VOV4.K’ho- Tơnơ̆ tơngai gơmù giă uă ngan, bồ nam do, tiêu tăc geh 70 rbô đong tàm dùl kĭ mờ gơ ơm sùm bè hơ̆ tàm bàr pe nhai do. Tŭ do, cau lơh broă sa tàm uă kơnhoàl bơh càr Gia Lai dê neh sơnđờm tam wơl tiêu. Mơya, gah lơh broă sa sươn sre tàm tiah do bơto sồr làng bol pal kơlôi sơnơng kờp dŭ kơrhia ngan nàng kờñ lơh geh cồng nha tàm broă lơh sa mờ gơmù ƀà rềs àr lơh aniai.

Bal mờ cau tàm hìu bơnhă lòt tus hờ mpồng drà tiah đah jum kơnhoàl Chư Sê, càr Gia Lai dê nàng rwah blơi tiêu sơntìl, bi Nguyễn Trọng Huấn ơm tàm thôn Ia Sâm, xã Ia Roong, kơnhoàl Chư Sê, pà gĭt: Kàl do, hìu bơnhă bi lơh nền tam pa 5 sàu tiêu. Jăt bi Huấn đơs, giă tiêu gar ơm tàm khà mờr 70 rbô đong dùl kĭ bè tŭ do, cau tam digơlan lơh geh cồng pơgăp 100 tơlak đong dùl lồ. Bi Huấn kung đơs sơl là, tơnơ̆ uă nam tam gơl bơh tam tiêu tus tam tờm phan tam lơyah ngai, ù tiah neh geh lơh niam wơl dùl bơnah lơi, kòp gơdram lơh aniai gơwèt mờ tờm tiêu tàm ù kung neh gơmù đau. Do là ală bơta pal geh niam ngan nàng tam pa. Mơya, nàng tơrmù rềs àr lơh aniai, bi Huấn mìng tam dùl êt tàm bă ù dềt lơm, dilah giă tiêu gơguh sùm den bi geh rề ơnàng tai bă ù nàng tam tàm ală kàl pơn jăt tai. Bi Nguyễn Trọng Huấn, đơs: Cau lơh broă sa tàm do mìng kơnờm tàm tờm tiêu mờ tờm kơphê lơm gơ ì. Tŭ do, kơphê den ờ kas ngan, giă tiêu gơguh đau dùl êt den làng bol tam wơl tiêu. Tŭ do, añ tam 500, 700 tờm gơ lài, dilah gơtùi den geh tam tai. Dilah giă tiêu gơ ơm kàr do, tus 100 rbô đong den rài kis làng bol dê kung là neh niam rao.

Làng bol lòt tus drà tiah đah jum kơnhoàl Chư Sê nàng rwah blơi tiêu sơntìl

Rơ̆p pa tam sir 3 lồ tiêu tàm bơrlŭ bal tàm sươn dơm chi gáo 1 sơnam bơh hìu bơnhă he dê, ồng Lê Đình Huấn ơm tàm thôn An Điền, xã Ia Blang, kơnhoàl Chư Sê pà gĭt, do ngan là dùl broă lơh nàng ồng tơrmù bà rềs àr lơh aniai tŭ tam wơl tờm tiêu. Bơdìh mờ broă tam tàm bơrlŭ bal mờ tờm chi tam ndai, ồng Huấn gam ngui wơl ală jrong tiêu bơh lài, blơi sơntìl tiêu ndung nàng gơmù ƀà priă tă bơcri in. Jăt ồng Huấn đơs, sơntìl tiêu ndung giă  10 rbô đong dùl tờm, ờ kas rlau 5 rbô đong pơndrờm mờ sơntìl tiêu ác, mờ cồng nha ndrờm gơ̆p bal. Bal mờ tơl jrong tiêu geh 2 tờm sơntìl, bal mờ jrong mờ phơng sih, kờp jơh priă tă tam bơh 1 lồ tiêu tŭ do dê là pơgăp 70 tơlak đông. Ồng Lê Đình Huấn đơs: Añ tam tàm bơrlŭ bal mờ tờm phan tam ndai, den bơcri priă do kung ờ huan kơn jơ̆ ir. Tŭ do, tiêu ác ờ huan ngan geh den tàng añ tam gơl wơl tus tam tiêu ndung, sơntìl ờ kas rlau mờ cồng nha kung geh sơl tài bơh rơyas gơ tŭ tam geh tàm ù den là di ngan đau.

Ồng Huấn tam tàm bơrlŭ bal tiêu tàm sưon chi gáo dùl sơnam

Ồng Hoàng Phước Bính, Phó Kuang ătbồ Tơrgùm ală mpồl lơh tiêu Chư Sê, càr Gia Lai dê pà gĭt: bơta ƀươn bơh cau lơh broă bơh kơnhoàl dê tŭ do là neh geh uă mờng chài tàm broă tam tờm tiêu. Bal mờ hơ̆, tơnơ̆ jơnau kah sùm ngan bè jơnau tiêu chơ̆t dùl ròt tài bơh 2 kòp lơh aniai, ơn phơng uă ir mờ rề ơnàng bă ù tam dùl bă ur ar ir lài do geh dong cau lơh broă kơrhia rlu tàm dơ̆ tam pa do. Jăt ồng Hoàng Phước Bính đơs, tàm ală tŭ tam pa, cau lơh broă sa kơnhoàl dê kung kờñ pal kah ală bơta tơnơ̆ do: Jăt bơta bơto sồr bơh bol añ dê gơwèt mờ làng bol, lài ngan là ờ gŏ di tam pa wơl tàm bă ù tam tiêu neh chơ̆t, pal rwah ù gơdờp mờ tờm tiêu; rwah sơntìl niam, gĭt anih lơh sơntìl loh làng; tam tàm tờm chi lơh jrong kis, pal lời nhơ̆t tàm sươn, gul tờm, bañ lơh ƀồng tờm tiêu, ƀươn gơtìp gơbam dà, lơh gơbàn tu kòp lơh aniai. Bơta tai là pal ngui ală ding tuh dà tềm pềr, ƀồm dà bè mìu phĭ, ƀồm dà ntờč tềng tờm tiêu; pal tam jăt gùng dà hữu cơ, sinh học nàng sươn tiêu kis dờng pràn rlau.

Cau lơh broă sa tam tiêu tàm bơrlŭ bal mờ ngui wơl jrong tiêu bơh lài nàng gơmù ƀà rềs àr, gơmù ƀà priă tă lơh

Ồng Nguyễn Văn Hợp- Kuang ătbồ Phòng Nông nghiệp mờ Phát triển Nông thôn kơnhoàl Chư Sê đơs là, tŭ do, kờp jơh bă ù tam tiêu tơngai neh geh plai gơ ai sa tàm kơnhoàl là rlau 2 rbô 900 lồ. Digơlan tàm kàl do, bă ù tam pa tờm tiêu geh gơguh tus gĭt nđờ rhiang lồ. Jăt ồng Hợp yal, bơdìh mờ ală jơnau bơto sồr bơh Tơrgùm ală mpồl lơh tiêu dê, làng bol kung kờñ pal kah tus broă lơh bal tam mờ lơh sa jăt ală jơnau sồr mờ mpồl lơh sa kă bro mờ ală drà kă bro dê sồr. Ồng Nguyễn Văn Hợp, đơs: Tơngai do, broă tam tiêu geh bơta tam gơl niam. Bă ù bơtờp kòp neh geh kơryan, giă tăc bro kung gơguh đau sơl. Do là bơta ƀươn nàng làng bol in tam tiêu. Mơya, añ kung bơto sồr làng bol, lài ngan là sơngka sền gàr ală sươn tŭ do gam geh nàng gơ hòn kis niam. Dilah làng bol tam pa den đòm jăt, ngui bơta jak chài pa tàm broă lơh sa, lơh bal mờ mpồl lơh sa kă bro nàng tăc bro phan bơna den hơ̆ sồng lam lơh sa kơ̆ kơl jăp jŏ jòng geh.

                          Cau cih Nguyễn Thảo- Cau mblàng Lơ Mu K’Yến