VOV.Xơ Đăng - Kơxê lơ 10/6, a Tíu pêi cheăng Kăn xiâm hnê ngăn tơnêi têa, pôa Lương Cường, Kăn xiâm hnê ngăn tơnêi têa hiăng trâm mâ mâu ngê̆ nhân ki kơhnâ rơkê troh ing lối 5.400 pơlê tung lâp tơnêi têa, klăng roh leh tơbâ 20 hơnăm hâi mơjiâng Khu tơrŭm Pơlê pêi cheăng tiô khôi vâi krâ nah Việt Nam.

VOV.Xơ Đăng - Kơxê hâi lơ 10/6, a tíu pêi cheăng Xiâm Đảng, pôa Tô Lâm, Kăn xiâm pơkuâ hnê ngăn Đảng hiăng tơdah pôa Alex Rogers, Kăn xiâm hnê ngăn pơkuâ tơdroăng Kal tung lâp plâi tơnêi dêi Grup Qualcomm (Mih).

VOV.Xơ Đăng - Tung rôh lăm pôu Pơhlăng, hâi lơ 10/6, pôa Phạm Minh Chính, Ngế pro xiâm hnê ngăn tơnêi têa ƀă kơdrâi pôa hiăng trâm kăn teăng mâ kuăn pơlê mơngế Việt Nam ƀă mâu kăn ƀô̆ mâu kơ koan teăng mâ a Pơhlăng.

VOV.Xơ Đăng - Pôa Phạm Minh Chính, Ngế pro xiâm hnê ngăn tơnêi têa nếo ai mơ-éa ki kal pơtroh Kăn xiâm mâu Khu xiâm: Kŏng an, Mơjiâng tơmeăm, Pêi chiâk deăng ƀă Kong prâi, Kơmăi kơmok tê mơdró; Kăn hnê ngăn Vi ƀan Kuăn pơlê mâu kong pơlê, pơlê kong kơdrâm ối tung tơnêi têa ‘na pơkuâ, rak tơniăn yă tơmeăm mơjiâng pro hngêi trăng.

VOV.Xơ Đăng - Kơxo lơ 9/6, a pơlê kong kơdrâm Việt Trì, pôa Tô Lâm, Kăn xiâm pơkuâ hnê ngăn Đảng pơkuâ roh pêi cheăng ƀă Khu pơkuâ hnê mơhno tơdroăng cheăng Đảng mâu kong pơlê Phú Thọ, Vĩnh Phúc ƀă Hoà Bình ‘na tơdroăng ki ai ƀă tơdroăng châ tơƀrê po rơdâ pêi pro mâu Pơkâ, Mơgêi dêi Tơnêi têa;

VOV.Xơ Đăng - Hâi lơ 9/6, drêng veăng hôp a Rôh hôp Khu râ kăn xiâm rôh má 3 dêi Khu lâp kong têa ‘na Têa kơxĭ a Pơhlăng, pôa Phạm Minh Chính, Ngế pro xiâm hnê ngăn Chin phuh hiăng ai 2 rôh trâm Kăn hnê ngăn Hô̆i đong Châu Âu Antinio Costa ƀă Kăn hnê ngăn Vi ƀan châu Âu Ursula von der Leyen.

VOV.Xơ Đăng - Ƀă hnoăng cheăng xiâm cho thăm mơdêk tơdroăng ki rơkê plĕng tung pơkuâ ngăn, rak vế tơdâng tung châ hnê hriâm ăm rêm ngế kuăn pơlê, ki rơhêng vâ tối cho kuăn ‘nĕng hdroâng kuăn ngo ki iâ mơngế, Đảng ƀă Tơnêi têa hiăng mơ’no hên troăng tơdjâ, hnoăng tŏng gum kơjo pêi pro vâ mơnhông ‘na hnê hjriâm a pơlê cheăm kơpơng hơngế hơngo, kơpong ki malối kơtiê xahpá môi tiah a Tây Nguyên. Roh hop “Ki păng’nâng ‘na hnê hriâm ƀă Hnê mơjiâng tuăn ngôa rơkê kơpong Tây Nguyên ƀă veăng hnê tối, mơjiâng Tơdroăng tơkêa pêi thăm mơdêk ki dâi rơkê ăm hnê hriâm, hnê mơjiâng tuăn ngôa rơkê ăm hdroâng kuăn ngo a Tây Nguyên” xua Khu xiâm ngăn’na hnê hriâm ƀă Hnê mơjiâng tuăn ngôa rơkê tơnêi têa tơkŭm po a kong pơlê Dak Lak nếo achê kố cho ki xiâm vâ mơnhên tơdroăng mê.

VOV.Xơ Đăng - Ngế pro xiâm hnê ngăn Chin phuh krếo thế mâu kong têa tung lâp plâi tơnêi kal pêi pro rĕng tâ, rơdêi tâ, kơtăng tâ nếo ƀă kal ai tơdroăng tơdjuôm ivá dêi mâu kong têa, kơpong ƀă lâp plâi tơnêi tung rak vế ƀă xúa krá tơniăn têa kơxĭ ngiât.

VOV.Xơ Đăng - Rơtế ƀă lâp tơnêi têa, kơvâ hnê hriâm ƀă hnê mơjiâng tuăn ngoâ rơkê mâu kong pơlê Dak Lak, Kon Tum dế pêi pro klêi mâu tơdroăng hbrâ rơnáu vâ rak vế tơniăn Hneăng hôp râ má pái trung hok phôh thong hơnăm 2025 châ po tơniăn, kơtăng ƀă tro pơkâ.

VOV.Xơ Đăng - Klêi tơkŭm, hiăng ai lối 280 rơtuh tơdroăng veăng hnê tối dêi kơ koan, khu tơrŭm cheăng, mâu ngế ƀă tâi tâng mâu tơdroăng kal, tơdroăng chêh tung luât Pơkâ; tung mê, tâng riên ki kơxô̆ ngế vâ môi tuăn ai 99,75%.