VOV4.K’ho- Ală nam rềp ndo, biăp, bơkàu mờ chi sa plai geh sền là mpồl pràn, ƀươn bơh càr Gia Lai dê tàm broă bơtàu tơnguh lơh broă sa sươn sre. Càr kung gam rơhời lơh jăt Rơndăp broă lơh bơtàu tơnguh tam biăp, bơkàu mờ chi sa plai tus nam 2030, kơlôi tus nam 2040 nàng rơhời tơnguh uă priă jền lơh biăp, bơkàu mờ plai chi. Bơh hơ̆, tơnguh uă priă jền lơh sa tàm dùl bă ù bal, crơng gơs ală broă lơh nhơl chờ lơh broă sa sươn sre, lơh gơlik geh tai broă lơh broă sa. Nàng lơh geh cồng nha rơndăp broă lơh do, gah lơh broă sa sươn sre mờ ală tiah gam lơh mhar bơtàu tơnguh jơh bal bè bă ù bal mờ khà phan lơh geh, kuơmàng là sền gròi uă tus lơh sa jăt ală anih lơh gơlik phan. Jơnau cih tơnơ̆ do geh đơs bè bơta do, jà...

 Bơcri priă bơh sơnrờp nàng tam rơpung jàl mờ priă tă gơguh tus gĭt nđờ rhiang tơlak đong là bơta lơh nền khin cha ngan bơh bi Nguyễn Đình Thanh dê ơm tàm thôn Hồ Nước, thị trấn Chư Sê, kơnhoàl Chư Sê, càr Gia Lai. Nàng lơh gơs gơtùi sươn rơpung jàl geh bă ù ơnàng 1 sàu, hìu bơnhă bi Thanh neh tă priă bơh sơnrờp là 260 tơlak đong nàng blơi sơntìl rơpung jàl Nhờk dê, lơh hìu glòm mờ ală măy crăp tuh dà is. Priă tă bơcri uă mơya cồng nha cèng wơl uă ngan. Kờp bal dùl sào rơpung jàl gơ ai 3 tấn plai, pah nam tam geh 4 kàl. Mờ giă tăc bơh 40 tus 60 rbô đong dùl kĭ, tơnơ̆ pah dơ̆ tơnhàu, hìu bơnhă bi Thanh lơh geh priă jền uă đau sơl. Bi Nguyễn Đình Thanh yal: Añ den sươn dùl êt ngan, kơphê den jŏ nam neh kra ờ gĭt lơh broă lơi nàng lơh geh priă jền ai hìu bơnhă in. Tam rơpung jàl den bơh ală anih yal tơngĭt jơnau mpồl bơtiàn den kung gĭt sơl bơh jŏ mơya ờ hềt geh priă jền nàng lơh. Pa do, den kung khin cha sơl bơcri lơh tơrlòng lài dùl sàu bal mờ bơta dong kờl bơh anih tờm drơng broă lơh broă sa sươn sre kơnhoàl dê den gŏ tờm rơpung jàl gơdờp niam ngan mờ trồ tiah ù tiah do.

Tàm kơnhoàl Đăk Pơ, càr Gia Lai, uă mpồl lơh sa kă bro neh pơgồp bal mờ cau lơh broă sa nàng tam uă biăp lơh geh priă jền lơh sa uă, tăc mờ uă càr, ƀòn dờng. Pơnrơ bè Hợp tác xã Lơh broă sa sươn sre mờ drơng broă An Trường Phát tàm kơnhoàl Đăk Pơ neh lơh bal mờ gĭt nđờ rhiang hìu bơnhă làng bol tam biăp tàm 2 xã: Cư An mờ Tân An. Mùl màl, Hợp tác xã kĭ sră hơ tăc 17 bơta biăp, bùm, kơnuh, plai chi ai 7 mpồl lơh sa kă bro tàm dơlam mờ bơdìh càr in, mờ khà phan tăc pơgăp 30 tấn pah nhai. Bal mờ hơ̆, Hợp tác xã pơlam gùng dà cau lơh broă sa in rơndăp tăp sèng wơl broă lơh sa, rề ơnàng bă ù tam biăp ai kơnuh, plai chi in gơtùi ơn prăp geh jŏ jòng, tơrmù bă ù tam biăp sa nha. Mò Nguyễn Tuyết Hoa- Kuang ătbồ Mpồl duh broă ătbồ lơh sa kă bro, Kuang ătbồ Hợp tác xã Lơh broă sa sươn sre mờ drơng broă An Trường Phát tàm kơnhoàl Đăk Pơ, càr Gia Lai pà gĭt: Hợp tác xã An Trường Phát lơh bal tam biăp mờ làng bol, drà kờñ kàr lơi den he tăc kàr hơ̆. Ngan tài bè hơ̆ mờ bơta kơ̆p kờñ bơh Hợp tác xã dê là lơh bè lơi dan mờ gơnoar ătbồ, ală gah yal tơngĭt jơnau, mờ ală anih lơh broă geh gơrềng pơn jăt tai dong kờl lơh bal bè lơi nàng ală anih kờñ bè biăp, kơnuh, plai chi kĭ sră hơ pơrgon, blơi jơh bè giă, khà phan lơh geh kơ̆ kơl jăp sùm ai làng bol in den hơ̆ sồng ai làng bol in rài kis kơ̆ kơl jăp.

Ồng Nguyễn Trường- Chủ tịch Ủy ban Nhân dân kơnhoàl Đăk Pơ, kơnhoàl geh tiah mờng tam biăp, chi sa plai uă tàm càr Gia Lai pà gĭt, Đăk Pơ tŭ do geh rlau 6 rbô lồ ù mìng tam biăp lơm. Kơnhoàl gam lơh jăt ală broă nàng lơh gơs măt kă bro “Biăp Đăk Pơ”. Dilah geh dờp, den do là bơta nàng kơnhoàl in rề ơnàng lơh uă, bơ̆t bơtàu tiah mìng tam biăp kơ̆ kơl jăp kung bè nàng phan bơna geh tăc tus drà tàm lơgar mờ dunia. Ồng Nguyễn Trường- Chủ tịch Ủy ban Nhân dân kơnhoàl Đăk Pơ, đơs: Bè đah ală hìu bơnhă làng bol lơh biăp, kơnhoàl sồr ală anih lơh broă ờs mờng pơgồp bal mờ ală xã: Tân An, Cư An là ală tiah tam biăp tờm bơh kơnhoàl dê bơto pơlam làng bol in tơrgùm lơh sa gơ jăt uă bè ală bơta biăp sa kơnuh, sa plai, sa tờm. Pa do, Ủy ban Nhân dân càr kung crơng gơs mpồl lơh broă mpồl zalo nàng lơh ală broă lơh hòi jà, tàm tơrbŏ tăc bro phan lơh geh bơh sươn sre. Do kung là dùl gah lơh broă geh cồng nha ngan ai bàr pe bơta phan bơna biăp tơlir tàm ù tiah kơnhoàl dê mờ bàr pe bơta phan lơh geh bơh sươn sre ndai, jòi drà kă bro, tăc bro phan bơna biăp sa tàm ù tiah kơnhoàl bơh làng bol lơh broă sa sươn sre dê.

Lơh jăt rơndăp broă tơnguh bơtàu biăp, bơkào, plai chi tàm càr Gia Lai tus nam 2030 mờ wèt tus nam 2040, gah lơh broă geh gơnoar tàm càr neh bơ̆t bơtàu rơndăp broă lơh mùl màl. Mìng is tàm nam 2021 geh tơnguh bơtàu di pơgăp 34 rơbô lồ biăp ală bơta, tàm hơ̆ tơrgùm tơnguh bơtàu ală bơta biăp geh bơta niam uă. Cau ai tơngit jơnau đơs Việt Nam neh geh dơ̆ lùp ồng Đoàn Ngọc Có, Phó kuang atbồ Sở Nông nghiệp mờ Phát triển Nông thôn càr Gia Lai bè tơngu me do.

Ơ ồng, pa do Sở Nông nghiệp mờ Phát triển Nông thôn kung neh tơlik geh rơndăp broă bè broă lơh jăt rơndăp broă tơnguh bơtàu biăp, bơkào, plai chi tàm càr Gia Lai. Bè hơ̆ ồng gơtùi pà git tàm rơndăp broă do den gah lơh sa suơn sre càr geh tơrgùm lơh jăt tàm bơnah broă lơi nàng gàr niam là geh lơh jăt dùl rơndăp broă niam ngan?

Ồng Đoàn Ngọc Có: Tàm tơngu me Nghị quyết sồ 10 bơh Ban Chấp hành Đảng bộ càr den Sở Nông nghiệp neh dan mờ UBND càr tơlik rơndăp broă tơnguh bơtàu biăp, bơkào, plai chi tàm càr tus nam 2030, wèt tus nam 2040. Càr Gia Lai geh tơl bơta ƀuơn bè ù tiah, trồ tiah nàng tơnguh bơtàu ală bơta biăp geh bơta niam uă kung bè tơnguh bơtàu tòm chi sa plai. Mờ hòi jà bơcri priă mờ ală hìu măi lơh gơs phan ngui sa tàm càr nàng lơh geh ală phan geh bơta niam uă nàng tăc mờ lơgar bơdìh, lơh geh broă tơnguh bơtàu biăp, bơkào, plai chi tàm càr. Mìng is nam 2021 geh tơnguh bơtàu di pơgăp 34 rơbô lồ biăp ală bơta, tàm hơ̆ tơrgùm tơnguh bơtàu ală biăp geh bơta niam. Lơh tơrgùm bal lòt jăt ală khà VietGap, Globalgap, hữu cơ mờ pơgồp bal mờ công nghệ tuh dà tềm pềr pơgồp bal mờ biăp nàng geh cồng nha uă kung bè bơta niam. Pơgồp bal broă tăc biăp tus tàm drà kă bro tiah tàm gùl lơgar bè Đà Nẵng, Quảng Nam, Quảng Ngãi, Bình Định. Mờ tăc tus ƀòn dờng Hồ Chí Minh mờ Hà Nội bal mờ dùl bơnah tăc tus drà kă bro lơgar Lo mờ ală lơgar tàm dunia.

Bè bơkào, càr Gia Lai geh pờ ơnàng tus lồi nam do, bă ù ơnàng tus 135 rơbô lồ mờ ală bơta bơkào niam nàng drơng broă kờñ di tàm satềp mờ ală ngai kuơ màng. Mờ tờm chi sa plai, tàm tơngai tus càr Gia Lai đơs is mờ Tây Nguyên đơs bal pal gơs là tiah tờm mờ tờm chi sa plai, tài geh tơl niam ngan bè ù tiah ơnàng, gơdờp ngan mờ uă bơta tờm chi sa plai mờ cèng geh uă priă.

Ơ ồng, nàng lơh geh cồng nha rơndăp broă lơh do den ồng gơtùi pà git ală gùng dà broă lơh tàm ală tiah geh kơlôi sơnơng bè lơi nàng broă pơgồp bal tàm broă lơh geh bơyai lơh ƀuơn?

Ồng Đoàn Ngọc Có: Lài jơh pal đơs là gah lơh sa suơn sre pơgồp bal nền nòn mờ gơnoar atbồ tàm ală tiah bơyai lơh sền wơl, sền nàng git khà ù mờ bơta niam bơh ù bal mờ trồ tiah bơh tơl tiah dê. Tàm tơngu me hơ̆ geh rơndăp broă lơh mùl màl nàng he tơnguh bơtàu di pal bơh tơl bơta phan tam, bơh tơl bơta biăp, bơkào, tờm chi sa plai di pal mờ bơta niam bơh trồ tiah, ù tiah tàm tơl tiah dê nàng tơnguh uă ngan bơta pràn càr dê, cèng geh uă priă tàm broă lơh sa mờ broă lơh sa suơn sre gơguh tàm tơngai tus geh mhar rơlao mờ geh broă tơnguh bơtàu niam rơlao mờ lài do. Tàm hơ̆ uă ngan là lơh geh ală bơta niam tàm broă tăc mờ lơgar bơdìh, cèng geh uă priă ai gah lơh sa suơn sre in, pơgồp bal tàm broă tơnguh bơtàu lơh sa, mpồl bơtiàn tàm càr.

Ơi dan ưn ngài ồng!