VOV4.K’ho- Nàng tơnguh cồng nha lơh sa mờ hời rơhời tam gơl li la chi tam, kơnhoàl Cát Tiên, càr Lâm Đồng gam chồl pràn broă tơnguh ală bă ù tam biap. Tŭ do, kơnhoàl neh crơng gơs tiah mờng tam biap mờ bă ù ơnàng 524 lồ kềng gah dà dờng Đồng Nai. Ală bơta biap geh tam uă tàm kơnhoàl Cát Tiên là biap sơbê, khoah cô ve, rơpung, bùñ bơtang mờ xà lách.

Tài gơ dờp mờ ù tiah den tàng ală bă ù tam biap jat kềng gah dà dờng Đồng Nai hòn gơs niam ngan, ờ huan gơtìp kòp tu sa aniai mờ geh đơs niam bè bơta niam. Kờp bal tơl lồ tam biap cèng wơl cau lơh broă sa kơnhoàl Cát Tiên in priă jền bơh 300 tơlak tus 500 tơlak đong pah nam, jơnhua rlau bơh 5 tus 10 dơ̆ pơn drờm mờ tam kòi. Tŭ do, gah lơh sa suơn sre kơnhoàl Cát Tiên gam pơn jờng mờ dong kờl kỹ thuật, sơntìl, priă bơcri nàng ală hìu bơnhă geh bă ù jat kềng gah dà dờng Đồng Nai pơn jat tai tam gơl bơh ală chi tam ndai nàng tam biap jat gùng dà ngui công nghệ cao nàng tơnguh priă jền lơh geh, bơtàu tơnguh rài kis.

Cau mblàng K’Duẩn