VOV4.K’ho - Tơnơ̆ mờ càr Kon Tum mờ càr Gia Lai, tàm càr Dak Lak kung pa gơtìp kòp as sồt kơl tao gơlĭk pơnời tàm kơrnồ sơl.Kơnrồ sơnrờp ngan gơtìp kòp do geh gŏ tàm càr Dak Lak là bơh hìu nhă ồng Nguyễn Khắc Dự, kis tàm ƀòn 5, xã Cuôr Knia, kơnhoàl Buôn Đôn.

Jăt broă lùp sền bơh kòp gơtờp dê, ngai 03 nhai 6 lài do, ồng Dự blơi kơrnồ bơh dùl hìu tàm xã rềp bal. Tŭ blơi, kơnrồ ờ geh tơngŏ mờ kòp. Tus drim ngai tơnơ̆ (04/6), kơnrồ do geh tơngŏ duh să, gơlĭk ală toh tềng kơl tao lơhơ. Tơnơ̆ mờ hơ̆, anih lơh broă lơh sơnơm phan ròng neh ai phan xét nghiệm mờ gĭt kơnrồ do neh gơtìp kòp as sồt kơl tao gơlĭk pơnời. Bal mờ broă tơ̆p pơrgŭc kơnrồ gơtìp kòp, gah lơh broă geh gơnoar tàm do neh ƀồm sơnơm lơh kloh vi khuẩn tàm tiah gơtìp kòp.

Đah ròng phan mờ lơh sơnơm phan ròng càr Dak Lak neh geh sră nggal sồr ală tiah tơnguh broă sền gròi nàng gŏ kờñ tiah gơtìp kòp nàng dan geh jơnau bơsong.

Cau mblàng Ndong Brawl