VOV4.K’ho- Jat Chi cục ròng phan mờ lơh sơnơm phan ròng càr Gia Lai yal, kờp tus 3 jơ mho ngai 07/9, gùt càr geh mờr 15 rbô nơm kơnrồ geh sơm bời kòp as sồt kơl tau gơlik pơ nời. Bơh tơngai gơbàn kòp, tus tŭ do gùt càr Gia Lai geh rlau 20 rbô nơm kơnrồ bơh rlau 12 rbô hìu bơnhă làng bol dê gơbàn kòp as sồt kơltau gơlik pơ nời. Tàm hơ̆, geh mờr 2 rbô nơm kơnrồ neh chơt mờ tơp pơrguc tài bơta pràn sơndră kòp gơmù halà gơbàn ală kòp ndai bè as sồt klờm soh, gơ ñồm mhàm ƀơ̆.

Mpồl lơh broă geh gơnoar bal mờ làng bol ală tiah neh sơm bời kòp ai mờr 15 rbô nơm kơnrồ in. Neh geh 34 xã bơh 9 kơnhoàl, thị xã, ƀòn dờng ờ gam phan ròng 4 jơng gơbàn kòp, tàm hơ̆ geh 3 xã A Dơk, Trang mờ Ia Băng (kơnhoàl Đăk Đoa) neh sền sơ wì geh tơl bơta nàng yal jơh kòp. Jat Chi cục ròng phan mờ lơh sơnơm phan ròng càr Gia Lai pà git, nàng gơtùi geh tềl tơnggŏ niam do, gah lơh sa suơn sre càr Gia Lai neh lam lơh ring bal uă broă lơh rơcang sơndră kòp as sồt kơltau gơlik pơ nời tàm tơngai lài.

Cau mblàng K’Duẩn