VOV.K'Ho- Rơlao 10 nam lơh jăt Jơnau lơh nền sồ 55 nam 2015 bơh Chính phủ dê bè broă dong kờl càn priă drơng tàm broă bơtàu tơnguh lơh sa suơn sre, ƀòn lơgar, làng bol jơi bơtiàn ờ gal cau đơs is, làng bol lơh broă sa suơn sre càr Dăk Lăk đơs bal, neh geh tai bơta pràn kwơ màng nàng bơcri priă lơh sa, ròng phan. Bơh khà priă do, uă hìu nhă rơhời kơl jăp rài kis, lik klàs rơƀah, brồ guh lơh pas, pơgồp bal tàm broă bơ̆t bơtàu ƀòn lơgar tiah brê bơnơm dờng ngai sơlơ bơtàu tơnguh. Broă lơh sa suơn sre càr Dăk Lăk dê mhar geh uă bơta mờ kơl jăp.

VOV.K'Ho- Tơnơ̆ rơndăp tăp sèng klờng ơdŭ tàm Dăk Lăk, jơnau jơngkah, ờ tơl pơgru tàm bàr pe tiah, ai cau lơh broă mờ bơsong bơta dong kờl gam gơ tơlik uă broă kờñ pal tă bơsong.

VOV.K'Ho- Ngai 13/10, tàm sơnah ƀòn Quy Nhơn, càr Gia Lai, Ƀộ Kwang àng bơyai lơh dơ̆ sơnđờm lơh rơndăp broă lơh bơ̆t bơtàu hìu ơm ai mpồl phàu crong Kwang àng Làng bol in.

VOV.K'Ho- Bơh jơnau làng bol yal, mpồl lơh broă jòi rồ neh jòi gŏ, rồ tơrgùm 3 ƀồc ntìng cau ling chơ̆t màng bal mờ uă phan lời wơl tàm jơnum làng bol tiah drà Lộc Thuận, sơnah ƀòn An Nhơn Bắc, càr Gia Lai.

VOV.K'Ho- Bơh bồ nhai 10 tus tŭ do, mpồl lơh broă geh gơnoar càr Khánh Hoà neh jòi rồ, tơrgùm geh 9 ƀồc ntìng cau ling chơ̆t màng tàm sàh Phước Dinh.

VOV.K’Ho- Mpồl K52, Cơldŭ Chính trị, Gah đơng lam Ling klàng càr Gia Lai pa bơyai lơh lòt jòi, rồ tơrgùm geh dùl ƀồc ntìng cau chơt màng tàm jơnum làng bol tiah drà Lộc Thuận, sơnah ƀòn An Nhơn Bắc, càr Gia Lai.

VOV.K’Ho- Pơrjum tàm tìp, tìp mat tơm boh bơr đah đơng lam càr Dăk Lăk mờ đoàn viên, cau lơh broă mờ kwang bàng mpồl ala mat cau lơh broă nam 2026 geh bơyai lơh mờ uă jơnau đơs tơrgùm tàm ală broă kuơmàng bè broă lơh, priă nhai, sền gàr rềs àr mpồl bơtiàn, hìu ơm, lơngăp lơngai lơh broă mờ ală bơta nàng lơh broă. Bơh ală jơnau đơs, jơnau dan di mờ bơta mùl màl, uă broă lơh geh anih lơh broă geh gơnoar ai tơlik, ai tơnggŏ nùs nhơm iat kơno, lòt bal mờ bơsong ală broă bơh kâp hơ đơm.

VOV.K’Ho- Gơwèt mờ làng bol tiah sar lơgar ngài, tiah làng bol jơi bơtiàn dồ ết nă cau, broă bơsram mờ pơrlòng sră măi rơndeh ờ mìng kòl yan priă jền lơm mờ gam gơtìp kal ke tài bơh ù tiah ơm ngài, dà đơs. Tàm càr Gia Lai, bơh sàh bồt Nhơn Châu tus ală ƀòn tiah nhàr lơgar, broă lơh “Sră măi rơndeh kờñ gơboh” gam tă bơsong ală kơryan do, ai bơta gĭt wă adat boh lam mờ bơta chài lòt rê tàm gùng lơngăp lơngai tus rềp rlau tai mờ làng bol.

VOV.K’Ho- Sền gàr rềs àr mpồl bơtiàn là broă dong kờl bơh dà lơgar dê dong cau lơh broă tŭ kra geh dờp priă nhai rê rlô lơh broă pah nhai mờ sền gàr pràn kơldăng. Bơdìh mờ ală cau pal blơi sră sền gàr rềs àr mpồl bơtiàn (bơh cau tờm ngui cau lơh broă dê tă pơgồp bơnah uă priă tă blơi sră sền gàr rềs àr), làng bol tàm sơnam lơh broă ndrờm gơtùi blơi is sră sền gàr rềs àr mpồl bơtiàn nàng geh dờp broă dong kờl do. Tàm hơ̆, ală khà tă blơi sră sền gàr rềs àr mpồl bơtiàn geh dà lơgar dong kờl dùl bơnah.

VOV.K'Ho- Bơh jơnau yal geh cau ling yau 73 sơnam dê yal neh dong kờl mpồl lòt jòi rồ, tơrgùm mờ đal git di pal tiah tơ̆p ƀồc cau ling chơ̆t màng Trương Văn Tiến tơnơ̆ mờ rơlao 50 nam.