VOV4.K’ho- Tàm càr Kon Tum, kòp as sồt kơltau gơlik pơnời tàm rơpu, kơnrồ pơn jat tai bơtờp mhar. Ngai 17/6, Đăk Hà là dùl tàm 6 kơnhoàl, ƀòn dờng bơh càr Kon Tum dê geh rơpu, kơnrồ gơtìp kòp neh geh kơrnuat yal kòp as sồt kơltau gơlik pơnời tàm rơpu, kơnrồ tàm 2 xã Đăk La mờ Ngọc Wang.

Tàm tơngai geh kòp ơm ing ală broă lơh tac bro, pơndiang rơpu, kơnrồ, phan 4 jơng ƀuơn gơ rềng mờ kòp as sồt kơltau gơlik pơnời mờ phan lơh gơs bơh rơpu, kơnrồ lik, mut tàm tiah geh kòp.Gơ wèt mờ ală tiah ờ hềt geh kòp pal rơcang lài mờ sơlơ tơnguh broă rơcang sơndră kòp, sền gròi nền nòn broă gơlik geh bơh kòp dê nàng bơsong di tŭ dilah gơlik geh kòp. Jơnau yal bơh Anih tờm broă drơng ala broă lơh sa suơn sre kơnhoàl Đăk Hà dê ai gŏ, kờp bơh ngai 10 tus ngai 15/6, tàm kơnhoàl neh geh 18 tiah geh kòp as sồt kơltau gơlik pơnời tàm rơpu, kơnrồ tàm 7 thôn bơh 2 xã Đăk La mờ Ngọc Wang mờ 22 nơm kơnrồ gơbàn kòp. Broă gơlik geh bơh kòp dê geh đơs là gam pơn jat tai kal ke mờ digơlan bơtờp tus uă tiah.

Cau mblàng K’Duẩn