Dom harei tapa, di mangaok dom blah web, hu dom po radaih brei thau bruk pandik hatai tuk ba radaih nao tauk “thẻ thu phí tự động” oh padeih radaih (ieu katut lac ETC) meng thau lac radaih di drei hu tauk thẻ dahlau di nan bo po radaih oh thau hagait. Mỹ Hà – urang vak di rayo sap ndom VN hu kadha vak brei thau ka tavak tavaiy ini tapa kadha vak hadei ini:

Cục Cakrok Doanh nghiệp – Mintri Kế hoạch saong Đầu tư pambuk haong Mintri Dom bruk dunya Canada (GAC) saong Danak dak Patagok Liên Hợp Quốc (UNDP) bahrau brei thau 29 doanh nghiệp hu daong “Pok daong doanh nghiệp ngak salih bahrau menuac sia pacang caga haong jit Covid-19”. Dalam nan hu 20 doanh nghiệp kayua urang kumei ngak po saong 4 doanh nghiệp kayua urang jaoh jo ngak po, 51 doanh nghiệp hu daong pablei tapa negar langiu.

Bruk ba tabiak danak dak padang ngak mblang kapal haoh pakat dunya Long Thành di dom urang khik ramik saong tacei ba bruk taneh ia, hu dom urang ilamu, chuyên gia kinh tế ginum biai, hu tuk kamlah gauk, pasang iek biak catang. Danak dak hu Thủ tướng rajaei mbaoh tangin brei ngak di bilan 6-2011, hu ba tagok ginum biai di Quốc hội saong brei tapa dalam mbang nyaom bilan 6-2015. Sa bruk pilih ruah hadah krah brei mboh jalan maong atah di dom urang pan akaok Đảng, Karja saong Quốc hội. Kadha vak “Mblang kapal haoh Long Thành – bruk salih bahrau khang di harei hadei” di urang vak Dương Trọng Dật di mangaok báo SGGP:

Dalam dom mbang pa-atah di gauk kayua jit Covid-19, Ninh Thuận hu 14.000 urang ngak meng dom tỉnh, ban gah Meraong mai veik palei. Tuk jit ruak hu pasang iek tani tanat, langiu dom urang ngak nao veik labik ngak bruk, hu oh takik urang ngak daok veik palei duah bruk ngak. Piah daong ka rahra atah bruk ngak nong min oh nao atah palei, karja palei kham merat pambuak bruk, ba mbuan lagaih ka dom doanh nghiệp mai ngak mbang, pato bruk ngak ka urang ngak… Kadha vak di Minh Triều, urang pambuak bruk haong danak dak, hu ndom ka bruk ini:

Điểm pilih ruah iek tui học bạ di rilo sang bac ĐH thun ini tagok khang duk haong thun dahlau, saong hu oh takik gah bac, điểm piah hu pilih ruah daok yam tapa 30 điểm, tui nan, rilo anek saih hu 30 điểm oh tame hu ĐH tuk pilih ruah tui jalan ini. “Pilih ruah anek saih thun 2022: điểm pilih ruah iek tui học bạ tagok glaong” lac kadha vak di urang vak Minh Hường.

Mai meng hatai caong khin khik ramik yaom kaom kaya ngui praong glaong alak ragam ragu meng kan jaman dalau di bangsa, rilo thun tapa, nghệ nhân ưu tú Thổ Đồng - urang main ragam ragu bangsa Cam daok di xã Phan Thanh, huyện Bắc Bình, tỉnh Bình Thuận tuk halei jeng kham marat pato padar brei ka dom urang ranaih tapa bruk duah jalan ngak bahrau, khik ramik dom ragam ragu jaman muk kei meng kan di bangsa. Kadha cih vak di Khánh Vĩnh ba tagok online Bình Thuận ndem mayai tal ong Thổ Đồng:

Bruk pala bingu kiểng lac sa dalam dom janih pandap hu prein khang di urang ngak nong palei bingu ban sit Sa Đéc, tỉnh Đồng Tháp. Ban sit Sa Đéc hu jaik 700 ha taneh pala bingu kiểng gam haong 2.300 sang pala saong pablei salih bingu kiểng. Dalam dom thun jaik di ini, bruk pamaong tal pala do janih bingu kiểng sit, mekre ngak pandap alin hadiah daok jeng jalan nao bahrau daong ka urang ngak nong tagok jien mek tame. Kadha vak “Urang ngak nong Sa Đéc sahneng duah bgak brei bingu kiểng jeng pandap alin hadiah” di urang vak Thanh Nghĩa mangaok báo Đồng Tháp.

Tỉnh Bình Thuận urak ini hu 35 bangsa, dalam nan bangsa Cam hu labaih 40.000 urang. Dom thun jaik di ini, tỉnh hu peih ngak siam lagaih sarak nagar di bruk khik ramik saong patagok dom yaom glaong inem krung ilamu di bangsa takik saong bhum ceik di dalam tỉnh. Dalam nan, bruk khik ramik kadha adaoh, kadha tamia, alak ragam ragu di dom bangsa takik jeng hu brei sangka tal. Jaik taong abih di nyu nan lac dom bangsa takik dalam tỉnh jeng daok khik ramik ilamu ragu bangsa di drei dalam raidiuk rahra. Kadha vak di Jasi- urang vak di rayo sap ndem VN daok di ban raya HCM hu ndem tal:

Kaya glai dak harei dak takik nao, kaya nong ngak tabiak kan pablei atau pala drak hu takik, yaom lap, nan ye dak harei dak hu rilo mikva urang bangsa takik dalam tỉnh Ninh Thuận nao ngak công nhân piah duah jien pasiam raidiuk. Kadha vak “Tuk urang bangsa takik klaak ceik nao ngak công nhân” di Ninh Chính mangaok báo Ninh Thuận hu khan ka bruk nan.

Bruk lac bhum taneran kraong Cuu Long lavik lavik nao mbuan ralai lahik kayua kurang phù sa saong cuah oh daok lac panuac ndom angaok dom harak pathau khan ilamu khoa học. Anak meta mboh lac urak ini meng bhum akaok kraong Cửu Long tal jhung Mũi Cà Mau, bruk glut jaleih takai kraong, takai tasik dak harei dak khang, dak trak. Kayua halei bhum taneran kraong Cuu Long glut jaleih dak harei dak khang, lac kadha vak di Chí Nhân mangaok báo Thanh Niên.