VOV4.K’ho- Tàm càr Kon Tum kờp jơh neh geh rlau 650 lồ bùm blàng tàm 6 kơnhoàl, ƀòn dờng geh: Sa Thầy, Đăk Tô, Kon Plông, Kon Rẫy, Ngọc Hồi mờ ƀòn dờng Kon Tum gơbàn kòp croañ nha tài bơh virus mờ ồm cồng rơyas. Tềng đap bơta do, gơnoar atbồ mờ gah lơh sa suơn sre ală kơnhoàl, ƀòn dờng geh bă bùm blàng gơtìp kòp rơcang lài lam lơh uă broă lơh nàng kơryan kòp bơtờp uă.

Bal mờ broă dus sang, chu pơrguc, tàm ală kơnhoàl, ƀòn dờng bơh càr Kon Tum geh bă bùm blàng gơtìp kòp croañ nha tài bơh virus là Sa Thầy, Đăk Tô, Kon Plông, Kon Rẫy, Ngọc Hồi mờ ƀòn dờng Kon Tum, gah lơh sa suơn sre mờ làng bol tàm ală tiah do kung lam lơh ƀồm sơnơm gơ sơt lơmô kơmbuh kò kơryan kòp bơtờp uă. Bè jŏ jòng, gơnoar atbồ ală kơnhoàl, ƀòn dờng neh geh broă rơndap lơh ngan ngồn gơ wèt tus mờ bă ù rlau 650 lồ tam bùm blàng gơtìp kòp croañ nha tài bơh virus mờ ồm cồng rơyas.

Cau mblàng K’Duẩn