VOV4.Xơ Đăng - Hơnăm 2023, kơnôm mơhnhôk pêi cheăng tăng liăn ngân, pơtối rak túa lĕm tro tung tơdroăng mơjiâng thôn pơlê nếo a kơpong hdroâng kuăn ngo kong pơlê Kon Tum a hiăng hlo pơ’lêh hên. Ƀă hnoăng cheăng cho xiâm tung mơjiâng thôn pơlê nếo, hên kuăn pơlê hdroâng kuăn ngo a kong pơlê Kon Tum hiăng mơ-eăm tung pêi chiâk mơdêk pê lo liăn ƀă veăng pơ’lêh ngiâ méa thôn pơlê.

VOV4.Xơ Đăng - Hơnăm 2023, maluâ trâm pá tơdjuôm ‘na cheăng kâ, la kơnôm ing tơdroăng ki rĕng ƀĕng ƀeăn tung pêt mơjiâng mâu hdrê loăng, rơkê xúa kơmăi kơmok chal nếo tung pêt tơmeăm, pêi lo liăn dêi vâi krâ nhŏng o hdroâng K’Ho a cheăm Hiệp An, tơring Đức Trọng, kong pơlê Lâm Đồng pơtối châ mơdêk tơ’nôm. Cheăm Hiệp An xuân hiăng pêi klêi tơdroăng mơjiâng thôn pơlê nếo mơdêk tiô pơkâ mơ’no.       

VOV4.Xơ Đăng - Ƀă tơdroăng ki krâ ‘măn camera séa mơnhên ngăn mâu khu ngế ki ok xok hmâng to lo vâ, po văng nhâ, mơgrúa tơnêi tíu rơtôh vâ pêt reăng drăng mâu tíu ki hmâ ok xok, mê cho hnoăng cheăng dêi đoân viên droh rơtăm ki pêi pro a kơpong achê tíu tơkăng pơla 2 to cheăm Dak Liêng ƀă Dak Nuê, tơring Lăk, kong pơlê Dak Lak, ing mê, hiăng chiâng tơdroăng ki ngiât, krúa, lĕm tâ. Tơdroăng ki ok xok hmâng to lo vâ a kơpong kố hiăng chía kơdroh. Tuá pêi pro mê hiăng châ tơƀrê khât tung mơ’no hnoăng cheăng veăng pro mơgrúa kơdrum deăng, tơnêi tíu, hyôh kong prâi, ing hnoăng cheăng ki lĕm tro kố, mâu đoân viên droh rơtăm a mâu pơlê cheăm ki ê kal athế hriâm tâp, pêi pro ƀối.

VOV4.Xơ Đăng - Tơdroăng tơbleăng pêi 3 Hnoăng pơkâ dêi tơnêi têa ‘na mơjiâng thôn pơlê pơla hơnăm 2021-2025; kơdroh kơtiê krá tơniăn pơla hơnăm 2021-2025; mơnhông cheăng kâ - rêh ối kơpong kuăn ngo ƀă kong ngo pơla hơnăm 2021-2025’’ trâm xơpá, tơvâ tơvân, cho xiâm ki xing xoăng râ ƀă xing xoăng hnoăng pêi pro hâi troh tui lui, ối hên hlá mơ-éa hnê pro tơdroăng pêi pro trâm xơpá. Pơla kố, bú ối 2 hơnăm nếo cho hiăng tâi pêi pêi pro mâu tơdroăng pơkâ pơla hơnăm 2021-2025. Tiah mê, kal ai troăng rơhlâ pêi tơƀrê ki lâi vâ tŏng kum xiâm ing mâu tơdroăng ối pá, tơvâ tơvân tung pơla hdrối nah?

VOV4.Xơ Đăng - Đảng viên Y Phen mơngế hdroâng kuăn ngo M’Nông, 37 hơnăm, ối a ƀuôn Kuốp, cheăm Dray Sáp, tơring Krông Ana, kong pơlê Dak Lak. Hên hơnăm hiăng hluâ, rơtế ƀă pêi kêi đeăng hnoăng cheăng Kăn pơkuâ hnê ngăn Khu pơkuâ pơlê pêi chiâk deăng cheăm Dray Sáp, Y Phen ối đi đo djâ troăng ahdrối tung mơnhông cheăng kâ, kơdroh kơtiê, xăm kơklêa hnối veăng kum mơjiâng thôn pơlê nếo a cheăm. Ƀă mâu tơdroăng châ tơƀrê tung mâu tơdroăng pêi cheăng, 5 hơnăm potối châ Khu pơkuâ kuăn pơlê pêi chiâk deăng kong pơlê Dak Lak pơ-ô pơ-eăng cho khu tơrŭm tung kuăn pơlê pêi chiâk deăng pêt mơjiâng tơmeăm tê mơdró rơkê.

VOV4.Xơ Đăng - Rĕng xo on veăng tá hâi tro hơnăm ƀă xo on veăng ối pơdjuôm môi mơheăm, môi hdrông hdrê xuân ối hlo tung mâu pơlê hdroâng kuăn ngo a kong pơlê Dak Lak. Mâu hơnăm hdrối, mơhé mâu kăn ƀă khu râ, kơvâ cheăng tơmâng khât hnê tối vâ kơdroh, mơdât, la troh nôkố tơdroăng mê xuân lối hlo ai chiâng tơdjâk troh hên tơdroăng.

VOV4. Ƀă inâi dó “Kong rơdâ Tây Nguyên-Ki lěm krip dêi tơdroăng tơkŭm”, sap ing hâi lơ 29/11 troh tâi hâi lơ 1/12 a Pơlê kong kơdrâm Kon Tum, kong pơlê Kon Tum hiăng po Hâi mơdĭng Túa lěm tro, Ivá ƀă Ôm hyô mâu hdroâng kuăn ngo kơpong Tây Nguyên roh má 1, hơnăm 2023. Ai hên mâu tơdroăng ki mơhno túa lěm tro ki tơtro khôi túa lěm tro dêi kơpong Tây Nguyên chal vâi krâ nah hiăng koh pơ-ô ki kơnía git túa lěm tro tiô khôi hmâ lěm tro dêi mâu hdroâng kuăn ngo Tây Nguyên, tơdrêng amê, hnối tơbleăng, vâ mơdêk tơdroăng ôm hyô.

VOV4.Xơ Đăng - Kơnôm liăn dêi Hngêi rak liăn kum pêi chiâk ƀă mơnhông thôn pơlê a kong pơlê Dak Nông ki hên rơpŏng hngêi kuăn ngo M’Nông ai liăn ‘no pêi chiâk, chôa lâng mơnhông hluăn kơtiê. Kuăn pơlê châ xúa liăn teăm tơdrêng vâ pêi cheăng tro tiô rơnó mê ôh tá mung xếo liăn ki tơvêh rơkâ hên môi tiah hdrối nah.

VOV4.Xơ Đăng – Nếo a chê kố, a pơlê kong kơdrâm Pleiku, Khu pơkuâ ngăn Đảng Gia Lai, Học viện Chính trị Quốc gia Hồ Chí Minh hiăng tơkŭm po rôh tơpui tơno khoa hok mơnhông krá tơniăn ôm hyô mơhno túa lĕm tro ƀă ôm hyô kong kế nhâ loăng krá tơniăn kơpong Tây Nguyên tung pơla nôkố. Akố, 50 ngế ki tơpui dêi mâu khu ki hriăn ‘na khoa hok, khu ki pơkuâ ngăn, khu mơdró kâ ôm hyô hiăng ai mâu rơkong veăng tơpui tối ki tro ‘na hriăn ngăn ƀă ki ai khât ‘na ôm hyô Tây Nguyên

VOV4.Xơ Đăng -  Pêi pro pơkâ kơxô̆ 4 ‘na on tơhrik tung mơjiâng thôn pơlê nếo, mâu hơnăm hiăng hluâ, Kŏng ti on tơhrik Dak Lak hiăng tơkŭm mơjiâng troăng on tơhrik ƀă mơdêk ki dâi lĕm tê mơdró mơ’no ăm on tơhrik vâ tơxâng tiô tơdroăng kal vâ mơnhông pêt mơjiâng tơmeăm khoăng ƀă tơdroăng rêh ối dêi kuăn pơlê.