VOV.Jarai - Mơguah kơnôl 22/9, Ping gah, Khul khua pơ ala mơnuih ƀôn sang, Jơnum min mơnuih ƀôn sang, Jơnum min djŏp djuai ania mơnuih mơnam Việt Nam să Tu Mơ Rông ngă hrŏm hăng să Đăk Tờ Kan, tơring čar Quảng Ngãi ngă yang jôk atâo, hơ-ŭ hăng ba pơyua tơhan djai drơi kơ lŏn ia rơgŏm ơi A Ngõa, ƀơi Pơsat tơhan Tu Mơ Rông.

VOV.Jarai-Dong mơng kơnôl 18-21/9, hơdôm anom bruă amăng Anom bruă git gai tơhan wai pơgang guai tơring čar Dak Lak gum hrŏm hăng gưl Ping gah, gong gai ƀon lan, hơdôm anom bruă, sang bruă hăng ƀing mơnuih čơmah pơphun lu tơlơi ngui ƀrô bơyan blan bơrơmi, ƀơk rơbêh 2.200 anung gơnam brơi ƀing čơđai ƀơi kual giăm guai ƀơi rŏng lŏn hăng giăm guai kual ia rơsĭ.

VOV.Jarai-Tlam kơnôl 22/9, nao čuă, ƀơk gơnam hăng pơpŭ bơyan ngui blan bơrơmi kơ ƀing čơđai ƀơi Sang djru ba ƀing čơđai Nghệ An, Kơ-iăng Khua git gai pơ ala mơnuih ƀôn sang dêh čar ơi Đỗ Văn Chiến rơkâo djop gưl Ping gah, gong gai, djop gơnong bruă, sang bruă, anom bruă tơring čar Nghệ An tŏ tui đing nao, bơwih brơi klă ƀiă kơ ƀing čơđai; anăm brơi ƀing mơnuih tơnap tap ƀu dưi hrăm hră, čung ba amăng tơlơi hơdip.

VOV.Jarai-Sơn Điền lĕ sa amăng 29 boh să tơnap tap hloh ƀơi tơring čar Lâm Đồng hăng mrô mơnuih ƀôn sang djuai ania ƀiă truh 96%. Mah tơlơi hơdip mơda, bruă mă bơwih ƀong huă mơ̆ng mơnuih ƀôn sang pơ anai dŏ tơnap tap đôč, yua hơmâo tơlơi djru ba, đing nao mơ̆ng Ping gah, kơnuk kơna, gong gai plơi pla, tơdơi kơ pok thun hrăm phrâo ƀơi să Sơn Điền ngă bruă hơđong tơpă ară laih. Ƀing čơđai sang hră ngă djơ̆ tơlơi phiăn tui tơlơi pơčrâo ba mơ̆ng khua mua gong gai plơi pla “Să tơnap hai samơ̆ pơtô hrăm khom klă”.

VOV.Jarai-Ƀơi să giăm guai dêh čar Ia Lôp, tơring čar Dak Lak hơdôm rơtuh čô čơđai sang hră hrŏm hăng jơlan hơdră anăn “Ƀơi guai dêh čar-Mlam mơak blan Bơrơmi ria” thun 2026. Jơlan hơdră anai, yua anom bruă khua tơhan pơgang guai tơring čar Dak Lak ngă hrŏm Khul đah kơmơi mut phung tơring čar, Jơnum min mơnuih ƀôn sang să Ia Lôp hăng djop anom bruă pơphun, kiăng djru gum ba ngă mơak kơ čơđai muai hăng sang anŏ tơnap tap ƀơi kual guai dêh čar.

VOV.Jarai-Ƀơi Hà Nội, Khul mơnuih tha rơma Việt Nam jơnum Ruah khua tal VII, rơwang bruă thun 2026-2031. Ƀơi mông jơnum anai, lu tơlơi čih pơgôp hiăp hơmâo lăi rơđah tơlơi gơgrong ba mơ̆ng ƀing tha rơma. mơnuih lu thun amăng bruă pơđĭ kyar lơ̆n ia, amăng anun hơmâo boh yom phun prăp lui ngă hrŏm, pơblih yua mrô, dưi bong glăi hăng tơlơi pơhing mrô mơnuih lu kơ tha rơma laih amăng dêh čar, pơtrut djă pioh tơlơi pơmin ia rơgơi, kơnuih hiam hăng tơlơi thâo tom găn rơgao mơ̆ng ƀing tha rơma amăng kual plơi pla.

VOV.Jarai-4 mông mơguah, lơm kual glai čư̆ glăk rơ-ơ̆ rơ-ŏt, ƀuh bluk apui jă amăng sang apui ƀơi Sang hră kơnuk kơna čem rông ba gưl I Tu Mơ Rông, tơring čar Quảng Ngãi (tơring glông Tu Mơ Rông, tơring čar Kon Tum hơđăp). Ƀing neh nai glăk kret kruai tŏ apui, tơnă hơbai gơnam ƀong mơguah brơi ƀing čơđai. Ƀơi kual čư̆ siăng, ƀing neh nai ƀu djơ̆ kơnong pơtô brơi boh hră đôč ôh ăt bơwih brơi gơnam ƀong huă, bruă pit đih, tơlơi suaih pral hăng ngă hiưm pă kiăng ƀing čơđai gir kiăo tui hrăm.

VOV.Jarai - Yua tơlơi răm ƀăm mơ̆ng tơlơi truh lŏn adai ngă, klin kheng, ayuh hyiăng jai hrơi sat tui, tơlơi bơbeč sat mơ̆ng anih hơdip, ayuh hyiăng hăng tơlơi truh pơjrom pơtlă rơdêh ƀơi jơlan nao rai, tơlơi truh sat amăng mông mă bruă...anun jing Việt Nam hơmâo năng ai 1,5 klăk čô čơđai tơnap biă. Hrŏm hăng tơlơi lăng ba mơ̆ng Ping gah, Kơnuk kơna, amăng hơdôm thun rơgao, lu čơđai drit druai, čơđai arăng pơklaih lui, hơmâo mơnuih tơpuôl lăng ba, čem rông hăng pơtô hrăm kiăng ƀing čơđai dưi hơdip mơda klă, jơnap kar hăng čơđai pơkŏn mơn.

VOV.Jarai-Bruă lŏn tơhroh kơtang ƀuh ƀơi čư̆ Cấm, tơring čar Bình Định hơđăp amăng blan 11/2021 dor rơbêh 40 boh sang, bơdjơ̆ nao tơlơi hơdip kơ hơdôm rơtuh čô mơnuih ƀôn sang. Truh ră anai, rơbêh 40 boh sang anŏ glăk man pơdong phrâo ƀơi kual plơi pla phrâo, ƀơƀrư̆ hơđong tơlơi hơdip hlâo kơ bơyan hơjan kơthel.

VOV.Jarai-Kơnôl 16/9, Gơnong bruă Gru grua, Pơrơguăt drơi jăn hăng Tuai čuă ngui tơring čar Dak Lak ngă hrŏm hăng khua tơhan pơgang guai dêh čar tơring čar, jơnum min mơnuih ƀôn sang djop să kah hăng Ia Rvê hăng Ia Lôp, jơnum kơ bruă pôr tơlơi pơhing pơtom hiăp, pơtô pơblang kơ tơlơi dưi ngă pô ƀơi guai dêh čar thun 2026.