VOV4.K’ho- Ngai 25/5, Kuang đơng lam bồ Sở Nông nghiệp mờ Phát triển Nông thôn càr Dak Nông pà git, Sở gam lam lơh ală broă lơh sơlơ atbồ bơta niam sơntìl tờm mắc ca tàm càr. Jat hơ̆, Sở Nông nghiệp mờ Phát triển Nông thôn sồr, ală anih lơh gơlik, tac bro sơntìl tờm mắc ca pal yal loh làng tơl khà ngui jat jơnau sồr. Tơl khà ngui sơntìl tờm mắc ca tàm càr ờ gŏ di lơyah rlau tơl khà dà lơgar dê. Ală cau dùl nă să, mpồl lơh broă pal lơh jat nền nòn ală jơnau cih adat boh lam bè lơh gơlik, tac sơntìl tờm mắc ca. Lài mờ tŭ tac sơntìl tờm mắc ca, cau dùl nă să, mpồl lơh broă, mpồl cau pal pơyua jơnau yal tus Sở Nông nghiệp mờ Phát triển Nông thôn càr Dak Nông ală jơnau tơnggit bè anih tac, mat cau tờm anih tac halà cau ala mat di mờ adat boh lam, sồ điện thoại.

Cau mblàng K’Duẩn