VOV.Êđê- Hruê kăm êgao, ti gŭ klei gĭt gai mơ̆ng Khua bruă kƀĭn ala Trần Thanh Mẫn, Bruă kƀĭn ala bi trông kơ klei hưn mdah ksiêm dlăng wưng mơ̆ng bruă kƀĭn ala gưl XV leh anăn wưng 2021-2026 mơ̆ng knŭk kna. Hlăm boh klei lu klei bi mlih, phung bi ala bi mni kơ jih dua wưng mâo lu klei jăk siam hŏng ai tiê ngă bruă pral, mbruă, đua klam, mbĭt anăn kčĕ hdră tă prŏng kñăm bi leh klei bhiăn, mđĭ klei tŭ dưn ksiêm dlăng leh anăn mđĭ kyar hơĭt kjăp hlăm wưng kơ anăp.

VOV.Êđê- Aguah 4/12, ti alŭ Chung Tam, Knơ̆ng bruă sang čư̆ êa să Măng Ri, čar Quảng Ngãi mkŏ mjing knăm pŏk ngă mđing kơ “Hdră Quang Trung - Mjêč mdơ̆ng sang mrâo, hơĭt klei hdĭp mda kơ mnuih ƀuôn sang să Măng Ri”.

VOV.Êđê- Khua gĭt gai Đảng Tô Lâm mñă bruă dlăng kriê mnuih amâo jăk asei mlei amâo djŏ knŏng bi êdah klei khăp ƀiădah lŏ jing giê mkă klei kreh dhar, jing klei čiăng mơ̆ng hdră mđĭ kyar hơĭt kjăp lehanăn ñŭ kma tar rŏng lăn.

VOV.Êđê - Hră čih hưn mdah kđi čar mơ̆ng Anôk dlăng bruă Đảng gưl XIV mñă klă: “Mkŏ mjing êpul knuă druh gĭt gai, kriê dlăng dŭm gưl mơ̆ng bruă kđi čar, boh nik hdră bruă leh anăn gưl nah gŭ klă sĭt êdah êdi, mâo klei mĭn, klei thâo kriê dlăng mrâo mrang, djŏ guôp hŏng gru hmô mkŏ mjing mrâo leh anăn brei đĭ kyar êdah êdi mơ̆ng lăn čar. Boh phŭn anei mâo knuă druh, đảng viên dŭm čar čư̆ čhiăng, knông lăn boh nik mđing yên leh anăn mâo lu klei blŭ mguôp jih ai tiê kơ hdră msir kƀĭn hlue ngă hlăm wưng kơ anăp

VOV.Êđê - Mbĭt hŏng Dak Lak, Knăm mphŭn rŭ mkra hdră bruă mjêč mdơ̆ng sang đru kơ mnuih ƀuôn sang krĭng êa lip ăt mkŏ mjing ti čar Gia Lai, Khánh Hoà hŏng ênoh bi liê ƀiă êdĭ 170 êklăk/boh sang

VOV.Êđê - Bruă mdrao mgŭn mbĭt hŏng hdră dhar kreh, mtô bi hriăm jing dŭm bruă phŭn yuôm bhăn, amâo djŏ knŏng jing hnơ̆ng čuăn ƀiădah lŏ jing boh kdrŭt čiăng mđĭ kyar klei thâo mnuih mă bruă. Anei jing klei blŭ hrăm mơ̆ng Khua gĭt gai Đảng Tô Lâm leh Anôk bruă kƀĭn ala bi trông ti êpul kơ 2 Hdră kñăm ala čar kơ bruă kriê dlăng klei suaih pral, ênoh mnuih lehanăn mđĭ kyar; lehanăn Hdră bi mrâo mrang, mđĭ hnơ̆ng tŭ jăk hdră mtô bi hriăm wưng thŭn 2026 – 2035. Hluê si Khua gĭt gai Đảng, mta kñăm ala čar amâo djŏ knŏng hjăn anôk bruă mtô bi hriăm amâo dah mdrao mgŭn, ƀiădah mơ̆ng kluôm ala ƀuôn, jih jang mnuih ƀuôn sang brei ngă bruă; Brei tŭ ư mta kñăm, amâo mđĭ mđăl, kah mbha mnuih ngă bruă, kyua knhal tuič mnuih ƀuôn sang jing mnuih dưi dưn klă sĭt.

VOV.Êđê- 200 hnư mnơ̆ng, grăp hnư 10 kg braih, dưi ba mơĭt kơ 200 gŏ sang ti dua să Hoà Thịnh lehanăn Đồng Hòa – dŭm gŏ sang hmăi kjham hĭn.

VOV.Êđê- Khua knơ̆ng bruă sang čư̆ êa čar Lâm Đồng mrâo mtrŭn leh klei bi klă tŭ yap 95 boh ƀuôn hgŭm krĭng čư̆ čhiăng hlăm čar.

VOV.Êđê- Truh ară anei, êa lip ti Dak Lak, Gia Lai hrŏ leh jih, amâo lŏ mâo ôh gŏ êsei bi ktlah hjăn. Ti dŭm alŭ wăl êa lip mrâo hrŏ, êpul lĭng kahan alŭ wăl, Êpul kahan 5 leh anăn Êpul kahan 34 lŏ dơ̆ng dôk đru kơ mnuih ƀuôn sang msir boh jhat yan adiê ngă, kơrŭ wĭt mkra mjing leh anăn lŏ mkŏ mjing klei hdĭp mda.

VOV.Êđê- Knơ̆ng bruă sang čư̆ êa să Phan Sơn, Lâm Đồng (hlăm kdriêk Bắc Bình, Bình Thuận hđăp) mdơ̆ng 4 boh sang kơ mnuih djuê ƀiă dleh dlan.