VOV4.K’ho- Tàm ală tŭ lơh rơndăp broă lơh lơh niam wơl ală gơl gùng digơlan gơtìp tơrlah tơrlơm tàm gùng rơndeh 24, tàm bơnah broă sồ 05 gơl gùng lòt gan ù tiah Xã Hiếu, kơnhoàl Kon Plông, càr Kon Tum neh gơlik geh jơnau ù gơ lòt jăt dà mìu gơ hòr tus bồr tơ̆p jơh mờr 08 lồ ù lơh sre bơh làng bol dê. Nàng sền gàr lơngăp lơngai ờdo ờdă kung bè tŭ tơngai lơh gùng, ală mpồl lơh broă geh gơnoar bơh càr Kon Tum dê neh mhar mŭt lơh broă bal mờ jơnau hơ pơrgon bơh mpồl lơh gùng dê là geh dong kờl dipal ai làng bol in.

Jăt kềng bàr gah gùng rơndeh 24 gơl gùng lòt gan xã Hiếu, kơnhoàl Kon Plông, tàm uă gơl gùng gam lơh niam wơl tàm gùng rơndeh dờng do tàm bàr pe anih ù lŭ gơ lòt jăt dà mìu gơ hòr tus bồr tơ̆p jơh lŏ sre lơh làng bol ờ gơtùi tam kòi. Ồng Phan Thế Vinh- Chủ tịch Ủy ban Nhân dân xã Hiếu pà gĭt, bă sre gơtìp ù bồr tơ̆p mìng là bơh làng bol ală ƀòn: Đăk Lom, Vi Glơng mờ Kon Plông. Ồng Phan Thế Vinh, đơs: Tàm ală tŭ lơh niam wơl gơl gùng 24 gơrềng bơh trồ tiah mìu càl dê den ù gơtìp tơrlah gơ lòt pơrdô jăt bal tus tàm ală lŏ sre. Làng bol kung gam ơm kơ̆p ală anih lơh broă geh gơnoar lơh broă mờ mpồl cau bơcri priă lơh niam wơl gơl gùng do nàng dong kờl ai làng bol in di tŭ mờ sền gàr lŏ sre tam kòi tàm tơngai tus in.

Jăt mpồl lơh bơnah broă sồ 5 gơl gùng lòt gan xã Hiếu, bulah neh kơlôi tus jơnau do sơl mơkung jơh nùs ngan jòi broă lơh nàng tơrmù ƀà bơta gơ aniai tus lŏ sre bơh làng bol dê mơya ờ gŏ geh cồng nha. Jơnau là tài bơh tàm tŭ lơh niam wơl gơl gùng den rơkàng ta luy dê jơnhoa ir, bơta kơh uă ir mờ trồ den mìu sùm tai den tàng dà cò pơrdô jăt bal ù gơ hòr tus ală dà croh tàm tiah geh lŏ sre bơh làng bol dê. Ồng Bùi Huy Trình- Phó Kuang ătbồ Công ty Cổ phần Trường Long, do là công ty lơh bơnah broă sồ 5 pà gĭt, công ty hơ dong kờl dipal ai làng bol in. Ồng Bùi Huy Trình, đơs: Bol añ là mpồl lơh gùng bal mờ ală gah geh gơrềng, cau tờm bơcri priă tàm poh tus geh pơrjum nàng jòi broă lơh nàng dong kờl làng bol in dipal mờ di tŭ.

Lơh dùl rơkàng ta luy bơh bơnah broă sồ 05 dê

Ồng Nguyễn Văn Thanh là cau ala măt Mpồl ătbồ rơndăp broă lơh bơ̆t bơtàu gùng lòt càr Kon Tum dê, mpồl geh Sở Giao thông Vận tải càr Kon Tum jàu kơnòl ătbồ rơndăp broă lơh pà gĭt: Mpồl ătbồ rơndăp broă lơh kung neh pơgồp bal mờ gơnoar ătbồ tiah do, ală anih lơh broă geh gơrềng, hìu bơnhă, lòt sền gĭt nền, đo was mờ geh broă rơndăp lơh geh tơm wơl dong kờl ai làng bol in dipal.

Mùl màl pà gŏ, tàm ală tŭ lơh bơnah broă sồ 5 lơh niam wơl gơl gùng rơndeh 24 gơl lòt gan ù tiah xã Hiếu, kơnhoàl Kon Plông neh gơlik geh jơnau dà cò pơrdô jăt bal ù bồr tơ̆p jơh mờr 08 lồ sre bơh 87 hìu bơnhă làng bol dê bal mờ bơta lơh aniai krơi is. Mpồl ătbồ rơndăp broă lơh bơ̆t bơtàu gùng lòt càr Kon Tum jăt tàm bơta ring bal đah ală gah geh gơrềng dê neh geh broă rơndăp lơh dong kờl ai làng bol in lơh 4 bơta. Nền cê gơwèt mờ ală lŏ sre gơtìp aniai tus 70% rlau hơđang kờp dŭ geh dong kờl làng bol 03 kàl lơh kòi; bơh 50 tus 70% dong kờl 2 kàl lơh kòi; bơh 30 tus 50% dong kờl dùl kàl mờ nggùl lơh kòi mờ gơtìp aniai hơđơm 30% lŏ bă sre den dong kờl nggùl kàl lơh kòi. Geh bơta ring bal bơh làng bol dê, broă dong kờl hoàc hươr geh lơh tơn tàm nhai 10 do.

   Cau cih Khoa Điềm- Cau mblàng Lơ Mu K’Yến