VOV4-Xơ Đăng - Kơmăng hâi lơ 20/1, hngêi hơdruê Hồ Gươm, Hà Nội, tơbâ 95 hơnăm Hâi mơjiâng Đảng Kŏng san Việt Nam (3/2/1930 - 3/2/2025), Khu tơrŭm cheăng Tíu xiâm tơnêi têa tơrŭm ƀă Hlá tơbeăng Nhân Dân, Hlá tơbeăng Kŏng san, Rơ’jíu xiâm Việt Nam, Khu chêh hlá tơbeăng Việt Nam tơkŭm po leh tơbleăng ƀă diâp hlá tơbeăng tung lâp tơnêi têa ‘na mơjiâng Đảng (pơxá inâi Búa liềm vàng) rôh má 9 hơnăm 2024.

VOV4-Xơ Đăng - Drêng troh Têt Lo hơnăm nếo Ất Tỵ 2025, kơxê hâi lơ 20/1, pôa Lương Cường, Kăn xiâm hnê ngăn tơnêi têa, kăn pơkuâ mâu lêng tơplâ dêi kuăn pơlê, Kăn hnê ngăn Hô̆i đong lêng ƀă Kring tơniăn rơtế ƀă khu kăn cheăng dêi Tíu xiâm tơnêi têa troh lăm pôu, rơkâu Têt ăm mố đô̆i Đặc công.

VOV4.Xơ Đăng -  Pêi pro tơdroăng bro lế lĕm tro khu pêi cheăng tơnêi têa tiô troăng hơlâ Tơnêi têa, 6 Phŏ Kăn pơkuâ tíu pêi cheăng a Dak Nông hiăng pro đơn pâ kĭ pơtê cheăng hdrối hơnăm chiâng phêp vâ pơtê cheăng.

VOV4.Xơ Đăng - Tung tơdroăng lăm pôu pêi cheăng Kŏng hoa Czech, a pơlê kong xiâm Praha, pôa Phạm Minh Chính, Ngế pro xiâm hnê ngăn tơnêi têa hiăng troh lăm pôu, mơhnhôk pơlê pơla mơngế Việt Nam a Tíu xiâm tê mơdró Sapa.

VOV4.Xơ Đăng - Vi ƀan Hdroâng kuăn ngo nếo tơkŭm po Hneăng hôp mơ’no tơdrêng tung um tiô troăng hyôh măng lâp tơnêi têa mơgêi tơdroăng pơkuâ djâ hdroâng kuăn ngo mơnhông mơdêk hơnăm 2024 ƀă pêi pro hnoăng cheăng hơnăm 2025. Pôa Nguyễn Hòa Bình, Phŏ Ngế pro xiâm hnê ngăn Chin phuh mơnhên, tơdroăng pơkuâ djâ hdroâng kuăn ngo mơnhông mơdêk ƀă troăng hơlâ tŏng gum hdroâng kuăn ngo đi đo châ Đảng ƀă Tơnêi têa tơmâng tơbleăng tơdroăng pơkâ xiâm Tơnêi têa hiăng prôk tung tơdroăng rêh ối kuăn pơlê hdroâng kuăn ngo ƀă kong ngo.

VOV4.Xơ Đăng - Kơxo lơ 20/1/2025, Khu xiâm pơkuâ tơdroăng kal kí, Khu pơkuâ hnê ngăn Đảng tơkŭm po trâm mâ mâu kăn pơkuâ Đảng, Tơnêi têa, Măt trâ̆n Tơnêi têa Việt Nam, Ngế cheăng tung tíu xiâm Đảng mâu hneăng hdrối drêng tơbâ 95 hơnăm Hâi mơjiâng Đảng ƀă rơkâu Têt drêng troh rơnó Hơngui Ất Tỵ.

VOV4.Xơ Đăng -  Hơnăm 2024, kuăn pơlê tơring tơkăng kong Dak Mil, kong pơlê Dak Nông hiăng rôe lối 1.000 toăng ô tô tŭm túa kơnôm tơmeăm pêi lo ing chiâk deăng to kơnâ.

VOV4.Xơ Đăng - Pơtối mâu tơdroăng tung roh lăm pôu pêi cheăng păng ‘nâng troh a Kŏng hoa Cezch, kơmăng hâi lơ 19/1, a pơlê kong xiâm Praha, pôa Phạm Minh Chính, Ngế pro xiâm hnê ngăn tơnêi têa hiăng veăng Tơdroăng Rơnó Hơngui Pơlê xiâm 2025 ƀă rơkâu Têt pơlê pơla mơngế Việt Nam a Cezch.

VOV4.Xơ Đăng – Khu kăn pơkuâ hnê ngăn Đảng kong pơlê - Vi ƀan Kuăn pơlê - Hô̆i đong Kuăn pơlê - Vi ƀan Măt trâ̆n tơnêi têa Việt Nam kong pơlê Lâm Đồng nếo tơkŭm po hôp tơpui pơla mâu kăn kong pơlê Lâm Đồng ƀă mâu kăn rêm râ kuăn pơlê. Kăn hnê ngăn kong pơlê Lâm Đồng rah xo tơdroăng ‘’Thế pêi tơdroăng klâi vâ Lâm Đồng mơnhông tơƀrê? ”, Ƀă púi vâ veăng ai hên hnoăng veăng ‘no  dêi kuăn pơlê a rôh tơpui tơno. Hên tơdroăng ki kal ai tơpui tối, tung mê, ai tơdroăng pơkâ hâi ki pêi ton hơnăm tơdjâk mơnhông cheăng kâ -rêh ối dêi kong pơlê.

VOV4.Xơ Đăng - Kơmăng hâi lơ 19/1 a Hngêi hôp kân Tơnêi têa, Hà Nội, pôa  Lương Cường, Kăn xiâm hnê ngăn  tơnêi ƀă kơdrâi pôa hiăng veăng ngăn mơđah hơdruê xuăng Rơnó Hơngui Pơlê xiâm hơnăm 2025 ƀă pơxá “ Việt Nam-Mơnhông tung chal nếo”.