VOV4.K’ho- Nam do, kòp dờng Covid-19 lơh gơlik bơta pràn rồn bơklơn kơn jơ̆ ngan tus lơh broă sa sươn sre tàm càr Dăk Nông. Pơ ồ, ƀơ, sầu riêng...ală plai chi bơh jŏ sùm lơh geh priă cồng 200 tơlak đong dùl lồ rlau hơđang, tŭ do cồng nha lơh sa ờ hềt lơh geh tus nggùl khà mờ geh tŭ là gơtìp hoàc hươr jơh priă bơcri tơn. Ală bơta biăp, bùm, kơnuh, plai chi gơtìp gơkòl wơl uă ngan, lơh gơbàn hoàc hươr uă ngan ai cau lơh broă sa in. Bulah bè hơ̆, tàm bơta rồn bơklơn kơn jơ̆ ngan bơh kòp dờng dê, gah lơh broă sa sươn sre neh tàm tơrbŏ geh tăc bro geh cồng nha, bơh sơnrờp gơdờp mờ bơta pa mờ gam bơtàu tơnguh wơl gơguh lơh sa.

Hợp tác xã Lơh broă sa sươn sre brê bơnơm- phan lơh sơnơm Thịnh Phát, ƀòn R’But, xã Quảng Sơn, kơnhoàl Dăk Glong pa sơrlèt gan ală ngai nhai kal ke ngan rlau jơh kờp bơh tŭ crơng gơs. Kal ke sơnđờm bơh nhai 05 tŭ ală phan lơh gơs bơh sươn sre bơh hợp tác xã dê lơh gơlik kal ke tăc bro, gơmù giă uă ngan. Tus tàm nhai 7 mờ nhai 8 tŭ drà ƀòn dờng Hồ Chí Minh mờ uă càr, ƀòn dờng tiah đah jum dà lơgar gơtìp kòl, den phan bơna bơh Thịnh Phát dê ndrờm bè gơkòl wơl uă ngan. Mò Nguyễn Thị Toản- Kuang ătbồ Hợp tác xã Thịnh Phát pà gĭt, tàm bơta hơ̆, kuang đơng lam bồ Ủy ban Nhân dân càr Dăk Nông, kơnhoàl Dăk Glong mờ Sở Nông nghiệp mờ Phát triển Nông thôn càr neh lơh pràn tàm tơrbŏ bal, rơhời dong hợp tác xã jòi bàn drà tăc bro. Phan bơna kơnuh sơvê geh tiah hòi là bùm sơvê neh geh tăc bro ƀươn ngan; ƀăp sŭ, sơlăt kung gơguh giă uă ngan pơndrờm mờ lài mờ tŭ kòp Covid-19 lơh bơtờp. Kuơmàng rlau, kuang đơng lam bồ càr neh tus tơn tàm tiah lơh sa nàng sền swì bơta geh ngan, iăt kơno jơnau đơs mờ dong kờl hợp tác xã lơh sir ală broă pơlam lơh sa, gơdờp mờ bơta kòp Covid-19 digơlan kal ke tàm tơngai tus. Mò Nguyễn Thị Toản, đơs: Hợp tác xã neh dan mờ Chủ tịch Ủy ban Nhân dân càr kung neh hơ dong kờl bơcri priă lơh dùl nơm hìu krơh bal mờ ƀlàng ìs phan nàng ìs ro kơnuh sơvê. Bè ngai do, kơnuh sơvê gơguh giă wơl, ndrờm mờ biăp ƀăp cải tơn, ngan là ờ gĭt bè lơi mờ kờp dŭ ờ. Ngan den tàng bè hơ̆, hợp tác xã gam rơndăp ù tiah wơl, di 2 ngai geh tam 5 sào, nàng ờ gơtìp ờ geh phan tăc kung bè ờ tŭ lơi gơtìp gơkòl phan wơl. Càr neh rơndăp ù tiah dùl bă ù ơnàng 26 lồ nàng hợp tác xã in lơh bè hơ̆.

Dùl tiah tam biăp dờng tàm Dăk Song, geh Sở Nông nghiệp mờ Phát triển Nông thôn càr tàm tơrbŏ bal tăc bro

Bơta dong kờl bơh gơnoar ătbồ ală kấp mờ ală sở, gah sơnah lơh broă càr Dăk Nông dê gam geh lơh di tŭ bal mờ ală anih tus càr nàng tàm tơrbŏ tăc bro phan lơh gơs bơh sươn sre. Mò Nguyễn Thị Xuân Hương là cau đơng lam Công ty Trách nhiệm Hữu hạn lơh sa mờ drơng broă lơh sa sươn sre Hương Cao Nguyên, càr Dăk Lăk pà gĭt, jăt jơnau yal tàm tơrbŏ bal bơh càr dê, Công ty Hương Cao Nguyên neh jòi tus tiah tam biăp sa dờng ơning ơnàng ngan tàm kơnhoàl Dăk Song. Mơya, tơngai tơnhàu geh lơh di tàm tơngai gơbàn uă kòp Covid-19 den tàng kal ke ngan bè cau lơh broă. Hơ̆ kung là tơngai mìu tờm tàm tiah do dê, gùng lòt, jun pơndiang biăp lik bơh ală tiah ù dòr bazan bŏ bil ntiar lơm bè ngan hơ̆ kung là ală bơta kal ke dờng ngan. Tàm tŭ kal ke uă ngan, mpồl lơh sa kă bro neh lùp mờ  Sở Nông nghiệp mờ Phát triển Nông thôn càr Dăk Nông mờ broă tơnhàu, ơn tàm kơldung, jun pơndiang neh geh rơndăp tăp sèng niam ngan. Tiah biăp Dăk Song neh geh tăc bro di tŭ. Mò Nguyễn Thị Xuân Hương, đơs: Bè Công ty oh dê den bơh sơnrờp oh neh apah dùl anih lơh broă geh tơl ală sră cơng tàng nàng lơh ai he in broă lơh lài bơh sơnrờp ƀươn ƀoài, ơn tàm kơldung, mơya kung ờ gŏ gơtùi sơl. Tơnơ̆ hơ̆, oh neh lùp mờ Sở Nông nghiệp mờ Phát triển Nông thôn càr Dăk Nông tàm tơrbŏ oh mờ ală hợp tác xã mờ bàr pe tiah blơi phan geh bơngă pin dờn mờ geh bơta pràn gơrềng tàm ală kơnhoàl kuơmàng bè ală bơta phan oh kờñ. Den mìng di dùl nhai lơm gời, den khà phan lơh geh dùl ngai 100 tấn, neh bơsong geh di đau broă drà blơi phan ai tiah tam phan in.

Mờ bơta lòt bal bơh ală gơnoar ătbồ ală kấp, làng bol mờ mpồl lơh sa kă bro dê, cau lơh broă sa càr Dăk Nông neh tơrmù geh uă ngan ală bơta aniai hoàc hươr. Tus tŭ do, ală càr, ƀòn dờng tàm gùt lơgar neh sơnđờm tŭ tơngai bè ờs pa, ală gah broă lơh kă bro neh ƀươn ƀoài rlau, dong cau lơh broă sa sươn sre tơrmù ƀà rềs àr. Ồng Phạm Tuấn Anh- Kuang ătbồ Sở Nông nghiệp mờ Phát triển Nông thôn càr Dăk Nông pà gĭt, nàng lơh broă sa sươn sre gơtùi gơdờp tàm tŭ tơngai bè ờs pa, nàng lơh sa mờ lơh geh cồng nha broă lơh rơcăng sơndră kòp Covid-19, càr geh sơlơ tàm tơrbŏ bal tăc bro, mơya kuơmàng rlau là lơh gơs ală tiah tam phan lơh bal, lơh jơh ală bơta bơh tŭ pa tam tus dì tŭ tăc bro phan lơh gơs. Ồng Phạm Tuấn Anh đơs: Dong kờl lơh sa mờ tăc bro phan lơh geh bơh sươn sre den Sở Nông nghiệp mờ Phát triển Nông thôn neh crơng gơs 3 mpồl lơh broă tàm tiah hơ̆ mờ dùl mpồl bơsong jơnau yal. Tŭ cau lơh sa, ală mpồl kă bro geh broă lơi bè tăc bro, giă tăc blơi phan halà bè jun pơndiang phan, cau lơh broă den ală mpồl bơh sở dê geh bơsong, tàm tơrbŏ bal mờ ală anih tăc bro phan. Bè jŏ jòng, sở geh lơh tàm tơrbŏ bal mờ ală anih blơi phan, ală hợp tác xã mờ ală anih kă bro, lơh gơlik phan nàng lơh gơs ală tiah tam phan, tàm tơrbŏ bal mờ lơh gơlik phan- tăc bro phan mờ lơh gơs bơta gĭt gơ̆p jŏ jòng kơ̆ kơl jăp.

Kòp Covid-19 kung gam gơbàn kal ke ngan. Mơya bal mờ bơta rơcăng lài gơdờp bal, càr Dăk Nông neh ờ gam gơlơh pa tai. Ală anih lơh bal tăc bro phan lơh geh bơh sươn sre kung geh pờ tơlik sùm mờ lơh broă ờdo ờdă, rơhời ai geh wơl bơta gơguh lơh sa ai lơh broă sa sươn sre in đơs is mờ lơh sa bơh càr dê in đơs bal.

Cau cih Dương Đình Tuấn- Cau mblàng Lơ Mu K’Yến