VOV4.K’ho- Tềng đăp bơta yal lài bơh bơta trồ tiah ro kơnrañ nam do dê, bơh bồ nam tơn, kơnhoàl Dam Rong, càr Lâm Đồng neh rơcăng lài lam lơh ală broă lơh rơcăng sơndră trồ prang soăt dà, gàr niam ai ală tờm chi tam in, ngan là kàl lơh kòi kàl mrềt prang hòn kis niam mờ lơh geh cồng nha mờ bơta niam uă.

Lâm Đồng đơs is mờ jơh gùt ù tiah Tây Nguyên đơs bal gam mŭt tàm kàl prang, trồ tiah tơngai duh jŏ jòng mờ dà nàng tuh tờm chi tam in gam là bơta geh ală tiah sền gròi ngan. Tus tơngai do, kơnờm rơcăng lài ală broă lơh sơrlèt gan trồ prang soăt dà, dà tàm ală tơnau dơng dà tàm ù tiah kơnhoàl Dam Rong dê sền bal kung gam geh tơl jơnau kờñ tuh dà ai ală bă ù tam chi tam in.  

Tàm xã Dà Long, tus tŭ do, làng bol neh sih tam geh rlau 200 lồ kòi sre kàl mrềt prang mờ tŭ do tờm kòi gam tàm tơngai căt ntê. Bulah dà pơđì tàm ală rbòng dà tàm sre tàm ù tiah xã dê kung geh uă đau sơl mơya, gơwèt mờ ală jơng lŏ sre lồi tơnau dơng dà kung gam gơlik geh sơl jơnau ro kơnrañ soăt dà. Ồng Lơ Mu Ha Poh, Chủ tịch Ủy ban Nhân dân xã Dà Long pà gĭt: Bơh ngai pa rcăng tơn jơh kàl mìu tơn, gơnoar ătbồ xã neh dong kờl priă jền, hòi jà làng bol bơ̆t ală bơtơ̆t dơng dà jăt kềng gah ală dà dờng, dà croh nàng dơng dà. Ală rbòng dà kung neh geh ală mpồl đoàn viên, ơruh pơnu, ling klàng làng bol griăp ƀòn tus lơh niam wơl, tuah wàs jun dà rê tus ală tiah sih tam bơh làng bol dê sùm ờ tơl dà. Bal mờ hơ̆, xã kung sùm jăt sền mờ geh broă rơndăp lơh tam pà dà tuh gơwèt mờ ală bơtơ̆t dơng dà tàm ù tiah do dê nàng bồ tô mờ lồi rbòng dà ndrờm geh dà lơm nàng ngui tàm broă lơh sa.

Ủy ban Nhân dân xã kung neh jàu kơnòl ai tơl anih lơh broă ờs mờng in, tơrgùm đơng lam làng bol rơcăng lài ngui geh cồng nha dà sa sơngka sền gàr chi tam, ngan là ờ gŏ di lời ờ tơl dà tuh phan tam in tàm ală tiah lơh sa sươn sre tơrgùm bal, ngan là ală bă tiah tam kơphê, tờm chi sa plai gơ in cồng nha mờ bơta niam uă.         

Jăt khà kờp bơh Phòng Nông nghiệp kơnhoàl Dam Rong, càr Lâm Đồng dê, tŭ do jơh gùt kơnhoàl geh jơh ală bă ù sih tam rlau 15 rbô lồ; tàm hơ̆, kàl mrềt prang nam do geh rlau 1 rbô lồ kòi; tơngời mờ biăp rbaì, phan sa; kơphê, gam wơl là tờm chi jŏ nam. Jơh gùt kơnhoàl gam geh 81 nơm tơnau dơng dà dờng di mơ mờ dềt, ai dà tuh rơcăng lài ai 8 rbô 419 lồ chi tam in. Uă ngan ală bơtơ̆t tơnau dơng dà geh bơcri priă lơh mờ kes priă dà lơgar dê mờr dùl ròt bal sơl bơh bồ tô tus dà tus rbòng dà, ai dà tuh ai 830 lồ kòi in, rlau 230 lồ tơngời, biăp rbài ală bơta kàl mrềt prang in mờ rlau 3 rbô 500 lồ chi tam jŏ nam in. Bơh lòt sền, đơs bơh tiah do dê, dà tàm ală bơtơ̆t dơng dà tàm ù tiah kơnhoàl Dam Rong sền bal là ai tơl dà tuh ai pơgăp bơh 80- 90% bă ù tam chi tam tàm tiah do in.

Ồng Nguyễn Văn Chính, Kuang ătbồ Phòng Nông nghiệp kơnhoàl Dam Rong pà gĭt: Nàng rơcăng lài dà tuh ai chi tam in tàm kàl prang nam do, uă broă lơh neh mờ gam geh ală gah lơh broă ờs mờng bè ală tiah bơh kơnhoàl Dam Rong dê lam lơh.           

Nàng geh tơl dà tuh ai broă lơh sa in, Ủy ban Nhân dân kơnhoàl sồr anih lơh broă ờs mờng, ală xã, thị trấn bơh bồ kàl tơn mblàng yal, bơto pơlam làng bol ngui dà tềm pềr, dipal bè tuh dà tàm pơdar, gàr bơta sùh ìo; tơnguh uă bơta gĭt wă sền gàr brê, sền gàr broă lơh bơtơ̆t dơng dà; kơryan ngan ală broă lơh lơh tìs broă sền gàr dà ơn pơdơng. Bal mờ hơ̆, kơnhoàl Dam Rong kung neh hòi jà làng bol lơh broă sa rơcăng lài tam gơl bàr pe lŏ sre sùm gơtìp soăt dà nàng tam ală tờm chi tam ndai ngui dùl êt dà rlau nàng kờn pleh gơbàn hoàc hươr tài bơh trồ prang soăt dà tàm lồi kàl in.

Ală tiah, ală anih ătbồ, lơh mờ ngui ală bơtơ̆t dơng dà sùm lòt sền, jăt sền bơta dà ia bơh ală bơtơ̆t dơng dà dê, rơcăng lài gùng dà ơn pơdơng dà, tam pà dà dipal lài mờ tŭ soăt dà gơbàn. Ătbồ niam brong ai dà bơh bồ tô dà mờ ală tơnau dà tuh dà, ngan là ală brong dà tuh dà rềp tiah bồ tô, ờ gŏ di lời rơhiăt dà, pơhì pơhà dà, gàr tơl dà tuh tus lôì kàl tuh in. Lam lòt tuah wàs, pès jì jơh nhơ̆t, wàs rbòng dà, lơh geh gùng dà in lòt, hiòng dà in hòr, bơsong tơn ală anih gơtìp ờ niam. Anih lơh broă ờs mờng pơgồp bal mờ UBND ală xã, thị trấn lam lòt sền broă lơh tam pà dà; sồr ală mpồl lơh broă bal ngui dà geh broă rơndăp lơh pà dà, tuh dà dipal, geh gùng dà sơndră wơl tŭ dà gơtìp ờ tơl, gàr tơl ală bơta nàng gơtùi ai măy ƀồm dà ing tuh dà tŭ kờn...Mờ bơta rơcăng lài lam lơh ală broă lơh rơcăng sơndră trồ prang soăt dà, kơ̆p kơnờm, làng bol lơh broă sa kơnhoàl Dam Rong geh dùl kàl lơh sa geh cồng nha uă.

            Jăt Sră báo Lâm Đồng- Cau mblàng Lơ Mu K’Yến