VOV4.K’ho- Ờ hềt tus 1 nhai bơh tŭ sơn đờm gơbàn, kòp as sồt kơltau gơlik pơnời tàm rơpu, kơnrồ tàm Gia lai neh bơtờp tus 35 xã, sơnah ƀòn, thị trấn tàm 7 tiah tàm gùt càr. Chi cục lơh sơnơm phan ròng càr Gia Lai pà git, kờp tus ngai 23/6, càr geh 846 nơm rơpu, kơnrồ bơh rlau 500 hìu bơnhă làng bol tàm 35 xã, gơ wèt 6 kơnhoàl mờ ƀòn dờng Pleiku gơbàn kòp. Tàm hơ̆ 31 nơm neh chơt, kờp dŭ hoàc huơr git nđờ rhiang tơlak đông.

Kơnhoàl Chư Sê mờ 10 tiah geh kòp mờ kơnhoàl Kông Chro mờ 9 tiah geh kòp là ală tiah geh kòp bơtờp mhar ngan rlau jơh. Chi cục lơh sơnơm phan ròng càr Gia Lai neh pơgồp bal mờ ală tiah hòi jà làng bol blơi mờ cit rlau 500 rbô ding sơnơm vaccine rơcang sơndră kòp rơpu, kơnrồ in; pà rlau 4 rbô lít dà sơnơm ƀồm lơh kloh khuẩn tàm ală tiah geh kòp. Chi cục lơh sơnơm phan ròng càr Gia Lai đơs là, kòp as sồt kơltau gơlik pơnời digơlan pơn jat tai bơtờp tàm uă tiah, den tàng làng bol mhar lam lơh ală broă lơh rơcang sơndră kòp nàng sền gàr mpồl phan ròng 4 jơng.

Cau mblàng K’Duẩn