VOV4.K’ho- Tàm Lâm Đồng, kòp Covid-19 neh geh sền gròi, khà priă 2, 3 bơta biap, bơkàu neh sơn đờm gơguh jơnhua, cau lơh broă sa Dà Làc gam tơrgùm nàng bơcri priă bơtàu tơnguh wơl broă lơh sa.

Tơnơ̆ tŭ tơngai ơm ing broă lơh sa tài khà priă ală bơta phan bơh suơn sre gơmù khà priă, hoàc huơr kơn jơ̆ ngan, uă suơn tam biap- bơkàu tàm Dà Làc mờ ală tiah rềp bal bơh càr Lâm Đồng dê neh sơn đờm lơh broă wơl, sơbac mhar tam nàng thàn tac jơnau kờn bơh drà kă bro dê in. Mò Nguyễn Thị Thu ơm tàm sơnah ƀòn 8, ƀòn dờng Dà Làc pà git, tài kòp bơtờp neh hời rơhời geh sền gròi, broă pơndiang phan lơh gơs bơh suơn sre kung geh lơh buơn rlau den tàng 2, 3 bơta phan lơh gơs bơh suơn sre neh gơguh khà priă wơl, tàm hơ̆ pơn rơ ngan là biap sơ lăt neh gơguh khà priă jơnhua ngan pơndrờm mờ ngai ờs. Bè hơ̆ den tàng mò bal mờ uă hìu bơnhă ndai tàm tiah do gam sơbac mhar bơcri priă tam wơl nàng geh phan tac ală cau blơi in: “Pa do ờ gam biap tai, biap sơ lăt gơguh khà priă tus 1 rbô đông dùl tờm. Tŭ do khà priă gơ rê wơl 600 đông tus 800 đông dùl tờm pơndrờm mờ bè ờs khà priă lài mờ ngai ờ geh kòp Covid-19. Nđờ nhai do làng bol ờ huan tam tài tam gơtìp hoàc huơr ir mờ ờ gơtùi tac, tŭ do biap gơguh khà priă den cau sơn đờm tam wơl. Sền bal biap gam geh khà priă gơguh jơnhua, cau lơh broă sa chờ hờp den tàng tơrgùm lơh broă lơh sa wơl.”

Khà priă gơguh jơnhua, cau lơh broă sa gam lơh ngan sơngka sền gàr bơkàu cúc nàng tac drơng jơnau kờñ bơh drà kă bro dê in

Ờ mìng biap, cau tam bơkàu cúc tàm Dà Làc kung chờ hờp tài khà priă bơkàu neh gơguh tus 30 rbô đông dùl gri cúc glòm mờ kàl, 15 rbô đông dùl gri gơ wèt mờ bơkàu cúc ờs. Mờ khà priă do, tơl sàu bơkàu cúc, cau lơh broă sa geh priă cồng 40 tơlak đông. Jat ồng Nguyễn Đình Thuận, ơm tàm sơnah ƀòn 7, ƀòn dờng Dà Làc đơs, digơlan tài tŭ tơngai jŏ jòng ơm ing broă lơh sa, khà lơh gơlik phan ờ tơl nàng drơng jơnau kờñ den tàng khà priă 2, 3 bơta phan bơh suơn sre hơ̆ sồng nisơna gơguh jơnhua. Bulah git broă uă cau dùl ròt tam wơl, ngan là drà kă bro tac phan lơh gơs tàm tơngai tus ờ ring bal, lơh gơbàn tus uă jơnau pơhìn gơtìp aniai, mơya mờ broă gơlik geh bơh kòp bơtờp hời rơhời geh sền gròi mờ kơ̆ kơljap bè tŭ do, ồng kung kơp kơnờm ngan broă lơh sa geh cèng wơl cồng nha tàm ală kàl tus. Ồng Nguyễn Đình Thuận pà git: “Đơs bal mờ khà priă bơkàu cúc bè tŭ do den cau tam kung geh priă cồng đau. Tàm nam lài, tŭ do den bơkàu cúc geh khà priă 40 rbô đông, nam do tài kòp Covid-19 den tàng neh gơmù. Drà kă bro tŭ do den he ờ gơtùi git lài bơta lơi, tŭ do den bơkàu cúc tac yòm đau, ai ală bơta bơkàu ndai ndrờm pal dus sang jơh”.

Geh git, nàng dong kờl cau lơh broă sa, mpồl lơh sa kă bro blơi phan lơh gơs bơh suơn sre, gah lơh sa suơn sre càr Lâm Đồng gam lam lơh pờ pang web yal tơnggit kă bro điện tử “Phan lơh gơs bơh suơn sre càr Lâm Đồng” tơngai bơh nam 2021 tus nam 2025. Jat hơ̆, phan lơh gơs bơh suơn sre ală bơta gam mut tàm kàl tơnhàu halà mờr tus kàl tơnhàu geh yal loh làng nàng tơnguh tai bơta tàm tơrbŏ bal đah khà lơh gơlik mờ jơnau kờñ blơi, pơgồp bơnah gàr kơ̆ kơljap anih tac phan lơh gơs bơh suơn sre ai cau lơh broă sa in.

Cau mblàng K’Duẩn