VOV.Bahnar - Vă vei sơđơ̆ng 2 Hnam trưng hŏk Teh đak rong jăl 1 păng jăl 2 tơ̆ dôm xăh sơlam Thuận An păng Quảng Trực tom tơmơ̆t ăn mơ̆t hŏk lơ̆m sơnăm hŏk ‘nao 2026–2027, Anih vei lăng kon pơlei dêh char Lâm Đồng tŏk bŏk athei bơ̆jang mă kơtang, răp hơlen tơdrong jang ming man păng tơdrong jang hơmet ăn sơnăm hŏk ‘nao.

VOV.Bahnar - Năr 5/8, Khul Kơdră chĕp pơgơ̆r Ƀô̆ đô̆ dêh char Khánh Hòa iung jang hơdoi hăm khul kơdră Đảng, Kơdră chĕp pơgơ̆r tơring păng ŭnh hnam pơgơ̆r kôch akom kơting ƀô̆ đô̆i lôch dŏng teh đak Ka Tơr Tiên tơ̆ thôn Tà Nôi, tơring Anh Dũng.

VOV.Bahnar - Pơgê 5/8, Anih vei lăng Hơdrĕch kon kông păng lui khop dêh char Đắk Lắk pơgơ̆r pơih blŭng lăm pơhrăm tơdrong jang lui khop ăn kơ vă jê̆ 200 kang ƀô̆ vei lăng tơdrong jang âu tơ̆ dôm xăh, phương lơ̆m dêh char.

VOV.Bahnar - Ƀar dêh char Đắk Lắk păng Gia Lai oei tơlĕch lơ trong jang vă hơmet ming hnam trưng, lăm hŏk, atŭm hăm ‘nŏh pơm ‘lơ̆ng ăn tơdrong hŏk pơhrăm đơ̆ng đe oh hŏk tro, mă loi ‘nŏh tơ̆ tơring pơmat tat, tơring sơlam, tơring kon pơlei kon kông.

VOV.Bahnar – 'Năr brei (4/8), Kuô̆k hô̆i jăl 16 yak ah năr pơm jang mă 2 kơ 'Măng hop akŏm ưh đei pơkăp mă mônh.

VOV.Bahnar – Pơm kiơ̆ tơdrong pơgơ̆r đơ̆ng Jơnŭm pơgơ̆r teh đak, Hơnih jang vei lăng kon pơlei dêh char Đăk Lăk 'nao tơlĕch dôm tơchơ̆t hơmet, asong hloh 215 tih hlj vă pơtơm jăl jang mă 2 man dôm hnam trưng hŏk teh đak rong 'me ăn rim jăl hŏk tơ̆ tơring sơlam.

VOV.Bahnar - Tơ̆ hơnăp ‘măng hop akom ưh kơ joăt joe mă Blŭng, Kuô̆k hô̆i jăl XVI, Khul kơdră tang măt Kuô̆k hô̆i tơ̆ rim dêh char Tây Nguyên iung jang hơdoi hăm rim hơnih bơ̆ jang iŏk nơ̆r tơgop hăm rim tơdrong vă pơjing khôi luơ̆t, tơdrong tơchơ̆t kăl. ‘Nou jĭ tơdrong jang vă atŏk kơtang hơnăp jang pơm gơng tơroh kloh klĕch ƀar păh bơngai tăh hla hăm Kuô̆k hô̆i, sơđơ̆ng rim tơdrong tơchơ̆t khôi luơ̆t mưh tơlĕch jang kiơ̆ ‘moi kiơ̆ tơdrong yan ou, trŏ lăp hăm tơdrong ‘meh vă atok tơ iung lơ̆m chăl ‘nao.

VOV.Bahnar – Đơ̆ng jên jang kơ Tơdrong tơchơ̆t kơ teh đak, dêh char Quảng Ngãi hlôi pơtơm vei răk tơƀăk mong lơ kơjă joh ayŏ juăt jue tơguăt hăm hơtŏk tơmang pơhiơ̆ pơlei pơla, hơtŏk tơdrong hơrih kon pơlei. Vei răk tơƀăk mong joh ayŏ ưh hơdrô̆ tơgop vei răk tơm a la chă kon kông mă oei pơjing jơhngơ̆m pran hơtŏk mŭk drăm kơjăp sơđơ̆ng.

VOV.Bahnar - Lơ̆m dôm năr ou ki, lơ tơring gah pơmơ̆t dêh char Gia Lai pơtơm jang kiơ̆ "Tơdrong jang Quang Trung", pơm hnam oei ăn kon pơlei tơ̆ tơring ƀơm 'mi kial đak hơbông pơrăm, hơdrin keh đang tơdrong 'nhăk unh hnam kon pơlei lĕch đơ̆ng hơnih hli hlơt ƀơm 'mi kial đak hơbông pơrăm adrol kơ pơyan 'mi kial sơnăm ou.

VOV.Bahnar - Khul jang kơpal xăh Đăk Pék, dêh char Quảng Ngãi (apŭng Đăk Glei, dêh char Kon Tum so) chă ƀôh, sir iŏk đei 1 kơting linh lôch tang ăn teh đak tơ̆ thôn 16/5.