VOV4.K’ho- Tềng đap ală kal ke tàm broă tac phan lơh gơs bơh suơn sre tàm tiah geh kòp Covid-19, nhai 6 do, Bộ Nông nghiệp mờ Phát triển Nông thôn geh pơgồp bal mờ Mpồl tam klac cau ùr Việt Nam, Đoàn Ơruh pơnu Cộng sản Hồ Chí Minh dà lơgar bơt bơtàu ală broă lơh tac phan lơh gơs bơh suơn sre ai cau lơh broă sa tàm tiah geh kòp in, ờ mìng gàr bè bơta niam phan lơh gơs bơh suơn sre mờ gam gàr ờdo ờdă kòp bơtờp tai. Ală broă lơh tơrbŏ bal tac phan lơh gơs bơh suơn sre geh bơt bơtàu bơh dà lơgar mù tus ală tiah kấp hơđơm, tus ală xã, sơnah ƀòn.

Tus bal ală broă lơh tơrbŏ bal broă lơh gơlik mờ jơnau kờñ ngui sa gam geh ală Hiệp hội gah lơh phan mờ ală anih tac rah rài bơh Việt Nam dê. Gah lơh sa suơn sre geh bơt bơtàu anih prap ơn dữ liệu mờ geh yal sùm jơnau tơnggit ai ală anih tac phan in git là, tàm càr lơi gam rơcang tơnhàu phan lơh gơs bơh suơn sre mờ khà lơh gơlik kàr lơi. Ală anih tac phan bơh hơ̆ geh rơcang lài rơndeh rơndồ pơndiang, anih prap phan, broă lơh prap gàr mờ kĭ sră hơ pơrgon mờ ală mpồl lơh broă bal.

Cau mblàng K’Duẩn