VOV4.K’ho- Bal mờ bơta chờ hờp tài bơh kòp Covid-19 neh geh gròi sền, ală ngai do, cau lơh broă sa tàm ală kơnhoàl tiah đah jum măt tơngai lik càr Gia Lai dê gam chờ hờp ngan tài bơh uă bơta phan lơh geh bơh sươn sre tàm tiah do dê lơh geh uă, giă tăc kung jơnhoa rlau pơndrờm mờ ală nam.

Mờr jơ̆t nam do, tam rơpung kài tàm xã Chư Gu, kơnhoàl Krông Pa, càr Gia Lai, do là kàl bơh sơnrờp bơh hìu bơnhă ồng Huỳnh Thanh Táo dê tăc geh giă 9 rbô đong dùl kĭ rơpung kàl tàm sươn tơn. Mờ dùl lồ rơpung kài, tam tàm tơngai ờ hềt tơl 3 nhai, hìu bơnhă ồng lơh geh 50 tấn rơpung kài, priă cồng geh mờr 300 tơlak đong. Ồng Huỳnh Thanh Táo pà gĭt, mờ ală hìu bơnhă tam rơpung kài plai dờng, niam, giă tăc tus 14 rbô đong dùl kĭ plai khà dùl, den priă cồng gam jơnhoa rlau tai. Lơh geh kàl lơh sa cồng nha ngan bè hơ̆ là kơnờm bơh kòp Covid-19 tàm tiah do geh gròi sền, phan bơna geh tăc yòm. Ồng Huỳnh Thanh Táo, đơs: Hìu bơnhă añ chờ hờp ngan mờ tŭ tus tơngai tơnhàu geh ală kấp gơnoar ătbồ ai tơl bơta ai cau kă phan in lòt rê niam; kơnờm bè hơ̆ den tàng añ tăc geh priă cồng.

Cau tam rơpung kài digơlan lơh geh priă cồng mờr 300 tơlak đong dùl lồ

Kung tàm tŭ do sơl, cau lơh broă sa tàm tiah tam tàu tàm ală thị xã: Ayun Pa mờ An Khê, kơnhoàl Cư Sê, càr Gia Lai dê kung chờ hờp bal bơta chờ hờp lơh sa geh tơnhàu uă, geh giă tai. Ồng Bùi Văn Cường, Cau ătbồ Mpồl cau lơh broă sa tam tàu xã Hbông, kơnhoàl Cư Sê, pà gĭt: nam do, tờm tàu lơh geh cồng nha kờp bal 80 tấn dùl lồ, mờ giă tăc 900 rbô đong dùl tấn, tơnơ̆ tŭ kờp jơh priă tă bơcri lơh, tơl lồ cau lơh broă sa digơlan lơh geh pơgăp 50 tơlak đong priă cồng. Bal mờ broă lơh sa geh tơnhàu uă, geh giă, cau tam tàu tàm Gia Lai kung ƀươn ngan tàm broă tơnhàu. Ồng Bùi Văn Cường đơs: Nam do, mìu nhàc niam, tờm tàu ờ gơtìp aniai tài bơh mìu càl rbŭt dờng. Kuơmàng, gơ wèt mờ tờm tàu, nam do ờ duh pal kơlôi sơnơng bơta lơi bè cau koh tàu tài bơh hiù măy neh geh mpồl koh tàu gơ dê.

Bal mờ tờm tàu, rơpung kài, den giă tăc bùm blàng kơnuh ris kàl do kung gam geh blơi bal mờ giă gơguh tus 3 rbô đong dùl kĭ, jơnhoa rlau 3 dơ̆ pơndrờm mờ kàl lài. Bal mờ hơ̆, ala tài pal apah rơndeh pơndiang bùm blàng tus công ty, nam do, cau kă phan tus blơi tàm sươn tơn mờ giă bơh 30 tus 35 tơlak đong dùl lồ. Mò Hoàng Thị Chanh, 60 sơnam là cau tam bùm blàng tàm thôn Mê Linh, xã Cư Rcăm, kơnhoàl Krông Pa, pà gĭt: Añ tam 2 lồ den tăc geh 60 tơlak đong. Kờp bal tơl lồ geh bơh 15 tus 17 tấn mờ geh tŭ là tus 20 tấn, dilah ờ gơtìp kòp den geh 30 tấn bùm ris tàm dùl lồ. Tơngai sơngka sền gàr bùm blàng ờ roh uă tŭ tơngai ir mơya geh sa rlau pơndrờm mờ ală tờm phan tam ndai.

Giă tăc rơpung kài tàm sươn tàm Gia Lai tŭ do pơgăp 9 rbô đong dùl kĭ

Tàm nhai 2 nam 2021, bàr pe kơnhoàl tiah đah jum măt tơngai lik càr Gia Lai, bè: Ia Pa, Krông Pa, thị xã Ayun Pa geh cau bơtờp kòp Covid-19. Càr neh pal lơh jăt jơnau sồr ơm yah ngài mpồl bơtiàn nàng rơcăng sơndră kòp. Ủy ban Nhân dân càr Gia Lai neh sơrbac mhar sồr ală sở, gah sơnah lơh broă bal mờ ală tiah lam lơh jăt ală broă lơh gàr niam ală bơta ai làng bol in tơnhàu phan tam mờ kă bro phan lơh gơs bơh sươn sre. Jăt mờ hơ̆, gah lơh broă sa sươn sre, gah công thương kung bè ală hìu măy lơh gơlik ƀòk bùm blàng, hìu măy sơdàng tàm Gia Lai geh broă rơndăp lơh blơi, lơh gơlik phan niam dùl êt, prăp gàr mờ kă bro phan lơh geh bơh sươn sre, kuơmàng là tàm tiah geh kòp Covid-19; gah gùng lòt gàr niam broă lòt rê ai cau mờ rơndeh rơndồ in pơndiang phan lơh gơs bơh sươn sre lik mờ mŭt tàm tiah geh kòp. Ồng Đinh Xuân Duyên, Kuang ătbồ Phòng Nông nghiệp mờ Phát triển Nông thôn kơnhoàl Krông Pa pà gĭt, kơnờm bè hơ̆ mờ tiah do neh lơh gơs niam jơnau kờñ dơ̆ lĕ bal hơ̆ là gàr sùm broă lơh sa, kă bro phan lơh geh bơh sươn sre, mơkung rơcăng sơndră kòp Covid-19 geh cồng nha sơl. Ồng Đinh Xuân Duyên, đơs: Tềng đăp bơta kòp Covid-19 den Mpồl đơng lam rơcăng sơndră kòp kơnhoàl dê kung sồr Ủy ban Nhân dân ală xã ătbồ niam mpồl cau lơh broă tus tơnhàu rơpung kài. Làng bol tus den bol añ kung ai tơl bơta niam ngan rlau jơh mờ tơnhàu den lơh jăt jơnau sồr 5K; pơnyơu bè yal mờ cau lơh sơnơm in, ờ geh tơrgùm gal cau mờ lơh jăt ală broă lơh nàng gàr niam broă tơnhàu bơh cau lơh broă sa dê mơkung lơh niam broă lơh rơcăng sơndră kòp Covid-19 sơl.

Tàm poh lài, geh tai bơta chờ hờp là giă tăc tiêu sùm gơguh bơh 60 rbô tus 70 rbô đong dùl kĭ. Do là giă jơnhoa ngan rlau jơh tàm pơgăp 4 nam rê wơl hờ ndo. Bơta do dong ai cau lơh broă sa tàm tiah tam tiêu tàm Gia Lai in neh geh priă cồng uă ngan tàm kàl lơh tiêu do. Ồng Nguyễn Đình Thủy ơm tàm thôn 4, xã Ia Hlốp, kơnhoàl Cư Sê pa apah tai cau pik plai tiêu tàm sươn tiêu ơnàng 1 lồ mờ nggùl nàng mhar kờp sền wơl priă cồng. Ồng Thủy pà gĭt, tài bơh là tàm nam 2017 tus tŭ do, giă tiêu gơmù uă ngan gơmù bơh rlau 200 rbô đong gơmù tus geh tŭ gơmù lơyah ngan rlau jơh mìng gam wơl 35 rbô đong lơm tàm dùl kĭ. Ai kàl do, pa mŭt tàm kàl tơnhàu lơm, tiêu neh gơguh giă, gơguh tus khà 69 rbô đong tàm dùl kĭ tàm gùl nhai 3. Mờ tiêu lơh geh 3 tấn mờ nggùl, kờp 60 tơlak đong priă bơcri mờ pik tơnhàu, hìu bơnhă ồng Thủy geh priă cồng pơgăp 150 tơlak đong. Ồng Thủy yal: Bàr pe nam rê wơl hờ ndo, giă tiêu lơyah ngan, cau tam ờ tơl priă nàng sơngka sền gàr, sơrbì sươn tiêu uă ngan, uă sươn gơtìp lời sơrbì rơnhah rơnhơ jơh. Añ lòt còp sền, cau bơto pơlam tam gơl tus broă lơh sơngka sền gàr mờ sinh học, gŏ sươn tiêu niam rlau, tờm gơ tơlir rlau, plai dờng ndrờm bal rlau. Kờp jơh priă tă bơcri den dùl lồ gơtùi lơh geh priă cồng pơgăp 150 tơlak đong.

Giă tàu nrang tàm Gia Lai gam ơm tàm khà 900 rbô đong dùl tấn (tàu 10 prăp sơdàng), gơguh 100 rbô đong dùl tấn pơndrờm mờ nam lài

 Phan lơh geh bơh sươn sre lơh geh uă, tăc geh giă tai tàm kàl do neh dùl bơnah lơi dong cau lơh broă sa tàm càr Gia Lai gơmù ƀà kal ke tàm broă lơh rơcăng sơndră kòp; mơkung ai tơl bơta ai broă bơcri priă, lơh sa tàm ală kàl pơn jăt tai in.

            Tơrgùm bơh 2 jơnau cih Nguyễn Thảo dê- Cau mblàng Lơ Mu K’Yến