VOV4.K’ho- Lồi nam 2020, giá tăc rơsòn tu tàm ù tiah càr Lâm Đồng tăc mờ giá priă bơh 110 rơ bô 120 rơbô đong dùl kĭ, mơya tus tŭ do, giá tăc krơsòn tu gơ ơm tàm khà 180 rơ bô đong dùl kĭ. Bơh jơnau yal bơh bàr pe mpồl lơh sa kă bro ròng tu sơn tìl, tăc rơsòn tu mờ lơgar ndai tàm ù tiah càr dê pà gĭt: giá tăc rơsòn tu gơguh pràn wơl là tài bơh drà kă bro tăc mờ lơgar ndai biài bơr tĕh gam geh ală bơta tam gơl pa niam. Bàr pe lơgar neh hời rơ hời mut pờ mpồng wơl drà kă bro tăc mờ lơgar ndai, ală mpồl lơh sa kă bro tàm càr kung gam geh ală sră blơi rơsòn tu uă ngan.

Broă giá tăc rơsòn tu gơguh uă ngan, dong cau lơh broă sa iang nùs bơcri priă lơh sa, pờ ơnàng broă tam tờm zơu ròng tu, tơnguh lơh sa hìu bơnhă bơtàu tơnguh. Tàm ù tiah càr Lâm Đồng tŭ do geh pơgap 15 rơbô hìu bơnhă tam tờm zơu ròng tu, bơtàu tơnguh rlau 8 rơbô 700 lồ geh tus 70% bă ù tam tờm zơu ròng tu tàm gùt lơgar; mờ 57 hợp tác xã mờ 5 ƀòn lơh broă tàm tờm zơu ròng tu.

Cau mblàng K’ Hạnh