VOV.Xơ Đăng - Hâi lơ 15/5, a pơlê kong kơdrâm Kon Tum, Vi ƀan kong pơlê Kon Tum tơkŭm po Tơdroăng ‘’Kơphế Khu tê mơdró - Ngế tê mơdró khế 5 hơnăm 2025’’.

VOV.Xơ Đăng - ­Kơxo lơ 15/5, a Hngêi rơhdruê Hồ Gươm, Hà Nội hiăng tơkŭm po Leh kheăn kơdeăn 500 muăn nguăn Pôa Hồ ki má môi lâp tơnêi têa roh má 10 – hơnăm 2025. Veăng leh kheăn kơdeăn ai pôa Lương Cường, Kăn xiâm hnê ngăn tơnêi têa rơtế ƀă hên khu râ kăn pơkuâ Đảng, Tơnêi têa.

VOV.Xơ Đăng - Hâi lơ 15/5,  Khu pơkuâ hnê ngăn Đảng ủy kong pơlê Dak Lak hiăng diâp pri ăm mâu ngế chêh ƀai văn hok, nghê̆ thuât, hlá tơbeăng ki rơkê ‘na tơdroăng “Hriâm ƀă pêi pro tiô tuăn mơno, tơdroăng ki lĕm, túa pêi cheăng dêi Hồ Chí Minh” rôh má II (2023-2025).

VOV.Xơ Đăng - Tơbâ 135 hơnăm Hâi Pôa Hồ Chí Minh, Kăn xiâm pơkuâ hnê ngăn tơnêi têa ki apoăng, hâi lơ 15/5, pôa Tô Lâm, Kăn xiâm pơkuâ hnê ngăn Đảng pơkuâ djâ khu kăn pêi cheăng dêi Tíu xiâm tơnêi têa lăm pôu pêi cheăng ƀă Khu kăn Đảng kong pơlê Nghệ An ‘na tơdroăng pêi pro tiô troăng hơlâ pro rế lĕm tíu pêi cheăng, rah iâ mơngế, mơdêk hnoăng cheăng pêi pơxúa tơƀrê dêi khu kăn; ƀă pêi tiô tơdroăng hbrâ hneăng Hôp kân Đảng ƀô̆ rêm râ.

VOV.Xơ Đăng - Pơtối tơdroăng rôh hôp, kơxo hâi  hơ 15/5, Kuô̆k hô̆i hiăng tơmâng ƀă têk kŏng vâ tơbleăng tơdroăng ‘mâi hơ’lêh tơdroăng rôh hôp má 9, Kuô̆k hô̆i hneăg 15.

VOV.Xơ Đăng - Tiô riân ngăn dêi Kŏng an kong pơlê Gia Lai, sap ing apoăng hơnăm 2024 troh nôkố, lâp kong pơlê ai 114 rôh hêak pơloi ing măng pơlê pơla, ƀă mâu tơdroăng ki vâi pơloi  rế hía rế rơkê, ôh ti chiâng ‘nâi. Sap ing mâu rôh krếo phôn hêak inâi ngế cheăng tung kơvâ on tơhrik, troh mâu tin nhăn pơlông djâ pêi mâu tơdroăng ki châ liăn tơkâ hên tung măng pơlê pơla ƀă hên ki ê bu môi péa tơdroăng ki tiê hmâng vâ hên ngế hiăng hía tâi liăn ngân, thăm nếo hía lối hrĭng rơtuh liăn.

VOV.Xơ Đăng -  ­Hâi lơ 14/5, a pơlê kong kơdrâm Pleiku, Khu pơkuâ Đoân Droh rơtăm Gia Lai tơkŭm po Hneăng hôp mơgêi 10 hơnăm pêi pro Pơkâ dêi Khu xiâm kal kí ‘na mơdêk ó rơdêi hriâm tâp ƀă pêi tiô troăng tơdjâ hiâm mơno Hồ Chí Minh ƀă kheăn kơdeăn ‘’Droh rơtăm ki rơkê pêi tiô rơkong Pôa Hồ’’.

VOV.Xơ Đăng - Kơxo lơ 15/5, Kuô̆k hô̆i tơpui tơno a hngêi hôp kân ‘na Tơdroăng tơkêa bro Luât on tơhrik kơtâu ƀă trếo tik nik (‘mâi rơnêu).

VOV.Xơ Đăng - Hâi lơ 14/5, Vi ƀan hnê ngăn kong pơlê Dak Lak hiăng pơkâ Túa tơkŭm po xo rơkong tơpui kuăn pơlê ƀă kơxop mơéa Pơkâ ‘mâi pơhlêh, ‘mot tơ’nôm mâu tơdroăng dêi Luât tơnêi têa Kŏng hoa xah hô̆i chuh ngiah Việt Nam hơnăm 2013.

VOV.Xơ Đăng - Kơxo hâi lơ 14/5 a tíu pêi cheăng xiâm Chin phuh, pôa Phạm Minh Chính, Ngế pro xiâm hnê ngăn Chin phuh pơkuâ hôp tơmâng tơbleăng ‘na tơdroăng plâ mơdât tê mơdró liu, ôh tá tơdrăng tung mơdró kâ tê tơmeăm ki ôh tá xê khât, tơmeăm bu bối tung mâu hơnăm la ngiâ.