VOV.Bahnar - Tơ̆ Cham să Ba Đình (Hà Nội) pơgơ̆r Pơm lêh tơbăt, iung yak pơrŏ pơ ư khul ƀô̆ đô̆i kŏng ang, ‘măng iung yak pơrŏ tơbăt 80 sơnăm kĕch mang Khei Tơhngam jơnei păng Quốc khánh 2/9. Atŭm hăm ‘noh lơ tơdrong pơgơ̆r joh ayŏ kơdŏ soang, soh kơmlăih pơkao ... pơgơ̆r jơ̆p tơring lơ̆m teh đak.

VOV.Bahnar – 'Năr ou, tơ̆ Cham să Ba Đình kăp gĭt, Đảng, Teh đak păng kon pơlei bơ̆n kăp gĭt pơgơ̆r Lêh tơbăt 80 sơnăm kăch mang khei 8 jơnei keh kong păng Kuôk khănh teh đak Cộng hòa xã hội chủ nghĩa Việt Nam (2/9/1945 - 2/9/2025).

VOV.Bahnar - ‘Năr 2/9 kŭm jing năr Ƀok Hô lôch hơchăng – Bơngai hlôi chĕp kơ̆l pơgơ̆r Đảng bơ̆n, kon pơlei bơ̆n, teh đak bơ̆n yak hlŏh kơbăt dôm yơ tơdrong pơmat tat, iŏk đei lơ tơdrong jơnei tih tên lơ̆m tơdrong tơblăh iŏk rơngei hơdrĕch hơdrung, vei lăng păng pơjing teh đak. Hơiă Năr têt rơngei, pơjing đei teh đak kơdih, kon pơlei dôm hơdrĕch kon kông tơ̆ pơlei pơla Tây Nguyên ƀlŏk dơ̆ng Ƀok Hô, bơngai hlôi hơnhăk ba tơdrong arih xa phĭ tơtŏ dơnŏ 'lơ̆ng ăn kon pơlei. Mă bơngai kră, mă 'lơ̆p hơnơ̆ng 'mĕh hŏk păng jang kiơ̆ jơhngâm đon 'lơ̆ng đơ̆ng Ƀok Hô ngăl, vang akŏm 1 jơhngâm tơiung pơjing pơlei pơla, teh đak roi đunh roi pơdrŏng, 'lơ̆ng rŏ.

VOV.Bahnar - Hơdring Xơdang đei măt bơngai hloh 212.000 ‘nu bơngai hơrih sa găh lơ tơ̆ tơring groi kông, tơring hơtăih yăih kơ dêh char Kon Tum so, dang ei ‘noh tơring Pơmơ̆t dêh char Quảng Ngãi. Lơ̆m jăl jang 2020- 2025 Đảng ƀô̆ dêh char Kon Tum hlôi đei lơ tơdrong tơchơ̆t pơm hơtŏk dôm tơdrong đei, pơtrŭt hơdrin yak hloh tơnap tap đơ̆ng kon pơlei. Đơ̆ng khei 7 ou ki, jang kiơ̆ bơ̆ jang khul kơdră tơring 2 kâp, hơgrop dêh char, tơdrong atŏk tơ iung kơ rim tơring đei bơngai Xơdang hơrih sa hlôi pơih să, Tơdrong tơchơ̆t Hop akom tih Đang ƀô̆ ‘măng mă blŭng rim tơring adoi nhen sơkơ̆t hơdăh trong trŏ lăp păng ƀlep dôm tơdrong kăl hloh vă atŏk kơtang lơ̆m jăl jang atŏk tơ iung ‘nao.

VOV.Bahnar – Pơm kiơ̆ pơkăp jơnŭm pơgơ̆r tơring 2 tăl, lơ xah 'nao tơ̆ tơring Tây Nguyên – Pơbah Tŏk bŏk đei tơ-iung pơjing kiơ̆ pơkăp tơmơ̆t hơdai, mă blŭng jang đei jơnei tơnăp lơ̆m vei lăng, pơgơ̆r pơm jang ăn kơ kon pơlei.

VOV.Bahnar - Linh so Krung Dăm Veo (Y Veo) sơnăm ‘nâu 82 sơnăm, arih xa tơ̆ plei Piơm, xăh Đak Đoa, dêh char Gia Lai jĭ 1 ‘nu kăn ƀô̆ kră jang kăch mang, loi 60 sơnăm jang Đảng, 1 ‘nu đảng viên arih xa tơpăt ‘lơ̆ng, gơh hơgei. Ƀok arih xa, iung jang kăch mang đơ̆ng oei tơplăh hơyăt Phalăng păng hơyăt Mi truh hrei ‘nâu. Lơ̆m chăl rơngei, ƀok đĭ jơhngâm tơgŭm ăn kon pơlei, pơtho ăn kon hơ ‘lơ̆p hŏk truh tôch, jing bơngai đei yoa ăn pơlei pơla, ăn teh đak. Ƀlep ƀât tơbăt 80 sơnăm năr Quốc khánh teh đak CHXHCN Việt Nam bơ̆n vang mơ̆ng ƀok Veo chă pơđou dơ̆ng tơdrong jang kăch mang đơ̆ng ƀok hơ.

VOV.Bahnar - Yak truh tơbăt 80 sơnăm Kach mang Khei 8 păng Quốc khánh 2/9, Bơngai tang măt ăn teh đak Cộng hòa Dân chủ nhân dân Lào tơ̆ Trung Quốc Somphone Sichaleune) hlôi chĕp kơ̆l khŭl tang măt Anih jang tang măt ăn teh đak Lào tơ̆ Bắc Kinh năm ngôi, hmach chơt hơiă kơ Bơngai tang măt Phạm Thanh Bình păng đĭ đăng kang ƀô̆ Anih jang tang măt ăn Việt Nam tơ̆ Trung Quốc.

VOV.Bahnar - Thủ tướng Phạm Minh Chính lăp đon hăm hla ar chih kăl vă tơroi lơ̆m Hop akŏm Đảng ƀô̆ Hải Phòng păng Quảng Ngãi lơ̆m jăl jang truh, atŭm hăm ‘nŏh tơƀôh hơdăh tơdrong ưh tam ‘lơ̆ng, yoa kiơ păng chih iŏk ƀai hŏk kăl.

VOV.Bahnar – Ƀơ̆t tơbăt 80 sơnăm Kăch mang Khei 8 păng Kuôk khanh năr 2/9, Anih tơm Chinh trĭ tơchơ̆t asong 100.000 hlj ăn tôm kon pơlei.

VOV.Bahnar – Năr 28/8, tơ̆ pơlei tơm Huế, Anih jang vei lăng kon pơlei pơlei tơm jang atŭm hăm Jơnŭm jang Khua hŏk Lĭch sử Việt Nam pơgơ̆r pơma đam kơ teh đak hăm hơnăn “80 sơnăm Kăch mang Khei 8 păng Kuôk khănh năr 2/9 – Kăp gĭt kơ jơhnơr hơrih păng kơjă kăp gĭt lơ̆m tơdrong hơrih”.