VOV4.K’ho- Tài gơrềng bơh kòp dờng Covid-19, tơngai do, uă ngan cau lơh broă sa bơh càr Lâm Đồng gơ ơm tàm rài kis kal ke ngan tài bơh ờ kơ̆ kơl jăp drà tăc phan lơh geh bơh sươn sre in. Nàng bơsong bơta geh ngan do, gah lơh broă sa sươn sre càr Lâm Đồng dê gam bơto pơlam cau lơh broă in lơh pràn lơh gơlik biăp, kơnuh, bùm, plai chi jăt gùng dà dipal tàm bơta bè ờs pa.

Ală ngai do, hìu bơnhă mò Nguyễn Thị Mơ ơm tàm sơnah ƀòn 8, ƀòn dờng Dà Làc tơrgùm wàs wơl sươn tam bơkàu nàng tam gơl wơl tam ală bơta biăp, bùm, kơnuh, plai chi gơ ai tơnhàu jŏ jòng. Bi Mơ pà gĭt, tài gơrềng bơh kòp dờng Covid-19 dê den tàng uă ngan ù tam bơkàu koh ntê neh sùm gơbàn hoàc hươr ờ geh cồng, tam bơkàu ờ gam dipal tai den tàng hìu bơnhă rơhời tam gơl tam wơl mrĕ lơngồt mờ bàr pe bơta biăp, bùm, kơnuh ndai. Bi Nguyễn Thị Mơ, yal: Tŭ do, phan neh sơnđờm tăc gơguh giă wơl, bơta ƀươn bơh tam mrĕ lơngồt dê là gơ ai tơnhàu jŏ jòng rlau den tàng priă jền lơh geh uă rlau pơndrờm mờ ală bơta chi tam ndai. Ală bơta phan bơcri kơn jơ̆ ir priă mờ sa lơyah tơngai den geh gơtìp hoàc hươr uă, hoàc hươr gơlơh bè mờr tus 80% tơn. Mìng is mrĕ lơngồt den sa geh rlau bàr dơ̆ mờ tơngai tơnhàu den gơ kung jŏ jòng rlau dùl êt. Ai gơwèt mờ ală bơkàu bè bơkàu cúc, bơkàu cẩm chướng tuh sơrbì jơh tàm sươn den hoàc hươr jơh 100%.

Nàng gơdờp mờ bơta lơh sa pa, Lâm Đồng tam gơl bàr pe bă ù tam bơkàu koh ntê nàng tam wơl biăp, bùm, kơnuh, plai chi

Nàng broă lơh sa sươn sre gơdờp mờ tŭ tơngai bơh kòp Covid-19 dê tàm tŭ tơngai pa, gah lơh broă sa sươn sre càr Lâm Đồng neh geh broă rơndăp lơh lam lơh sa jăt gùng dà lơh geh jơnau kờñ tàm drà mơkung sền gàr broă rơndăp lơh lơh sa mờ priă lơh geh ai làng bol in. Jăt ồng Nguyễn Văn Châu- Phó Kuang ătbồ Sở Nông nghiệp mờ Phát triển Nông thôn càr Lâm Đồng yal, broă rơndăp lơh do nàng kờñ bơto pơlam cau lơh broă sa in lơh sa jăt rơndăp tăp sèng dipal, gơtùi tăc ai drà kă bro in khà phan lơh geh kờp bal pơgăp 6 rbô 800 tấn biăp, bùm, kơnuh, plai chi ală bơta dùl ngai. Tàm hơ̆, sền gròi uă tus tam gơl bă ù bơh chi tam ndai gam tìp kal ke bè bơkàu koh ntê lơyah ngai nàng tam wơl biăp, bùm, kơnuh, plai chi ală bơta geh tŭ tơngai kis dờng lơyah, ƀươn sơngka sền gàr, gơ ai tơnhàu jŏ jòng mờ prăp gàr jŏ, ƀươn tàm broă jun pơndiang. Ồng Nguyễn Văn Châu pà gĭt: Bàr phan bơna gơtìp gơrềng uă ngan rlau jơh tàm bơta kòp Covid-19 tàm tơngai do là biăp, bùm, kơnuh, plai chi mờ bơkàu. Càr neh pơgồp bal mờ ală tiah kờp sền wơl mờ lơh dùl broă rơndăp lơh lơh sa lơyah tơngai, bơto pơlam là kung gam gàr sơl broă sih tam jăt di bă ù jăt broă rơndăp lơh neh ai. Kờp bal pah ngai tăc tàm drà pơgăp 6 rbô 864 tấn phan bơna biăp, bùm, kơnuh, plai chi, kơ̆ kơl jăp lơh sa ai cau lơh broă sa in mờ ờ gơtìp hoàc hươr. Bol añ geh bơto pơlam là tơrmù bă ù tam biăp sa nha mờ tam gơl dùl bơnah bă ù tam bơkàu koh ntê lơyah tơngai nàng tam wơl biăp nàng drơng jơnau kờñ bơh drà dê, ờ lời gơtìp gơkòl gùng.

Bal mờ hơ̆, hòi jà mờ dong kờl cau lơh broă sa lơh bal lơh sa jăt sră dan blơi phan nàng geh sùm drà tăc phan lơh geh bơh sươn sre in

Bal mờ bơto pơlam lơh sa, gah lơh broă sa sươn sre càr Lâm Đồng kung sơlơ yal tơngĭt jơnau, yal lài broă bơtàu tơnguh lơh sa, giă tăc bro tàm drà...nàng dong cau lơh broă sa rơcăng lài rlau tàm broă lơh sa. Kuơmàng, bơto sồr mờ ai tơl bơta dong kờl cau lơh broă sa lơh jăt ală broă lơh bal lơh sa mờ mpồl lơh sa kă bro, hợp tác xã nàng geh sùm drà tăc bro phan lơh geh bơh sươn sre.

            Cau cih Hà Quang Sáng- Cau mblàng Lơ Mu K’Yến