VOV4.K’ho- Bơh nam 2018 tus tŭ do, rlau 1 rbô 700 lồ tiêu bơh tiah tờm tam uă ngan tiêu Chư Pưh, càr Gia Lai dê gơtìp chơ̆t tài bơh tu kòp lơh aniai, kra mờ trồ prang soăt dà ờ gơtùi dong kờl kis wơl tai. Bơta do, neh lơh gĭt nđờ rbô hìu bơnhă làng bơl bòl glar kal ke ngan tài bơh gơtìp gơ ơm tàm bơta dồs kơnòl uă ngan. Nàng tơrmù ƀà hoàc hươr, tiah tam uă tờm tiêu Chư Pưh neh pơlam gùng dà bơ̆t bơtàu tiah mờng tam phan tơrgùm tờm chi sa plai gơ jăt bal mờ lơh bal lơh sa jăt ală anih, bơta niam dong tơnguh tai priă lơh geh ai cau lơh broă sa in, bơtàu tơnguh wơl rài lơh sa bơh jŏ sùm gơtìp ờ pràn bơh tờm tiêu.

Hìu bơnhă ồng Phan Văn Qúy ơm tàm thôn Thiên An, xã Ia Blứ, kơnhoàl Chư Pưh, càr Gia Lai là dùl tàm ală hìu bơnhă bơh sơnrờp lơh geh cồng nha kơnờm bơh tam gơl tờm tiêu kra jŏ nam tus tam tờm plai bung kơmhò tơlir mờ kroăc sành. Tơnơ̆ pe nam tam mờ sơngka sền gàr, sươn chi ơnàng 3 lồ bơh hìu bơnhă dê neh geh plai nam sơnrờp. Dùl tấn plai bung mờ 20 tấn plai kroăc tàm kàl tơnhàu dơ̆ sơnrờp, neh lơh geh priă jền ai hìu bơnhă ồng Qúy in rlau 240 tơlak đong; jơnhoa rlau uă ngan pơndrờm mờ priă lơh geh bơh tiêu lài do. Ồng Phan Văn Qúy, đơs: Giă tăc bro tŭ do di đau sơl, pơndrờm mờ tiêu giă kung gơmù ir, tŭ do tam gơl tam ală tờm chi do den giă kung di đau sơl. Plai bung den dùl kĭ pơgăp 40 rbô đong, ai plai kroăc sành den dùl kĭ bơh 10 rbô tus 12 rbô đong, bơh sơnrờp den añ gŏ lơh sa tờm kroăc, tờm plai bung là niam rlau mờ tiêu uă ngan.

Chi sa plai gam là gùng lòt pa bơh cau lơh broă sa kơnhoàl Chư Pưh dê

Gơwèt mờ làng bol jơi bơtiàn kòn cau dùl êt nă cau ờ huan geh priă jền, kơnhoàl Chư Pưh neh lời uă bơta pràn dong làng bol rơhời tam gơl. Bơh rơndăp broă lơh ƀòn lơgar tiah kơh bơnơm tơngai bơh nam 2019- 2025, kơnhoàl Chư Pưh neh dong kờl sơntìl, phơng sih, sơnơm sền gàr phan tam mờ crăp ală ding dà tuh ai hìu bơnhă bi Rah Lan Phương in tàm thôn Plei Thơ Ga B, xã Chư Đôn tam gơl bơh 5 sào tờm tiêu gơtìp tu kòp lơh aniai chơ̆t jơh tus tam sơntìl plai bung pơrhê Hoà Bình dê. Tŭ do, tàm nam dơ̆ 2, plai bung kis dờng niam ngan mờ neh geh bơkàu geh plai nam sơnrờp. Bi Rah Lan Phương kờp dŭ cồng nha lơh geh bơh tờm plai bung digơlan lơh geh rlau 30 tấn tàm dùl lồ, bal mờ giă tŭ do pơgăp 40 rbô đong dùl kĭ lơh geh priă jền sùm rlau pơndrờm mờ tam tiêu lài do. Bi Rah Lan Phương, đơs: Plai bung hìu añ dê tam 2 nam do, digơlan mŭt tàm nam dơ̆ 3 geh ai priă jền uă rlau, ưn ngài mpồl cau dong kờl bơto pơlam lơh broă sa sươn sre kơnhoàl Chư Pưh dê neh dong kờl hìu bơnhă añ lơh geh priă jền sùm.

Ồng Nguyễn Long Khánh, Kuang ătbồ Phòng Nông nghiệp mờ Phát triển Nông thôn kơnhoàl Chư Pưh dê pà gĭt: tŭ do, kơnhoàl neh lam lơh rơndăp broă lơh lùp kờp, sền swì ù tiah nàng lơh bơnàng jă bơ̆t bơtàu tiah sùm tam phan tơrgùm bal tàm kơnhoàl. Bal mờ hơ̆, gĭt loh tơl kơnhoàl ù tiah dipal mờ mpồl chi tam lơi den geh pơlam gùng dà làng bol in sùm tam phan tơrgùm bal jăt gùng dà lơh bal lơh sa mờ lơh geh ală tơl khà, bơta niam. Jăt rơndăp ù tiah pơlam gùng dà bơh kơnhoàl dê tŭ do, ală xã: Ia Le, Ia Blứ, Chư Đôn là ală tiah geh ù tiah gơdờp nàng tam tờm chi sa plai geh sơnề, ngan là tờm plai bung kơmhò tơlir mờ kroăc geh ai priă jền lơh sa uă.

Nàng tơnguh bơta niam chi tam cèng wơl priă jền lơh sa, ngan là mpồl chi sa plai, tơngai lài, kơnhoàl neh pơgồp bal broă lơh OCOP, VietGap, GlobalGap gơ jăt bal mờ pơlam gùng dà tam gơl rơndăp tăp sèng chi tam. Kơnờm bè hơ̆ mờ tus tơngai tŭ do, tàm ù tiah kơnhoàl dê neh geh 2 phan bơna plai chi là sầu riêng mờ Na thái lơh geh tơl jơnau sồr OCOP 3 sơrmañ jăt gùng dà lơh sa hữu cơ. Ồng Khánh yal tai: Kơnhoàl kung neh lùp kờp sền swì bơta niam ù tiah nàng lơh bơnàng jă ală tiah sùm tam phan tơrgùm bal nàng gĭt nền ală bă ù tiah gơdờp mờ ală mpồl chi tam lơi den lam bơyai lơh sùm tam chi tơrgùm bal jăt tơl kơnhoàl ù tiah, tơl tiah lơh sa. Bơh hơ̆ pơlam gùng dà ai làng bol in lơh sa jăt gùng dà lơh bal nàng geh sră cơng tàng tơl jơnau sồr bơta niam.

Gah lơh broă sa sươn sre kơnhoàl Chư Pưh dong làng bol bơtàu tơnguh chi sa plai

Broă dong cau lơh broă sa tam gơl mờ kơ̆ kơl jăp tiah sùm tam chi sa plai tàm ală bă ù tam tiêu gơtìp trồ prang soăt dà, tu kòp lơh aniai mờ tiêu neh kra ờ huan geh cồng nha bơh sơnrờp neh tơngŏ geh cồng nha, cèng wơl priă jền uă ngan ai làng bol in, bơh hơ̆ pơgồp bơnah gơmù rƀah, ngan là làng bol jơi bơtiàn kòn cau dùl êt nă cau tàm tiah sar lơgar ngài bơh tiah tam uă ngan tiêu Chư Pưh dê. Mờ rlau 600 lồ chi sa plai geh tam gơl bơh tờm tiêu, neh mờ mờr ai tơnhàu, cau lơh broă sa kơnhoàl Chư Pưh, càr Gia Lai gam rơhời sơrlèt gan tŭ tơngai kal ke. Bal mờ ală bă ù tam gơl, ală mpồl lơh sa kă bro gah broă lơh sa sươn sre kung gam bơcri priă tàm kơnhoàl tàm ală sươn chi sa plai dờng, lam Chư Pưh gơ gơs là tiah tờm kuơmàng tam uă tờm chi sa plai bơh càr Gia Lai dê.

Cau cih Hoàng Qui- Cau mblàng Lơ Mu K’Yến