VOV.Êđê- Lŏ dơ̆ng Klei bi kƀĭn tal 10, hruê kăm êgao, Anôk bruă kƀĭn ala bi mklă leh hdră mtrŭn yuôm bhăn, anăn jing Hdră mtrŭn kơ hdră kčah mđĭ kyar bruă duh mkra – ala ƀuôn thŭn 2026 lehanăn Hdră mtrŭn klei đăo tĭng ngăn prăk knŭk kna thŭn 2026. Năng mđing, mta kñăm đĭ kyar bruă duh mkra thŭn 2026 mâo Anôk bruă kƀĭn ala jao mơ̆ng 10% kơ dlông, hnư hrui wĭt kah knar grăp čô mơ̆ng 5.400 truh 5.500 USD.

VOV.Êđê - Hlăm lu thŭn êgao, ti čar Gia Lai, êngao kơ bruă klam srăng ngă bruă leh anăn mđĭ kyar bruă duh mkra lĭng kahan, dŭm êpul lĭng kahan pŏk ngă leh lu gru hmô čung ba mnuih ƀuôn sang mbruă, kah mbha klei dleh dlan, đru hơĭt klei hdĭp mda duh ƀơ̆ng, čiăng mđĭ hnơ̆ng jăk klei hdĭp mda. Klei anei ăt ba klei jiă kma êlam, hyuă kjăp klei khăp plah wah lĭng kahan leh anăn mnuih ƀuôn sang alŭ wăl.

VOV.Êđê - Tlam mbrue 11/11, ti msat phung kahan djiê êngiă Chư Prông, Knơ̆ng bruă sang čư̆ êa čar Gia Lai mkŏ mjing leh klei čang ênuh, mkŏ mjing klei dơr klang kleh 18 čô phung djiê êngiă hlăm klei bi blah hŏng Mi.

VOV.Êđê- Mrâo anei, K’iăng Khua Knŭk kna Hồ Quốc Dũng nao čuă, mđup brei mnơ̆ng kơ mnuih ƀuôn sang hmăi mơ̆ng angĭn êbŭ mrô 13 ti dŭm ƀuôn hgŭm Ngŏ čar Gia Lai.

VOV.Êđê- Hlăm klei bi kƀĭn tal 10, Bruă kƀĭn ala gưl XV, Bruă kƀĭn ala bi trông hlăm Êpul kơ hră čih Hdră bhiăn mkra mlih, mbŏ dŭm mta mơ̆ng 15 hdră bhiăn hlăm bruă lŏ hma leh anăn wăl hdĭp mda. Sa hlăm dŭm mta phŭn mâo lu phung bi ala mđing dlăng jing mbha gưl kơ alŭ wăl hlăm bruă kriê dlăng bruă rông mnơ̆ng, mdrao kơ mnơ̆ng rông leh anăn pla mjing, kñăm răng mgang klei pral, mbruă hlăm klei kriê dlăng, mguôp hŏng bruă klam bruă sang čư̆ êa alŭ wăl nah gŭ, mbĭt anăn msir klei kpăk đuôm mơ̆ng boh sĭt pŏk ngă hlăm wưng êgao.

VOV.Êđê - Anôk bruă kahan ksiêm čar Gia Lai dôk mtrŭt mđĭ hdră mjuăt bi hriăm, mkăp hră dưi mgăt êdeh mrô A1 amâo mă prăk kơ mnuih djuê ƀiă dleh dlan, mnuih hdĭp ti krĭng tlaih kbưi, krĭng knông lăn ti alŭ wăl čar. Bruă anei kñăm mđĭ klei thâo săng kơ mnuih ƀuôn sang kñăm gang mkhư̆, đru bi hrŏ klei truh hlăm êlan klông ti krĭng mnuih djuê ƀiă.

VOV.Êđê - Hluê ngă gru hmô bruă knŭk kna alŭ wăl dua gưl, Khua anôk bruă kƀĭn ala Trần Thanh Mẫn lač, êjai dôk mâo lu klei lông dlăng, dŭm alŭ wăl brei mtrŭt mđĭ pral bruă bi mlih mrô, ba yua kdrăp kreh knhâo – mrâo mrang čiăng ngă bruă tŭ dưn khădah ƀiă mnuih mă bruă.

VOV.Êđê- Hlăm klei bi kƀĭn tal 4 ( thơ̆ng) Êpul gơ̆ng bruă ƀuôn sang čar Gia Lai gưl XII hruê 27/10, Êpul gơ̆ng bruă ƀuôn sang čar bi mklă leh Hdră mtrŭn hdră êlan đru hơĭt kjăp klei hdĭp mda hŏng phung trah mă kan mâo kŭm păn amâo djăp klei găl hiu ngă bruă.

VOV.Êđê – Hluê ngă hdră êlan mtrŭn mơ̆ng Đảng lehanăn Knŭk kna kơ hdră mđĭ kyar bruă mtô bi hriăm krĭng knông lăn, čar Lâm Đồng dôk bi leh dŭm hdră mprăp čiăng mdơ̆ng 2 hlăm ênoh 5 boh sang hră hlăm thŭn 2025 anei.

VOV.Êđê – Hrue mbrue (26/10), Khua bruă Đảng čar Daklak Lương Nguyễn Minh Triết djă akŏ êpul mă bruă mơ̆ng čar nao ksiêm hlăm dŭm anôk mâo hdră êlan pioh rŭ mdơ̆ng sang hră knŭk kna čiêm rông ti krĭng knông lăn, mă bruă hŏng dŭm boh kđông răng mgang knông lăn Ea H'leo lehanăn knŏng bruă sang čư̆ êa ƀuôn hgŭm Ia Lốp.