VOV4.K’ho- Càr Dăk Lăk gam mut tàm kàl tờm tơnhàu sầu riêng. Tềng đap ală bơta kơlôi rơcang tài kòp Covid-19 lơh gơ rềng tus ròt anih pơndiang tac rbo phan lơh gơs bơh sươn sre geh lơh sầu riêng tac ờ yòm, ờ gơtùi tac, cau ai tơnggit jơnau đơs VOV Tây Nguyên neh tus kơnhòal Krông Păk, do là tiah tam sầu riêng uă ngan rlau jơh càr nàng jòi git bè kàl tơnhàu mờ drà kă bro sầu riêng. Mùl màl ai gŏ, kòp Covid-19 bulah lơh gơ rềng ờ di là dùl êt, mơya sầu riêng kung gam là tờm chi sa plai ai cồng nha lơh sa uă ngan rlau jơh càr.

Gam tàm kàl tơnhàu sầu riêng, ồng Lê Quang Anh, ơm tàm thôn Phước Hòa, xã Ea Yông, bal mờ mờr nă cau lơh broă jal mhar pik plai tàm sươn ơnàng 1 lồ, pơndiang tus hờ anih tơrgùm nàng ơn tàm rơndeh kong goa lòt tac ai cau tac bro in. Ồng Anh yal, sầu riêng nam do tơnhàu geh uă rlau mờ nam lài. Khà priă sầu riêng Dona nam do gơmù dùl êt, mơya tac kung gam ƀươn đau: “ Khà tơnhàu sầu riêng nam do den hìu bơnhă añ geh mờr 25 tấn plai. Jơh ală plai neh geh cau tac bro tong lài priă hơ pơrgon blơi jơh tàm sươn là 41 rbô đông tàm 1 kĭ. Nđờ ngai do, khi pik nàng pơndiang lòt tac. Ngai sơn rờp khi pik rlau 1 tấn 7 tạ, ngai do pik  geh rlau 2 tấn tai. Tài kòp bơ tờp gơlik geh kal ke den tàng ờ gơtùi pơndiang uă bè nam lài. Pơn yơu nam lài pơndiang 1 dơ̆ là 5 tấn den nam do dùl êt rlau, mìng pơgap bơh 2 tus 2 tấn mờ nggùl gời”.

Ngài mờ sươn ồng Lê Quanh Anh dê ờ ngai là suơn sầu riêng Dona ơnàng 1 lồ mờ nggùi bơh ồng Lê Văn Thành dê. Bulah 2, 3 suơn gùt dar gam pik ur ar mơya ồng Thành kung gam pơn jat tai kơp gơn. Uă cau tac bro tus lùp blơi mơya hìu bơnhă ồng ờ hềt bài tac: “Tŭ do hìu bơnhă añ ờ hềt tac tài sầu riêng kung ờ hềt dum uă. Khà dùl êt plai dum tŭ do mìng pik rah rài bơh 5 tus 7 tạ dùl dơ̆ den hoàc ngan priă ơpah cau pik, kơp dum ring tac dùl dơ̆ den ờ huan bòl rlau. Ngai lơi ală cau tac bro kung đì rơndeh mut lùp mơya hìu bơnhă ờ hềt gơ jă gơ jal dờp priă tong hơ pơrgon lài nàng tac. Ờ gơtùi tong lài priă hơ pơrgon dan blơi den khi đơs là tŭ lơi kờñ tac den hòi điện thoại khi in khi mut blơi mơ, plai dờng halà plai dềt ndrờm blơi jơh, khà priă blơi là 42 rbô đông tàm 1 kĭ tàm suơn. Khà priă nam lài pơn drờm mờ nam do den ờ lin uă, gơmù dùl êt lơm gời”.

Nam do sầu riêng tàm Krông Păk tơnhàu geh uă

Krông Păk tŭ do là tiah tam sầu riêng tac bro uă ngan rlau jơh càr Dăk Lăk dê mờ 3 rbô 500 lồ, tàm hơ̆ geh mờr 2 rbô 400 lồ gam tàm tơngai tơnhàu, uă ngan là sơntìl Dona. Tiah do kung tơrgùm ală mpồl lơh sa kă bro blơi, lơh gơlik, tac hờ lơgar ndai sầu riêng uă ngan rlau jơh càr. Jat ala mat Kong ti Cổ phần Thương mại Xuất nhập khẩu Dũng Thái Sơn tàm xã Ea Kênh, nam do, sầu riêng tơnhàu geh uă, tơl lồ tơnhàu geh pơgap bơh 22 tus 25 tấn, gơguh bơh 15 tus 20% pơndrờm mờ nam lài. Bơh bồ kàl tus tŭ do, pah ngai, mpồl lơh sa kă bro blơi bơh 8 tus 10 tấn nàng lòt tac tus ală càr, ƀòn dờng, bè: Huế, Đà Nẵng, Khánh Hòa, Hồ Chí Minh, Hà Nội; mờ 2, 3 drà kă bro dunia là Lo, Đài Loan, HongKong... Bơh bồ kàl, khà priă blơi sầu riêng Ri6 là bơh 30 tus 35 rbô đông tàm 1 kĭ; sầu riêng Dona bơh 40 tus 45 rbô đông tàm 1 kĭ.

Ồng Lê Viết Chiến, Phó Kuang atbồ Kong ti pà git, jơnau kờñ bơh drà kă bro tàm lơgar mờ lơgar ndai dê gơ wèt mờ sầu riêng là dờng ngan. Mpồl lơh sa kă bro kờp dŭ blơi mờr 25 tấn, mờ mìng drơng broă lơh mrềt mờ gam nàng tac hờ lơgar ndai. Broă rơndap lơh do geh lam lơh ƀuơn ƀùai dilah ờ gơlik geh kal ke dờng ir tàm broă pơndiang: “Nam do, bol hi kờp dŭ blơi sầu riêng neh ploh kơmhò hơ̆ sồng ơn tàm kơldung lơh mrềt pơgap bơh 4 rbô tus 5 rbô tấn nàng tac hời rơ hời; tac hờ lơgar ndai den kờp dŭ pơgap 20 rbô tấn. Tŭ do bol hi kung gam blơi sầu riêng nàng tac hờ lơgar ndai mơya khà dùl êt, ờ hềt uă. Bơta kal ke ngan rlau jơh tŭ do là gùng pơndiang, tài gơ wèt tàm broă gơlik geh bơh kòp Covid-19 dê mờ jòi drà kă bro tac hờ lơgar ndai jat sră hơ pơrgon. Gơtùi bơsong broă pơndiang tàm tơngai kòp bơ tờp mờ jòi geh drà kă bro jat sră hơ pơrgon den añ sơ nơng là gơtùi tac niam sầu riêng kàl nam do halà kờp bal mờ ală kàl pơn jat tai”.

Kàl tơnhàu nam do khà sầu riêng tàm Krông Păk geh mờr 45 rbô tấn

Ồng Nguyễn Huy Hoàng – Kuang atbồ Phòng Nông nghiệp mờ Phát triển nông thôn kơnhòak Krông Pắk yal, tŭ do, kơnhòal kung gam lơh jat broă ơm yah ngài mpồl bơtìan rơcang sơndră kòp Covid-19 jat Jơnau sổ sồ 15 bơh Chính phủ dê. Nàng dong kờl cau tac gơtùi tac sầu riêng, bal mờ broă pơgồp bal mờ ală cơldŭ, mpồl lơh broă, gơnoar atbồ kơnhòal crơng gơs ală mpồl lơh broă kươmàng tàm kơnhòal tơn, dong kờl uă ngan rlau jơh ai cau tờm mpồl lơh sa kă bro, cau tac bro, công nhân, cau măi rơndeh tus blơi, pơndiang sầu riêng lơh jat di jơnau sồr bè rơcang sơndră kòp Covid-19 den cơldŭ lơh broă kung lơh sră yal cribơyai mờ Ủy ban Nhân dân kơnhòal dan Ủy ban Nhân dân càr Dăk Lăk mờ ală sở, gah broă lơh geh gơ rềng dong kờl: “Cơldŭ lơh broă neh cribơyai mờ Ủy ban Nhân dân kơnhòal dan Sở Giao thông Vận tải ai bơta niam nàng ală rơndeh pơndiang sầu riêng geh pơndiang sầu riêng lòt tac; pơgồp bal mờ gah lơh sơ nơm lam lơh broă ai mẫu lơh xét nghiệm mhar tơn ală cau măi rơndeh, cautac bro, ală cau geh gơ rềng tus broă blơi sầu riêng in, ƀồm lơh kloh khuẩn rơndeh rơndồ... nàng gàr niam broă lơh rơcang sơndră kòp Covid-19. Tơl ală bơta ndrờm geh lam lơh dùl ròt, jơh nùs nàng gàr broă tac sầu riêng geh niam”.

Ală drà kă bro tàm lơgar mờ dunia ndrờm kờñ ngan sầu riêng Krông Păk

Ală bơta gam gơlik geh tàm tiah tam uă sầu riêng kơnhòal Krông Păk, càr Dăk Lăk ai gŏ, bơta gơmù khà priă tac sầu riêng geh yal tàm tơngai lài mìng gơlik geh mờ sầu riêng sơntìl yau, plai sầu riêng ờ huan niam, jơh bal bă ù tam mờ cồng nha tơnhàu ndrờm dềt mờ rah rài. Ală sơntìl sầu riêng să rơmit, gar nsiap tờm ngan càr dê kung gam pơn jat tai ai priă jền uă bơh 400 tus 800 tơlak đông tàm 1 lồ. Ală kấp gơnoar atbồ kung neh kờp dŭ lài kal ke, mờ geh rơndap broă bơsong di pal, gàr bơta plai chi geh cồng nha lơh sa uă ngan rlau jơh càr dê geh pơndiang, tac bro ƀuơn ƀuài.

Cau mblàng K’Duẩn