VOV4.K’ho- Sở Nông nghiệp mờ Phát triển Nông thôn càr Lâm Đồng pà git gam lam lơh rơndap broă bơtàu tơnguh lơh sa sươn sre hữu cơ tơngai bơh nam 2020 tus nam 2025 mờ jơnau kờñ bơtàu tơnguh bă ù tam phan hữu cơ geh mờr 1 rbô 600 lồ.

Lâm Đồng tŭ do là tiah lam lài gùt lơgar bè lơh sa suơn sre ngui công nghệ cao mờ bơtàu tơnguh lơh sa suơn sre ngac ngar. Tàm hơ̆ lơh sa suơn sre công nghệ cao geh mờr 62 rbô lồ. Lơh sa suơn sre ngui công nghệ ngac ngar mờr 50 lồ biap thủy canh mờ 195 lồ tam chi tam ngui công nghệ cao cảm biến is bè bơta mrềt duh, khà sùh iò, sền gròi phơng ơn. Lơh sa suơn sre ngui công nghệ cao tàm càr geh cồng nha lơh sa kờp bal 180 tơlak đông tàm 1 lồ tàm 1 nam. Kuơmàng, bă ù tam biap ngui công nghệ cao geh bơh 400 tus 500 tơlak đông tàm 1 lồ tàm 1 nam, tam bơkàu geh bơh 800 tơlak tus 1 tơmàn 200 tơlak đông tàm 1 lồ tàm 1 nam.

Cau mblàng K’Duẩn