VOV4.K’ho - Jăt Sở Nông nghiệp mờ Phát triển Nông thôn càr Dăk Nông yal, kòp as sồt tềng kơl tao gơlik pơnời tàm rơpu, kơnrồ neh gơtìp tàm 15 xã, thị trấn gơwèt 5 kơnhoàl, tàm hơ̆ geh: Krông Nô, Dăk Glong, Dăk Rlấp, Dăk Mil mờ Cư̆ Jút mờ 230 nơm kơrnồ gơtìp kòp, tàm hơ̆ geh 5 nơm gơtìp chơ̆t, pal tơ̆p pơrgŭc, mờ kờp jơh khà ñjơ̆ tus 343 kĭ.

Càr Dăk Nông tŭ do geh 31 rơbô 500 nơm kơnrồ mờ 5 rơbô 200 rơpu. Tŭ do gam tàm kàl mìu tờm ngan, den tàng ƀuơn ngan gơtìp, kòp as sồt tềng kơl tao lơh gơtìp pơnời tàm rơpu, kơnrồ. Gah lơh sa suơn sre càr Dăk Nông neh sồr ală tiah pal sùm sền gròi bơta kòp gơtờp, bơto sồr ală hìu ròng rơpu, kơnrồ tơnguh broă ngui ală broă lơh kloh niam, lơh kloh vi trùng mờ vôi ƀòk bal mờ hoá chất. Mờ lơh jăt ndrờm bal mờ nền nòn ală broă lơh kơrian mờ kòp gơtờp, tơnguh broă sền gròi, gŏ gờñ mờ bơsong jơh nàng ală tiah kòp gơtờp pa gơtìp ờ gơtờp tàm uă tiah.

Cau mblàng Ndong Brawl