VOV4.K’ho- Đah ròng phan mờ lơh sơnơm phan ròng càr Quảng Ninh pà gĭt, tàm càr do pa gŏ jơi kòp pluh iar, ơda A/H5N8 sơnrờp ngan geh dờp tàm lơgar Việt Nam. Lài mờ hơ̆, bơh ngai 29 nhai 6, wàng ròng iar bơh bi Nguyễn Huy Long, kis tàm ƀòn Bãi Cát, xã Vũ Oai, ƀòn dờng Hạ Long, càr Quảng Ninh neh geh gŏ iar gơtìp chơ̆t ni sơna mờ chơ̆t gơguh rơhời mờ khà hoàc huơr tus rơlao 200 nơm.

Anih tờm broă lơh drơng ala kỹ thuật lơh sa suơn sre ƀòn dờng Hạ Long neh ai 3 phan xét nghiệm pà gŏ cồng nha geh gŏ mờ virus kòp pluh iar, ơda A/H5N8. Do là jơi kòp pluh sơnrờp ngan geh dờp tàm lơgar Việt Nam. Tàm dunia neh geh tŭ geh dờp ală tiah geh jơi kòp pluh A/H5N8 tàm châu Âu, lơgar Lo, Trung Đông mờ tah tô châu Phi. Geh 7 nă cau tàm lơgar Nga geh sền geh gŏ mờ jơi virus kòp pluh A/H5N8 tài gơtờp bơh iar, ơda gơtìp kòp.

Cau mblàng Ndong Brawl