VOV.Jarai - Giăm hrơi mut sang hră laih, samơ̆ Sang hră kơnuk kơna čem rông tơring čar Lâm Đồng (gah tơring čar Bình Thuận hơđăp) ăt dŏ dơngok sang hră nua truh 61 klai prăk aka ƀu pơkra giong.

VOV.Jarai-Ngă tui “Bruă mă jak iâu 500 hrơi mlam pơtrut hmar hơduah ĕp, kuai mă hăng pơtong anăn mơ̆ng tơhan ƀing tơhan pơsăn drơi”, Khul khua git gai mrô 515 tơring čar Lâm Đồng hơmâo ngă giong laih bruă mă čơđeh meh tơlang pioh ba pơčrang ADN, tañ hloh 3 blan pơkă hăng akŏ bruă jao.

VOV.Jarai - Ƀơi mông jơnum akŏ bruă tal dua, Khul khua pơ ala mơnuih ƀôn sang tơring čar Dak Lăk tal XI phrâo pơsit mă yua Hră pơtrun pơkă rơnoh prăk djru hăng mơnuih mă bruă ƀơi plơi pla ƀôn ƀut; bruă ngă rah bruă anai bruă adih hăng prăk djru lơ̆m ngă lu mơta bruă; laih dong pơkă mrô, anăn bruă mă, hăng rơnoh prăk djru hăng mơnuih ngă bruă amăng plơi pla ƀôn ƀut.

VOV.Jarai-Ping gah sang bruă Jơnum min mơnuih ƀôn sang tơring čar Gia Lai hơmâo ngă hră mơ-it đĭ kơ Khul apăn bruă phun ping gah tơring čar, kơ jơlan hơdră djru brơi soh hơdrôm hră hrăm kơ 182.000 čô čơđai sang hră kơnuk kơna djru ba, rơnoh prăk abih tih him lăng năng ai 42 klai prăk, mă prăk ngăn drăp kơnuk kơna tơring čar thun 2026.

VOV.Jarai - Truh ră anai, tơring čar Lâm Đồng mă laih čơđeh tơlang hăng pơmut mrô abih tơlơi pơhing mơ̆ng 3.040 amăng mrô 4.776 boh pơsat aka ƀu thâo anăn krăn pô.

VOV.Jarai-Ƀơi mông jơnum ƀu tui tơđar lok Sa, khua mua pơ ala mơnuih ƀôn sang dêh čar tal XVI phrâo anai, lơ̆m pơčrong sai ƀơi grup kơ Tơlơi phiăn Pơtô brơi, pơlar tui hrăm tơlơi phiăn čih pơhrua, Khua git gai pơ ala mơnuih ƀôn sang dêh čar ơi Trần Thanh Mẫn lăi pơtong, bruă čih pơkra tơlơi phiăn ƀu kơnong ngă giong hnơ̆ng pơkă amăng tơlơi phiăn đôč ôh, dŏ ngă kiăng djơ̆ tơlơi čang rơmang mơ̆ng mơnuih ruah khua hơmâo sa atur tơlơi phiăn giăm ană plơi, amuñ ngă tui hăng ba glăi tơlơi hiam klă amăng tơlơi hơdip mơda.

VOV.Jarai-Việt Nam lĕ dêh čar hơmâo lu tơlơi đăo. Rơbêh 95% mrô mơnuih tui tơlơi đăo phara. Rup rap kơ bruă ngă yang hơmâo djop mơta, pơmut hrŏm hăng tơlơi hơdip rĭm hrơi. Ƀơi hơdôm boh plơi prong ƀudah kual plơi pla, hơdôm sang jơnum lêng kơ pok bah amăng čơkă ƀing mơnuih tui đăo nao jơnum tui tơđar hăng amăng hơdôm hrơi ngă yang pơprong. Ƀing mơnuih tui tơlơi đăo tui hluai pơdah pran jua đăo sit hăng tơlơi đăo gơñu kiăo tui.

VOV.Jarai-Kiăng ngă giong 2 boh sang hră đôm lăm kơnuk kơna čem rông čơđai sang hră djuai ƀiă dua gưl I hăng II ƀơi hơdôm să guai dêh čar Thuận An hăng Quảng Trực hmao hăng thun hrăm phrâo 2026-2027, Jơnum min mơnuih ƀôn sang tơring čar Lâm Đồng git gai pơčrâo bruă khut khăt, krăp lăng tong ten rơnoh mă bruă kiăng hmao hrơi pơkă laih anun prăp lui klă mut thun hrăm phrâo.

VOV.Jarai-Tơlơi blah wang rơgao pơ klôn adih ha mơkrah rơnuk thun laih, samơ̆ hơdôm rơbâo čô tơhan djai pơsăn drơi aka ƀu ĕp ƀuh pơsat hăng tơlang tơleh, aka ƀu thâo anăn krăn pô. Hăng ƀing tơhan dŏ mă bruă hyu rŭ kuai ră anai, rim kơ črăn hyu hơduah ĕp ƀu kơnong sa bruă mă kơđi čar yom đôč ôh, dŏ jing jơlan gah kiăng ba glăi ƀing anong wa, ơi yă, met neh pơsăn drơi dưi glăi pơ plơi pla, sang anŏ laih anun thâo anăn krăn pô. Ƀơi Dak Lak, Bruă ngă 500 hrơi mlam pơtrut duah ĕp, pơtum pơƀut hăng pơtong rơđah anăn krăn pô tơhan pơsăn drơi hlăk pok pơhai hmar hăng khut khăt, djru ngă sa bruă hơdor tơngia tong ten hăng ƀing tuh drah pơčah asar yua tơlơi rơngai, mơai pô kơ lŏn ia.

VOV.Jarai-Kơnôl 5/8, Anom bruă git gai tơhan tơring čar Khánh Hòa gum hrŏm hăng gưl Ping gah, gong gai ƀon lan hăng pô sang pơphun klơi đĭ tơlang tơhan Ka Tơr Tiên ƀơi plơi Tà Nôi, să Anh Dũng.