VOV4.K’ho- Jat Chi cục tam phan mờ sền gàr phan tam càr Kon Tum yal, kòp croañ nha bùm blàng neh gơlik geh tàm 4 kơnhoàl, ƀòn dờng bơh càr dê, geh Đăk Tô, Ngọc Hồi, Sa Thầy mờ ƀòn dờng Kon Tum mờ kờp jơh bă bùm blàng gơtìp kòp lơh aniai rlau 300 lồ. Tàm hơ̆, ƀòn dờng Kon Tum geh bă bùm blàng gơtìp kòp lơh aniai uă ngan rlau jơh mờ rlau 210 lồ. Lòt sền ai gŏ, kòp croañ nha bùm blàng lơh aniai uă ngan tàm bă bùm blàng tam sơ lơ̆u kàl, tam bơh nhai 9 nam lài mờ rơcang tơnhàu tàm nhai 9 nam do. Jơnau geh đal git là tài bơh jơnau gơ drơm kòp neh geh bơh lài tàm ñrang bùm blàng sơntìl làng bol blơi tàm drà kă bro.

Bùm blàng gơtìp kòp croañ nha lơh aniai

Ồng Đoàn Năng Rường, Phó Kuang atbồ Chi cục tam phan mờ sền gàr phan tam càr Kon Tum pà git, gah lơh sa suơn sre càr gam lơh ngan kơryan bơta bơtờp kòp croañ nha virus lơh aniai bùm blàng. Gah Nông nghiệp mờ Phát triển Nông thôn neh đơng lam mờ pơlam ală tiah kơryan kòp croañ nha bùm blàng. Pơlam làng bol gơ wèt mờ bă bùm blàng geh kòp rlau 70% den dus sang jơh mờ tam gơl tam chi tam ndai. Gơ wèt mờ bă bùm blàng gơtìp kòp bơh 30% tus 70% den dus chu pơrguc ală tờm bùm blàng gơtìp kòp mờ tam bơrlŭ.

Cau mblàng K’Duẩn