VOV4.K’ho - Mờ nùs nhơm tơriang, ờ ngòt kal ke, mờ git wă ngan tàm broă lơh sa kă bro, ồng Phạm Ngọc Thân kis tàm ƀòn 4, xã Tân Hoà, kơnhoàl Buôn Đôn, càr Dăk Lăk neh geh pơn jờng là dùl tàm 63 nă làng bol lơh broă sa kă bro jăk gùt lơgar nam 2021. Ờ mìng lơh sa kă bro jăk, ồng gam là cau geh nùs nhơm niam tŭ dong kờl uă cau tàm mpồl lơh broă sa sơrlèt klàs mờ rơƀah mờ tus bal pơgồp bal tàm broă bơ̆t bơtàu ƀòn lơgar pa kung bè dong kờl broă lơh nùs nhơm dong kờl ală cau geh rài kis gơtìp kal ke tàm ƀòn.

Bi Hoàng Đức Dũng kis tàm ƀòn 6, xã Tân Hoà sùm kah ưn ngài ồng Phạm Ngọc Thân tài geh dờp mŭt lơh broă tàm hìu lơh sa kă bro phan bơ̆t bơtàu mờ khà priă nhai 6 tơlăk đong tàm 1 nhai.

Ồng Phạm Ngọc Thân dong kờl uă hìu kal ke tàm kơnhoàl Buôn Đôn mờ tiah gùt dar klàs mờ rơƀah, geh tŭ brồ guh lơh pas

Ờ mìng bè hơ̆, ồng Thân gam ai hìu nhă bi Dũng in càn priă ờ sa priă cồng nàng ròng phan tơnguh bơtàu broă lơh sa. Dờp priă càn bơh ồng Thân, bi blơi 16 nơm be nàng ròng. Tơnơ̆ mờ rơlao 1 nam ròng, mpồl be neh deh tus 50 nơm, bi tăc ờ uă mờ blơi tai kơnrồ nàng ròng. Dơ̆ do, bi Dũng kung geh cồng nha. Ròng phan geh cồng nha, hìu nhă bi neh tơm priă càn mờ lơh dùl nơm hìu dờng ơnàng 70 thơ̆k vuông mờ ròng bàr nă kòn lòt bơsram. “Añ mŭt lơh broă hìu wa Thân in bơh 5 nam lài. Tơnơ̆ mờ hơ̆ añ càn mờ wa 100 tơlăk đong nàng blơi be ròng, tơnơ̆ be deh añ tăc ờ uă mờ blơi tai kơnrồ nàng ròng tai. Priă geh tŭ do neh tơl đao. Bơdìh mờ priă nhai rơlao 70 tơlăk đong dờp bơh wa Thân, den priă geh bơh broă ròng kơnrồ, be kung geh 10, 20 tơlăk đong tai, pơgồp bal geh rơlao 100 tơlăk đong. Hìu nhă geh priă lơh hìu, ròng ală oh kòn lòt bơsram”.

Ồng Phạm Ngọc Thân là dùl tàm 63 làng bol lơh broă sa pơn yờ să geh dờp sră jờng rơ bơh Củ tịc Quốk hội

Ồng Tô Văn Liệu, Phó Củ tịc Hội Nông dân kơnhoàl Buôn Đôn đơs, ală nam do, ồng Phạm Ngọc Thân ờ mìng lơh sa, kă bro jăk, mờ gam là cau tàm mpồl tus bal uă ngan mờ ală broă lơh, broă pơrlòng geh ală kấp, mpồl Nông dân lam sồr; pơgồp bal tàm ală broă lơh, broă bơ̆t bơtàu ƀòn lơgar pa tàm ƀòn; mờ ồng kung jơh nùs bơto pơlam khoa học, kỹ thuật tàm broă ròng phan, tam phan ai git nđờ rơhiang nă cau ndai tàm mpồl tàm kơnhoàl Buôn Đôn in; tăc lài phơng sih, sơnơm sền gàr phan tam mờ ờ sa priă cồng ai ală hìu rơƀah in... Mờ broă dong kờl bơh ồng Phạm Ngọc Thân dê, uă cau tàm mpồl tàm xã Tân Hoà mờ tiah rềp bal neh klàs mờ rơƀah, geh tŭ tơnguh tus lơh pas. “Ồng Thân neh dong kờl ƀòn 4, xã Tân Hoà lơh Hìu pơrjum ƀòn, lơh niam wơl ală gơl gùng lòt tàm ƀòn. Mờ tă dong kờl uă hìu kal ke ndai tàm xã ha là ƀòn dờng Buôn Ma Thuột in, lơh hìu trŭ sa nùs nhơm tàm hìu sơnơm kơnhoàl Buôn Đôn nàng cau rơƀah geh piang sào; pà sră măi, sră cih ai kơnòm dềt geh rài kis rơƀah in nàng lòt bơsram. Mpồl Nông dân kơnhoàl gam pơn jăt tai lơh uă broă lơh cau geh pơnrơ jăk nàng geh uă cau tàm mpồl bơtiàn, uă hìu rơƀah pơn jăt tai geh dờp dong kờl”.

Pa do, ồng Phạm Ngọc Thân neh dờp khà pơn jờng “Cau lơh sa-kă bro jăk gùt lơgar nam 2021”. Ồng Tân yal, ồng kung mŭt lơh broă bơh bàr mpàng tê gời, pal lòt lơh broă ơpah, lòt càn priă, kung neh geh tŭ tơnguh bơtàu mờ broă lơh kơphe, tiêu, ròng kơnrồ. Mơya nàng tơnguh bơtàu rơlao, ồng neh ờ ngòt tơrlòng bơta pràn. Bơh broă kă bro xăng jờu, phan bơ̆t bơtàu, phơng sih mờ sơnơm sền gàr phan tam, hơ̆ sồng pờ ơnàng broă tam tờm jràng lồng, lơh hìu ròng sềm rơbèt...

Cồng nha tŭ do ồng neh geh dùl hìu tăc phan mờ suơn dờng, priă geh rơlao 15 tơmàn đong pah nam. Lơh ndang, mờ rơwah, kơlôi sơnơng ndang, ồng Phạm Ngọc Thân gam geh rơndăp broă lơh sa dờng rơlao. Ồng ờ ơm mờ broă lơh sa hìu nhă, mờ geh pơgồp bal mờ uă làng bol lơh broă sa ndai nàng pờ geh uă bơta pràn bơh ù tiah Buôn Đôn dê. “Bol añ gam sền kuơ tàm broă geh sùm broă bơcri priă ai làng bol lơh broă sa in. Añ gam geh nùs nhơm ai hìu nhă bal mờ ờ uă làng bol tàm ƀòn pờ ơnàng broă ròng sềm rơbèt, lơh phan sa bơh sềm rơbèt gơs khà OCOP nàng tăc tàm drà kă bro dunia. Dơ̆ bàr tai, añ kung gam bal mờ gah lơh sa suơn sre kơnhoàl lơh HTX lơh sa kă bro tam tờm jràng tàm bă ù tàm xã Tân Hoà do. Añ kơ̆p kờñ ală broă geh ƀuơn mờ geh cồng nha”.

Mờ ală cồng nha neh geh tàm broă lơh sa kă bro kung bè broă lơh nùs nhơm dong kờl, uă nam do ồng Phạm Ngọc Thân neh geh ală kấp, mpồl tàm càr Dăk Lăk jào pà uă khà pơn jờng; kuơ màng tàm nam 2021 do, ồng là dùl tàm 63 nă làng bol lơh broă sa kă bro jăk gùt lơgar, pơnyờ să geh Củ tịc Quốk hội ồng Vương Đình Huệ jào pà sră jờng rơ. Ồng geh dờp ờ mìng tài broă sơrlèt mờ kal ke lơh pas mờ gam là cau geh nùs nhơm niam, tŭ lơi kung rơcang dong kờl ƀòn lơgar, mờ tài nùs nhơm kơlôi sơnơng bal mờ broă lơh ngan mờ gơnoar atbồ mờ cau lơh broă sa tàm xã, lơh ù tiah gơtìp kal ke ồng dê gơs tiah lơh sa suơn sre uă bơta phan mờ pas gơs ngan.

Cau cih Tuấn Long- Cau mblàng Ndong Brawl