lệ Vũ- Phó Kuang ătbồ Chi cục Ròng phan mờ Lơh sơnơm phan ròng càr Dăk Lăk dê yal, tus tơngai do, jơh gùt càr neh cĭt geh rlau 40 rbô ding vaccine rơcăng sơndră kòp as sồt kơltau gơlik pơnời tàm rơpu kơnrồ in. Nàng ai tơl bơta ƀươn ai làng bol in, Chi cục neh lùp mờ anih tăc sơnơm nàng tăc rlau 20 rbô 500 ding vaccine jun tus tàm hìu ràng tăc phan bơh Chi cục dê. Bal mờ hơ̆, Chi cục kung cribơyai mờ Ủy ban Nhân dân càr, dan tă priă jền rơcăng lài bơh càr dê nàng blơi tai vaccine dong kờl ai cau ròng phan in. Ồng Thủy Lệ Vũ, yal: Bol añ neh rơcăng lài dan priă jền bơh Ủy ban Nhân dân càr dê, den lơh ngan tàm tơngai gờñ ngan rlau jơh geh priă jền mờ jòi cau blơi vaccine nàng rê drơng ai làng bol in là cĭt rơcăng sơndră kòp. Broă lơh cĭt sơnơm rơcăng sơndră kòp là lơh nền tus broă kơryan kòp lơh bơtờp, tơnơ̆ hơ̆ den hơ̆ sồng gơ sơ̆t srah nting, ƀồm sơnơm kơryan kòp tàm tiah ơm kis mờ sền gàr ròng siam. Tŭ do, bơta gĭt wă bơh làng bol dê bè broă do là uă ngan mơkung neh rơcăng lài nàng blơi vaccine rê cĭt is, den tàng bơta kòp bơtờp tŭ do tàm càr là ờ huan đau ir mờ ờ gŏ geh bơta kal ke bè ală càr tiah đah tô ờ.

Kung jăt ồng Thủy Lệ Vũ yal sơl, tŭ do gam tàm tơngai gùl kàl mìu, ală bơta srah nting lơh gơlik kòp deh dùh rơ̆ rài ngan den tàng ƀươn ngan lơh kòp bơtờp uă. Den tàng bè hơ̆, bal mờ cĭt vaccine wil tơl, cau ròng phan kờñ pal sền ngăc lơh sàng goh wàng ròng; ƀồm sơnơm kơryan kòp tàm tiah ròng phan, gơ sơ̆t vector srah nting lơh gơlik kòp bè sơmack, rơhài; sơlơ ròng siam sền gàr niam phan ròng nàng tơnguh tai bơta pràn sơndră wơl mờ kòp ai rơpu, kơnrồ in.

Cau cih VOV Tây Nguyên- Cau mblàng Lơ Mu K’Yến